Chivkeeb 12:10-20
Nqe cim:
“Lub sijhawm ntawd muaj kev tshaib nqhis nyob hauv tebchaws Kana-as, Anplas thiaj tsiv mus nyob nram tebchaws Iziv tau ib ntus” (Chivkeeb 12:10)
Lus nug xav:
– Thaum Anplas nyob hauv lub tebchaws uas Vajtswv coglus, nws ntsib teebmeem dabtsi?
– Qhov uas txiav txim siab khiav mus rau tebchaws Iziv qhia pom hais tias Anplas yog tus neeg zoo li cas?
– Vajtswv tau ua dabtsi, thiab thaum kawg muaj qabhau li cas?
– Peb nrog Tus Tswv mus li cas hauv kev ua neej?
Txawm hais tias twb muaj neeg nyob hauv tebchaws Kana-as lawm los, Vajtswv lees rau Anplas hais tias Vajtswv yuav muab lub tebchaws ntawd rau nws cov xeebntxwv (Chivkeeb 12:4). Vim li ntawd, Anplas thiab nws tsev neeg thiaj pehawm Vajtswv thiab nyob hauv qhov chaw ntawd. Tiamsis lub tebchaws tsis zoo li tau coglus tseg lawd vim Anplas tsev neeg tsis yog tau koob hmoov ho tseem ntsib kev tshaib kev nqhis loj heev hauv lub tebchaws ntawd (nqe 10). Vajlugkub qhia hais tias “muaj kev tshaib nqhis” loj heev, Anplas thiaj txiav txim siab coj nws tsev neeg mus rau tebchaws Iziv uas nyob sab qab teb mus nrhiav zaub mov noj.
Teb chaws Iziv yog ib lub tebchaws npluanuj vim muaj tus dej Niles, lawv thiaj muaj zaub mov txaus noj npluamias. Tiamsis Anplas paub tseeb hais tias qhov chaw ntawd puv npo kev txhaum. Anplas tseem xam pom txog qhov uas cov neeg ntawd yuav tua nws thiab txeeb yuav nws tus pojniam, los nws tsis nyob twjywm thiab cia siab rau Vajtswv kev pab, lossis tsawg kawg yog los nrhiav Vajtswv coj kev, tiamsis cia kom tiv thaiv tau nws tus kheej, Anplas tau txiav txim siab mus rau qhov ntawd, thiab Anplas tau xav tawm ib txoj haukev daws teebmeem los ntawm qhov uas qhia nws tus pojniam kom dag hais tias nkawd tsis yog txijnkawm. Nws kuj ntsiag to thaum uas nws tus pojniam raug luag coj mus rau hauv vajntxwv lub loog. Qhov no qhia pom hais tias Anplas kuj yog ib tug neeg tsis muaj zog, ntshai thiab txhawj txog tus kheej. Vajtswv xaiv hu Anplas tsis yog vim nws zoo dua lwm tus, tiamsis vim Vajtswv muaj homphiaj tshwjxeeb rau nws xwb.
Vajtswv yeej saib xyuas thiab tiv thaiv cov neeg uas Nws tau xaiv lawd. Thaum Anplas tus pojniam raug vajntxwv coj mus rau hauv nws lub loog lawd, Vajtswv tau tso tej kab mob phem los raug vajntxwv Iziv thiab cov neeg hauv nws lub loog. Thaum ntawd lawv thiaj paub hais tias tus uas lawv coj los no yog Anplas pojniam. Ces tamsim ntawd vajntxwv thiaj hu Anplas tuaj, muab nws tus poj niam rov qab rau nws, tom qab ntawd ntiab nws tsev neeg khiav mus rau lwm qhov, thiab rov qab los rau tebchaws Kana-as.
Kev sim siab yog yam uas peb zam tsis dhau thaum mus raws li Vajtswv tej lus cog tseg. Anplas yuam kev vim nws tsis nco qab hais tias Vajtswv tus uas hu nws muaj hwjchim loj npaum li cas. Tsimnyog Anplas cia siab rau Vajtswv, tiamsis nws ho mus cia siab rau nws txoj kev txawj ntse thiab nrhiav kev pab ntawm lub tebchaws Iziv. Tiamsis ua Vajtswv tsaug, Vajtswv tseem nrog nraim cov neeg uas Nws xaiv thiab pab lawv thaum yog Vajtswv lub sijhawm. Vim Vajtswv txoj kev hlub tshua, peb tseem nyob hauv Nws tej lus cog tseg. Qhov tseeb tiag, lub neej nrog tus Tswv mus yog lub neej ntawm txoj kev hlub tshua, peb nrog Nws mus li ntawd vim peb tsuas ntseeg rau ntawm Nws ib leeg xwb.
Thov Vajtswv,
Tus Tswv, thov zam txim rau nyuam yaus, vim muaj qee zaus nyuam yaus tsis cia siab rau Koj txoj kev pab tiamsis nyuam yaus ho siv tus kheej txoj kev xav los daws tej kev nyuaj kev tws hauv lub neej uas nrog Koj mus. Txawm li ntawd los Koj tsis tso nyuam yaus tseg, Koj yeej nrog nyuam yaus nyob thiab pab nyuam yaus raws li Koj lub sijhawm. Thov Koj pab nyuam yaus ntseeg ruaj rau ntawm Koj thiab muab tagnrho nyuam yaus lub neej tso rau Koj ua tus saib xyuas. Nyuam yaus ua Vajtswv tsaug, tuav Tswv Yexus Khetos lub npe thov, Amees.
Peb qhia tshwm peb kev tso siab rau Vajtswv li cas, tshwjxeeb thaum muaj kev txomnyem lossis kev sim siab tuaj raug peb lub neej uas nrog tus Tswv mus?
Nyeem Vajluskub hauv peb lub xyoos: Exethaws 9
Kênh Youtube BHKTHN:
