I Kôrintô 6:9-11
“lu bơngai tơtông, lu bơngai ‘nhĕng kơ mŭk tơmam đe, lu bơngai et sik suai, lu bơngai oei hiĕk achơ̆ kơ đe, iĕm ‘nĕ ngêh lu sư gơh tŏk oei tơ dêh char ‘Bok Kei-Dei ôh.”(I Kôrintô 6:10)
Nơ̆r jet tơchĕng pơwao:
- ‘Bok Pôl pơma nơ̆r kiơ wă tơ’blŏk kơ bơngai khan sư bơngai lui mălei oei pơm tơdrong yoch?
- Kră Yang bơtho kơ lu bơngai pơhrăm pơm thoi yơ wă kơ băt bơngai bơtho hơlĕnh păng bơngai lui mă ưh kơ lui tơpă?
- Pơm thoi yơ wă kơ bơ̆n huay kơ ngêh kơ dih?
Trong blŭng a lăm chăl 6, ‘Bok Pôl chrih kơ lu bơngai lui tơ Kôrintô kơ plah lu sư iŏk tơdrong ‘nhŏng oh lăm khŭl bơngai lui na tơlĕch roi kơ “kră ưh kơ lui sek tơlang” noh “lu kră ưh kơ lui” sek ăn tơdrong iĕm (I Kôrintô 6:1, 6). Lăm trong 9, sư khan “Lu kră ưh kơ lui” noh “ưh kơ gơh tŏk oei tơ dêh char ‘Bok Kei-Dei”. Kơ tơ̆ng thoi noh, đei bơngai ngăl pơm tơdrong yoch sư đei roi trong 10, oei pơm hơnơ̆ng tơdrong yoch, jơ-hngơ̆m lu sư hmă đĕch yua kơ lu sư khan “lu sư bơngai lui” “khan ưh kơ lui ôh”. Đơ̆ng noh ‘Bok Pôl pơma minh nơ̆r wă tơblŏk kơ lu sư: “nĕ kơ ngêh kơdih” (trong 10) Pơma pha biơ̆, nĕ kơ tơchĕng khan. Lăp lu bơngai lui kơ Kră Yang Yêsu jơ̆ Kră Yang ‘noh bơngai ưh kơ lui, bơngai ưh kơ gơh oei tơdêh char ‘Bok Kei-Dei ôh! Lu bơngai sư khan sư bơngai lui mă lei arih oei pơm pơyô kư̆ kă. Kơkuh kơ rup yang, plah klo kăn đe, tơduă drŏ nglo tơngơ̆r băl, tơtông, et sik suai, bơngai oei hyĕk kơchơ̆ kơ đe iĕm ngeh lu sư gơh tŏk oei tơdêh ‘Bok Kei-Dei ôh, yua kơ lu sư oei arih kơ ‘lơ̆ng trŏ. Lu sư arih “thoi noh tơpă mơ̆n sơ̆” arih kiơ̆ sĕch akâu akar, arih tơ plơ̆ hăm tơdrong arih “dang ei ‘Bok Kei-Dei ôp rơgoh tơdrong yoch iĕm bơih, iĕm jing kon Sư ‘lơ̆ng tơpăt bơih” (trong 11)
Kơplah bơtho kơ lu bơngai pơhrăm băt kơ bơngai bơtho hơlĕnh păng lui ưh kơ tơpă, Kră Yang Yêsu khan “Ưh kơ sĭ dôm lu bơngai mă krao Inh Kră Yang gơh mơ̆t tơ dêh char ‘Bok Kei-Dei pơđĭ ôh. Pôm lu bơngai mă lui kiơ̆ kơ ‘Bă Inh đĕch gơh mơ̆t tơ dêh char Sư noh.” (Mathiơ 7:21) Kră Yang Yêsu tơ ‘bôh minh tơdrong hli krê noh bơngai ngêh kơ dih akâu, na truh năr tuch luch lu sư khan: “ơ Kră Yang, nhôn yua anăn Ih pơtruh nơ̆r ‘Bok Kei-Dei, nhôn yua anăn Ih pơ puh yang kơnê̆ lĕch đơ̆ng akâu bơngai?…” jơ’noh, Kră Yang krao lu bơngai mă khan “Ơ Kră Yang, ơ Kră Yang” mă lei arih ưh kơ trŏ thoi Kră Yang bơtho: “Năr tôch ning-mônh đei lơ bơngai pơma lung Inh thoi âu: Ơ Kră Yang, nhôn yua anăn Ih pơtruh nơ̆r ‘Bok Kei-Dei, nhôn yua anăn Ih pơpuh yang kơnê̆ lĕch đơ̆ng akâu bơngai păng nhôn pơm lơ tơdrong mơsêh mơyang nai yua anăn Ih. Mă-lei năr ‘noh kơnh Inh gô khan kơ lu sư thoi âu: Inh ưh kơ băt kơ lu iĕm âu ôh. Weh tơ nai năm, iĕm bơngai kơnê̆ ngăl.” (Mathiơ 7:22-23) Kră Yang bơtho dah ưh kơ wă ngêh kơdih akâu, athei lăng tơdrong arih bơ̆n kơdih hăm kiơ̆ trŏ tơdrong tơpăt ‘lơ̆ng rơgoh ưh păng tơdrong ‘mêm Kră Yang dah ưh, yua kơ lăng plei gô băt kơ tơnơm (Mathiơ 7:16-18).
Wă bơtho pơlung kơ lu bơngai lui ‘nĕ kơ ngêh kơdih, ‘bok Pôl pơma kơ tơdrong tơ’bưh lăm kon bơngai “pơm sơ̆” noh pơm pơyô kư̆ kă, kơkuh kơ rup yang…hăm bơngai “yua kơ Kră Yang Yêsu Krist păng Yang Bơhngol ‘Lơ̆ng tơgŭm bơ̆n” (trong 11). Apinh Kră Yang ăn kơ bơ̆n arih trŏ lăp hăm anih ‘nao Kră Yang ăn kơ bơ̆n wă kơ bơ̆n huay kơ ngêh kơdih akâu, mălei arih Kră Yang lăp đon.
Ơ Kră Yang, bơnê kơ Ih yua kơ nơ̆r tơ’blŏk “nĕ kơ ngêh kơdih”. Apinh Kră Yang ling lang tơgŭm inh arih lăm tơdrong tơ’bưh jê̆ Ih păng lăng tơdrong arih lui yom inh hăm trŏ lăp hăm nơ̆r Ih dah ưh kơ wă kơ inh arih huay kơ ngêh kơdih akâu. Krao khan yua anăn Kră Yang Yêsu Krist. Amen
Bơ̆n kăl kơ lăng ming tơdrong arih kiơ̆ tơdrong hơgăt ayơ wă huay kơ ngêh kơdih?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Markôs 3
Kênh Youtube BHKTHN:
