Klei Aê Diê Blŭ: Y-Mathiơ 24:45-51
Êlan kliăng: “Snăn hlei pô jing dĭng buăl sĭt suôr leh anăn thâo mĭn, pô khua ñu jao brei kiă kriê jih jang mnuih hlăm sang ñu, čiăng brei mnơ̆ng ƀơ̆ng huă kơ digơ̆ djŏ mông? Jăk mơak yơh kơ dĭng buăl anăn tơdah khua ñu truh leh anăn ƀuh ñu dôk ngă snăn!” (Y-Mathiơ 24:45-46)
Klei êmuh ksiêm mĭn: “Dĭng buăl” hlăm klei yăl dliê anei čiăng lač kơ hlei pô? Dua knuih leh anăn dua boh knhal tuč mdê mdê mơ̆ng dua phung dĭng buăl anăn ya jing? Ya klei bi hriăm drei mâo mơ̆ng klei yăl dliê Khua Yang yăl dliê?
Khua Yang Yêsu lŏ yăl dliê sa klei bi hriêng mkăn djŏ kơ knuih dĭng buăl hŏng khua ñu wăt hŏng dua boh knhal tuč mdê mdê. Drei khăng mĭn “dĭng buăl” jing anăn khăng pia kơ phung khua pô mtô, pô mtô, ƀiădah Klei Aê Diê lač grăp čô drei jing dĭng buăl Khua Yang sơăi kyuadah Khua Yang bi tui leh drei hŏng ênoh yuôm snăk jing hŏng êrah yuôm Ñu pô. Hlăm klei yăl dliê Khua Yang yăl dliê, “dĭng buăl” čiăng lač kơ jih jang phung Khua Yang jao leh bruă klam hlăm grăp êpul hlăm Phung Sang Aê Diê, hlăm gŏ sang.
“Dĭng buăl sĭt suôr leh anăn thâo mĭn” amâo duah klei tŭ dưn kơ ñu pô ôh, ƀiădah mă bruă sĭt suôr hŏng jih ai tiê djŏ tui si klei khua ñu čiăng, “brei mnơ̆ng ƀơ̆ng huă kơ digơ̆ djŏ mmông” (êlan 45). Jăk mơak yơh kơ dĭng buăl anăn, tơdah khua ñu truh ƀuh ñu ăt hur har hlăm bruă, khua srăng mưn ñu hŏng klei jao kơ ñu bruă prŏng hĭn hŏng bruă klam prŏng hĭn, “khua ñu srăng brei dĭng buăl anăn kiă kriê jih jang mnơ̆ng gơ̆ mâo” (êlan 47).
“Dĭng buăl jhat” mưč kơ klei khua ñu čiăng, lač tui si klei ñu pô mĭn “Khua kâo srăng truh hnui” snăn ñu ngă tă tăn, khăp kơ klei huă mnăm, mjhua klei ñu jing pô kiă kriê duah klei tŭ dưn kơ ñu pô, kƀah klei khăp, ktư̆ juă ayŏng adei. Boh sĭt gơ̆, phung anei jing phung amâo mâo klei đăo ôh, bi êdah hŏng klei hdĭp amâo mdê ôh hŏng phung ka thâo kral Khua Yang, jing msĕ si “phung khua pô hưn êlâo soh”, “pô mtô soh” ti krah phung đăo. Hŏng klei pap, Khua Yang jao bruă klam kơ diñu čiăng kơ diñu dôk sĭt suôr hŏng Khua Yang, mâo mmông găl bi mlih klei hdĭp diñu, ƀiădah tơdah ăt dôk nanao hlăm klei hdĭp amâo mâo djŏ ôh, hruê Khua Yang hriê diñu amâo mĭn ôh Khua Yang “srăng čăm bi rai ñu leh anăn yap ñu mbĭt hŏng phung ai ngăm. Tinăn srăng mâo klei čŏk hia leh anăn klei kriêt êgei” (êlan 51).
Klei yăl dliê anei bi hriăm drei jing phung Khua Yang bi tui leh anăn bi mtlaih leh, msĕ mơh Ñu mtă brei drei dôk sĭt suôr, hur har mă bruă kơ Ñu êjai dôk guôn Ñu lŏ trŭn hriê. Ƀiădah dôk guôn amâo djŏ drei dôk guôn phĭt sa anôk ôh, ƀiădah brei drei hdĭp jăk hŏng klei sĭt suôr, bi leh jih bruă klam drei, khăp leh anăn mă bruă kơ phung ayŏng adei drei djŏ tui si bruă Khua Yang jao. Tơdah drei mă bruă hŏng klei sĭt suôr, leh anăn bi leh jih bruă Khua Yang jao, Khua Yang srăng lŏ hriê kơ drei jing msĕ si sa čô Mtao brei klei mưn, ƀiădah lĕ, tơdah drei amâo uêñ ôh kơ hruê Khua Yang lŏ hriê, knŏng uêñ mĭn kơ drei pô, amâo mâo klei khăp ôh leh anăn dôk kram hlăm klei soh, Khua Yang srăng hriê mmông drei amâo mĭn ôh jing msĕ si sa čô Khua Phat Kđi hŏng klei bi kmhal hlŏng lar hlăm anôk “mâo klei čŏk hia leh anăn klei kriêt êgei”. Akâo Khua Yang đru drei lŏ ksiêm dlăng kơ knuih drei mă bruă kơ Ñu. Êdei anăp drei srăng mă tŭ klei mưn hĕ amâodah tŭ klei bi kmhal tơdah Khua Yang Yêsu lŏ hriê klei anăn tui si klei drei hdĭp hŏng klei đăo leh anăn klei drei mă bruă ară anei hin.
Si ngă drei jing dĭng buăl sĭt suôr leh anăn thâo mĭn hĕ amâodah drei jing dĭng buăl jhat leh anăn soh?
Wah lač: Ơ Khua Yang Pô kiă kriê jih jang mnơ̆ng, Khua Yang thâo leh si klei jing klei hdĭp myang kâo ară anei hin, đru kâo kmhal hĕ kơ klei soh čiăng kơ kâo lŏ dưi jing dĭng buăl sĭt suôr, hur har bi leh jih bruă Khua Yang jao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nêhêmi 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
