II Pêtrôs 1:3-4
“Yua kơ Sư Yang, Sư mơsêh tơpă, na Sư ăn kơ bơ̆n tôm tơdrong gơh arih, gơh pơm ‘lơ̆ng tơpăt thoi Sư. ‘Noh yua kơ Sư krao, na bơ̆n băt kơ Sư. Bơ̆n ‘bôh Sư mơsêh păng ‘lơ̆ng tơpăt na bơ̆n băt kơ kiơ̆ Sư.”
(II Pêtrôs 1:3)
Nơ̆r jet tơchĕng pơwao:
– Đơ̆ng tơdrong băt kơnăl kơ Kră Yang lăm kơdih akâu, Kră Yang ‘Bok Kei-Dei hơmet păng ăn kơ lu bơ̆n tơdrong kiơ?
– Kră Yang wă kơ kon pơlei Sư arih thoi yơ kơplah đei iŏk tơdrong pŭn hiôk gah bơhngol ‘noh kiơ?
– Lu bơ̆n kăl kơ pơm kiơ wă kơ đei iŏk nơ̆r Kră Yang pơkă?
‘Bok Pêtrôs wă tơpă kơplah lu bơ̆n băt kơ Kră Yang lăm kơdih kâu noh “Bơ̆n ‘bôh Sư mơsêh păng ‘lơ̆ng tơpăt na bơ̆n băt kơ kiơ̆ Sư”. Kră Yang ‘Bok Kei-Dei đei hơmet păng ăn “tôm tơdrong” gah bơhngol mă lu bơ̆n kăl kơ đei noh jơ̆ “tơdrong arih păng tơdrong lui yom”. “Tôm tơdrong” ‘nâu wă khan ‘bĕnh blai, rơkah rơkai. Mă minh, Kră Yang ăn kơ lu bơ̆n tơdrong dŏng pơklaih đơ̆ng lăm tơdrong lôch păng tơdrong iung arih đơ̆ng Kră Yang Yêsu Krist, wă kơ bơ̆n lui păng sơng iŏk tơdrong arih ling lang păng tơdrong arih hiôk jơnap. Mă ‘Bar, đơ̆ng Yang Bơhngol ‘Lơ̆ng ăn kơ bơ̆n mơsêh pran wă kơ bơngai lui kơ Kră Yang kĕ hlôi đơ̆ng gleh pơmat, pơlong, bơwei jơhngơ̆m đon lui kơ Kră Yang na wơ̆ ‘lŏ lăm tơdrong lui (trong 3). Lu bơ̆n kăl kơ ‘blŏk, Kră Yang, “Sư ăn kơ bơ̆n tôm tơdrong gơh arih, gơh pơm ‘lơ̆ng tơpăt thoi Sư”. Wă kơ lu bơ̆n arih ‘lơ̆ng rơgoh păng arih hiôk chơt hăm Kră Yang rim năr.
‘Bok mă ưang păng ‘lơ̆ng tơpăt đei hơmet păng ăn tôm tơdrong tih tin kơ lu bơ̆n, na Kră Yang kư̆m wă kơ kon pơlei Sư athei “weh wer đơ̆ng tơdrong kơnê̆ ‘mê̆ ‘mach tơ ala teh âu” na đei iŏk tơdrong arih ưh kơ wă tơdrong yoch păng dôm tơdrong kơnê̆ ‘mê̆ ‘mach lăm teh đak chô̆ pơkơ̆ng, arih lăm tơdrong arih ‘lơ̆ng tơpăt tơpă wă kơ “jing kon Sư kư̆m ‘lơ̆ng tơpăt thoi Sư” rai rok thoi Kră Yang Yêsu hloh lu bơ̆n oei arih đunh dang yơ tơ ala teh âu, na jơ năr lu bơ̆n gô tơ’bơ̆p tơdrong đe pơdôr, pơhlŭ pơlung pơm yoch. Mălei tơdah lu bơ̆n wei răk nơ̆r Kră Yang pơkă, wei kơjăp đon lui păng tơdrong lui yom, lei na lu bơ̆n gơh đei Yang Bơhngol ‘Lơ̆ng bơtho tơ’bôh, bơwei ăn jơhngơ̆m pran wă kơ kĕ jei đơ̆ng tơdrong pơhlŭ pơlung. Thoi noh, tơdrong Kră Yang hơmet kơ lu bơ̆n tơdrong arih păng tơdrong lui yom tơ’blŏk kơ lu bơ̆n huay kơ pơang khan bơ̆n gơh kĕ pran wei đon lui gơh kĕ jei đơ̆ng tơdrong pơhlŭ pơlung, mălei bơ̆n chu yom Yang Bơhngol ‘Lơ̆ng wă kơ Sư thim ăn đei jơhngơ̆m pran păng tơgŭm bơ̆n rim năr lăm tơdrong arih hăm Kră Yang.
Đei trong wă kơ tơgŭm lu bơ̆n wă sơng iŏk tơdrong mă Kră Yang ‘Bok Kei-Dei hơmet ăn kơ lu bơ̆n noh “athei weh wer đơ̆ng tơdrong hiong răm đơ̆ng ala teh âu”, ‘noh jơ̆ rim ‘nu bơngai lui athei chĕp kơjăp dôm nơ̆r Kră Yang pơkă đơ̆ng lu bơ̆n đei hŏk pơhrăm Nơ̆r Sư păng tơ’bưh hăm Sư lăm tơdrong lu bơ̆n krao khan. Kră Yang “ăn nơ̆r Sư pơkă gĭt kăl tih kơ lu bơ̆n” (trong 14). Mălei tơdah lu bơ̆n ưh kơ hŏk pơhrăm nơ̆r Kră Yang lei lu bơ̆n gô ưh kơ đei ôh tơdrong dôm nơ̆r đei pơkă kơ lu bơ̆n noh.
Ơ Kră Yang, inh bơnê kơ Ih jơ̆ ‘Bok mă ăn kơ inh arih păng lui yom. Apinh Ih ăn kơ inh wei kơjăp nơ̆r Ih pơkă mă gĭt kăl, pơnam hŏk pơhrăm gah Ih păng krao khan wă kơ inh sơng iŏk tơdrong arih păng lui yom, kĕ jei đơ̆ng pơhlŭ pơlung, păng pơyơ̆r chăl arih inh pơm tơmam soi Ih lăp đon. Krao khan yua anăn Kră Yang Yêsu Krist, Amen.
Lu bơ̆n hăm adrin đŏk, hŏk pơhrăm nơ̆r Kră Yang păng tơ’bưh hăm Sư rim năr ưh?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 10
Kênh Youtube BHKTHN:
