Pajlug 16:6
Nqe cim:
“Cia li ua zoo thiab ua ncaj ncees Vajtswv thiaj yuav zam koj lub txim. Yuav tsum hwm tus TSWV koj thiaj dim ntawm txojkev phem” (Pajlug 16:6)
Lus nug xav:
– Yam dabtsi coj kev zam txim thiab kev dawbhuv los?
– Yuav ua li cas thiaj txais tau tej ntawd?
Nqe Pajlug hnub no nyob hauv nruab nrab ntawm nqe 1 mus txog nqe 9, yog ntu Vajluskub uas qhia txog Vajtswv txojkev npaj tseg thiab Nws lub homphiaj tswjkav txhua yam. Hauv nqe 4 qhia hais tias Vajtswv tsim txhua yam los rau Nws tus kheej. Txhua txojkev npaj, txhua tes haujlwm uas Vajtswv ua, thiab txawm yog txojkev cawm dim uas Nws npaj rau tibneeg, los puavleej yog ua kom Vajtswv tau koob meej (Tshwmsim 4:11).
Yog Vajtswv ntsib tibneeg raws li Nws txojkev dawbhuv thiab kev ncaj ncees, ces yuav tsis muaj ib tug twg dim tau ntawm kev raug txim. Tiamsis ua Vajtswv tsaug, dhau ntawm Tswv Yexus Khetos, tibneeg thiaj dim tau ntawm Vajtswv txojkev txiav txim vim lawv tej kev txhaum, thiab Vajtswv txojkev rau txim rau cov neeg favxeeb tsis yog qhov kawg. Nrog raug kev dawbhuv thiab kev ncaj ncees, Vajtswv kuj qhia tshwm Nws txojkev “ua zoo thiab ua ncaj ncees”, qhov ntawd txhais hais tias vim hlub tibneeg thiab vim ua siab ncaj rau Nws tus kheej tus mojyam, Vajtswv thiaj npaj txojkev cawm dim rau tibneeg txhaum puag thaum tseem tsis tau tsim lub ntiajteb no los, dhau ntawm Nws Tib Leeg Tub txojkev theej txhoj (I Petus 1:18-20).
Kev hwm tus Tswv yog kev ntseeg thiab saib taus Vajtswv kawg siab kawg ntsws. Yog kev lees paub hais tias Vajtswv yog leejtwg, dhau qhov ntawd tsim kev sib raug zoo nrog Vajtswv dhau ntawm Tswv Yexus Khetos, nrog rau kev txo hwjchim mloog Nws tej lus samhwm. Tej no tsuas pom muaj nyob hauv cov neeg uas twb paub thiab twb pom Vajtswv txojkev cawmdim rau tus kheej los ntawm Nws txojkev “ua zoo thiab ua ncaj ncees”. Tsis tas li ntawd, thaum ib tug neeg twb paub Vajtswv txojkev “ua zoo thiab ua ncaj ncees” lawm, nws kuj yuav ua neej muaj kev “ua zoo thiab ua ncaj ncees” rau lwm tus thiab. Ib yam zoo kawg nkaus, yog qhov uas peb zeem paub hais tias peb muaj lub zog txog qib uas txhiv tau kev txhaum, txhais hais tias peb kovyeej tej kev txhaum uas lwm tus tau ua rau peb. Kev txhaum yog tes haujlwm phem thiab qia dub, ua rau tibneeg muaj kev tsis sib haum xeeb. Kev tsis sib haum xeeb ntawd ua rau tus neeg raug ua phem npau taws. Tiamsis, txojkev npau taws ntawm cov neeg tsimnyog npau taws yuav nqig mus thaum lawv “ua zoo thiab ua ncaj ncees”. Timthawj Petus qhia hais tias: “Qhov uas tseemceeb tshaj plaws huv tibsi, yog nej ib leej yuav tsum hlub ib leeg tiag tiag, rau qhov txojkev hlub npog tau txhua yam kev txhaum huv tibsi” (I Petus 4:8).
Nyob hauv zaj lus pivtxwv hais txog Tus Tubtxib uas Tsis Zam Txim (Mathais 18:23-35), Tswv Yexus qhia meej hais tias kev hwm Vajtswv thiab kev ua Nws tsaug yuav tsum qhia tshwm dhau ntawm lub neej muaj kev hlub thiab kev zam txim. Thiab peb kuj niaj hnub thov Vajtswv raws li Tswv Yexus qhia hais tias: “Thov koj zam txim rau peb ib yam li peb twb zam txim rau cov uas ua txhaum rau peb lawm” (Mathais 6:12). Yog li ntawd, cia peb qhia Vajtswv txojkev hlub rau peb cov kwvtij nkaujmuam dhau ntawm lub neej muaj kev zam txim thiab kev ncaj ncees.
Thov Vajtswv,
Tus Tswv, ua Koj tsaug uas Koj pub txojkev cawm dim rau nyuam yaus vim Koj txoj koob hmoov hlub. Nyuam yaus coglus tias yuav qhia Koj txojkev hlub rau cov neeg nyob ibncig dhau ntawm ib lub neej muaj kev zam txim thiab kev dawbhuv. Nyuam yaus tuav Tswv Yexus Khetos lub npe thov, Amees.
Peb tabtom ua neej qhia tshwm kev zam txim thiab kev ncaj ncees li cas?
Nyeem Vajluskub hauv peb lub xyoos: Ntawv Nkauj 119:1-56
Kênh Youtube BHKTHN:
