Mathais 24:45-51
Nqe cim:
“Tus tubtxib uas ncaj thiab muaj tswvyim, tus tswv yuav tsa nws ua tus loj uas saib tus tswv cov tubtxib, thiab thaum txog sijhawm noj, tus ntawd yuav ua tus faib zaub faib mov rau cov tubtxib noj. Thaum tus tswv rov los pom tus tubtxib ntawd tabtom ua tej haujlwm no, ces tus tubtxib ntawd yuav tau ntsejmuag!” (Mathais 24:45-46)
Lus nug xav:
– Tus “tubtxib” hauv zaj lus no hais txog leejtwg?
– Ob tug cwjpwm thiab ob qhov nqi zog sib txawv ntawm ob hom tubtxib yog dabtsi?
– Peb kawm tau dabtsi dhau zaj lus tus Tswv hais no?
Tswv Yexus rov hais dua ib zaj lus txog ob tug cwjpwm ntawm tus tubtxib ua rau tus tswv thiab nrog rau ob qhov nqi zog sib txawv. Peb pheej xav hais tias “tubtxib” ces yog lub npe tis rau cov xibhwb, tiamsis Vajtswv Txojlus qhia tias peb txhua tus puavleej yog Vajtswv cov tubtxib, vim tau tus Tswv txhiv tus nqi kim heev los ntawm Nws cov ntshav. Hauv zaj lus tus Tswv hais, “tubtxib” hais tagnrho cov neeg uas tau tus Tswv muab haujlwm hauv Pawg Ntseeg, txhua pab, tsevneeg.
Tus “tubtxib ncaj ncees thiab muaj tswvyim” tsis nrhiav kom nws tau tiamsis tas siab ua haujlwm rau tus tswv raws li nws lub luag haujlwm tau txais ua, “faib zaub mov rau lawv noj rawsli lub sijhawm” (nqe 45 Mww2022). Yog koob hmoov rau tus tubtxib ntawd, thaum tus tswv rov los pom nws tseem nquag ua haujlwm, tus tswv yuav muab nqi zog rau tus tubtxib ntawd, uas yog tsa nws ua ntau txoj haujlwm dua, “tus tswv yuav tsa tus tubxib ntawd ua tus saib tus tswv tej qhov txhia chaw” (nqe 47).
Tus “tubtxib siab phem” saib tsis taus tus tswv, nws tus kheej xav hais tias “tshuav ntev kuv tus tswv mam rov los” yog li ntawd nws ua neej ywj siab, ntshaw noj ntshaw haus, siv meejmom los nrhiav kom tus kheej tau, tsis muaj kev hlub, ua phem rau lwm tus tubtxib. Tseeb tiag cov neeg no yog cov neeg tsis ntseeg, qhia tshwm kev ua neej zoo nkaus li tus neeg tsis tau ntseeg, zoo li cov “cevlus cuav”, “xibhwb cuav” nyob nrog tus tswv haivneeg. Vim nplooj siab hlub, tus Tswv muab haujlwm rau lawv ua kom lawv nyob ze Nws thiab muaj sijhawm hloov kev ua neej, tiamsis yog pheej rau siab ntso nyob lub neej ua yuam kev, tus Tswv hnub los txog “Tus tswv yuav muab tus tubtxib ntawd hlais ua tej daim, thiab muab nws pov mus nrog cov neeg uas ntsejmuag ncaj siab nkhaus nyob. Lawv yuav quaj tom hniav qawv qhov ntawd” (nqe 51).
Zaj lus no qhia rau peb tias peb tau tus Tswv cawm, tuag txhiv, thiab Nws kuj yog tus hu peb los ua ncaj ncees, ua haujlwm thaum tseem nyob tos tus Tswv rov qab los. Nyob tos tus Tswv tsis yog zaum twjywm tos tiamsis yog siv zog ntsos ua neeg ncaj ncees, ua tiav yus feem xyuam, kev hlub thiab tu lwm tus raws li qhov tus Tswv cob rau peb ua. Thaum peb ncaj ncees ua haujlwm thiab ua tiav tes haujlwm tus Tswv cob, tus Tswv yuav rov qab los cuag peb zoo ib yam li ib tug vajntxwv muaj nqi zog; dua li ntawd, yog peb saib tsis taus hnub tus Tswv rov qab los, peb yuav saib yus hlob, tsis muaj kev hlub thiab tsau rawv hauv txojkev txhaum, tus Tswv yuav rov qab los zoo ib yam li tus neeg txiav txim thiab lub txim raug mus ibtxhis uas yog “quaj qw tom hniav qawv”. Thov Vajtswv qhia rau peb pom yus tus cwjpwm ua Nws tes haujlwm. Kev ua neej ntseeg thiab ua Vajtswv haujlwm tamsim no yuav yog qhov txiav txim siab rau peb lub neej yav tom ntej tau txais nqi zog lossis raug txim thaum Tswv Yexus rov qab los.
Thov Vajtswv,
Vajtswv tus paub txhua yam, Koj paub nyuam yaus lub neej sab ntsujplig tamsim no, thov Koj qhia nyuam yaus lees txim, rov los ua tus tubtxib ncaj ncees, nquag thiab ua tiav tej haujlwm Koj txib. Nyuam yaus tuav Tswv Yexus Khetos lub npe thov, Amees.
Peb tabtom yog tus tubtxib ncaj ncees thiab muaj tswvyim los yog tus tubtxib siab phem
Nyeem Vajluskub hauv peb lub xyoo: Nehemis 12
Kênh Youtube BHKTHN:
