Ntawv Nkauj 8:1-9
Nqe cim:
“Tus TSWV uas yog peb tus Tswv, koj lub npe uas muaj hwjchim hnov thoob ntiajteb. Tej lus uas peb qhuas koj yeej nrov nto saum ntuj lawm!” (Ntawv Nkauj 8:1)
Lus nug xav:
– Ntawv Nkauj 8 qhia pom Vajtswv muaj hwjchim thiab koobmeej li cas?
– Vajtswv tsim tibneeg los rau tej koob hmoov thiab lub luag haujlwm dabtsi?
– Zaj kawm pab peb ua neej li cas hauv kev sib raug zoo nrog Vajtswv, rau lwm tus, thiab rau tej yam uas Vajtswv tsim?
Vajtswv lub hwjchim qhia tshwm qhov txhia chaw saum nruab ntug thiab hauv ntiajteb. Vim Vajtswv tsim txhua txheej ntuj los ntawm Nws “txhais tes tsim”; lub hli tej hnub qub thiab ib puas tsav yam Nws tsim los ntawm Nws lolus hais. Txawm peb saib tsis pom Vajtswv vim Nws yog ntsujplig, tiamsis thaum uas peb tig saib tej toj roob hauv pes thiab ib puas tsav yam uas Nws tsim zoo nkauj heev ntawd peb yeej yuav zeem paub tau hais tias Vajtswv zoo npaum li cas, Nws muaj hwjchim thiab koobmeej li cas!
Vajntxwv Daviv xav tsis thoob txog koobhmoov uas Vajtswv pub rau tibneeg, tshaj tej uas neeg xav lawm. “Koj tsim lawv los ua tus yau ntawm koj; koj thiaj pub lawv muaj hwjchim thiab meejmom.” (nqe 5). Tibneeg tau tsim los muaj yam ntxwv zoo li Vajtswv, muaj kev txawj ntse, muaj peevxwm rhawv tsim lwm yam thiab tshwjxeeb yog muaj ntsujplig los sib txuas nrog Vajtswv. Tibneeg tau Vajtswv pub hwjchim los tswj kav txhua yam (nqe 6, Chivkeeb 1:26-27). Txawm tibneeg tau poob kev txhaum “thiab tu ncua Vajtswv lub tshwjchim lawm” (Loos 3:23), tiamsis peb yeej tseem yog tus uas Vajtswv hlub, nco txog thiab saib xyuas (nqe 4).
Ntawm cov menyuam yaus thiab cov menyuam mos lub ncauj, Vajtswv ua rau “yeeb ncuab thiab cov neeg tawmtsam ua twjywm” (nqe 2 phau Nyablaj). Qhov no qhia meej hais tias Vajtswv muaj hwjchim tsis yog vam neeg lub zog lossis neeg txoj kev txawj ntse. Vajtswv xaiv cov neeg uas tsis muaj zog, tsis muaj hwjchim, thiab txo hwjchim, los qhia tshwm Nws lub hwjchim. Cov lus qhib thawj thiab xaus ntawm Ntawv Nkauj 8 yog kev pehawm thiab qhuas Vajtswv lub npe thoob ntiajteb! Kev qhuas Vajtswv yog lub cim ntawm ib tug tibneeg zeem paub txog yus kev muaj nqis.
Tibneeg pheej vamkhom rau ntawm kev muaj hwjchim, meejmom, nyiaj txiag uas saib tsis taus lwm tus lossis ua tsis ncaj rau lwm tus. Ib tug ntseeg yuav tsum zeem paub hais tias yus kev muaj nqis yog txoj koob hmoov uas peb yuav tsum ua neej muaj feem xyuam rau Vajtswv, rau cov tsis tau ntseeg thiab rau txhua yam uas Vajtswv tsim. Peb yuav hlub Vajtswv dua, ua neej paub nco Nws txiaj ntsig, pehawm thiab txhawb nqa Vajtswv tsis tseg tsis tu. Peb yuav tsum paub saib yus muaj nqis thiab hlub yus kom yog; pom muaj Vajtswv nyob nrog txhua tus, coj ncaj coj zoo, sib hwm, sib hlub thiab pab cov neeg ntsuag, cov tsis muaj zog. Peb yuav tsum saib xyuas thiab tiv thaiv qhov chaw Vajtswv tsim los rau peb nyob kom ceev tau txhua yam rau Vajtswv.
Thov Vajtswv,
Vajtswv uas yog nyuam yaus tus Tswv! Koj lub hwjchim thiab tus Tshwjchim ci ntsa iab saum ntuj thiab hauv ntiajteb no. Ua Koj tsaug uas Koj tsim nyuam yaus muaj nqis heev, pub meejmom hwjchim rau nyuam yaus thiab pub nyuam yaus sib txuas tau nrog Koj! Thov pab nyuam yaus kom yim hnub nyuam yaus yim hlub Koj heev dua ntxiv. Nyuam yaus tuav Tswv Yexus Khetos lub npe thov, Amees.
Peb puas tau ua neej kom tsimnyog txoj kev muaj nqis uas Vajtswv pub? Muaj yam twg peb yuav tsum tau hloov pauv?
Nyeem Vajluskub hauv peb lub xyoos: Malakaus 1
Kênh Youtube BHKTHN:
