Chivkeeb 11:10-32
Nqe cim:
“Tus Tswv uas yog Vajtswv, koj tau xaiv Anplas cia thiab coj nws kev tawm hauv lub nroog Ules uas nyob hauv lub xeev Npanpiloos los; Koj thiaj muab nws tis dua npe tshiab hu ua Anplahas” (Nehemis 9:7)
Lus nug xav:
– Qhov twg yog qhov uas tsimnyog peb yuav tau ua zoo saib nyob hauv kev sau keebkwm cajces txij Xees mus txog Anplas?
– Anplas lub neej pib hauv tsevneeg zoo li cas?
– Vajtswv txojkev npaj tau qhia tshwm li cas nyob hauv ntu Vajluskub no?
Ntu Vajluskub no sau txog keebkwm cajces ntawm Nau-es cov xeebntxwv txij ntawm Xees mus Anplas tiam, txuas ntxiv rau keebkwm tibneeg txij Adas mus txog Nau-es uas sau tseg hauv tshooj 5. Tom qab uas tibneeg ua txhaum thiab raug txim, Vajtswv tau coglus hais tias ib tug neeg hauv tus pojniam cajces yuav kovyeej dab ntxwgnyoog (Chivkeeb 3:15), thiab lo lus cog tseg ntawd yim hnub yim los ze dua thaum peb pom zaj lus hais txog Anplas. Tseeb tiag, hauv kev sau keebkwm cajces no, tshwj Xees tus uas yog Nau-es tus tub, thiab Anplas uas yog yawgkoob ntawm haivneeg dawbhuv, lwm cov npe peb tsis tshua paub, tshwjxeeb yog cov npe hauv Phau Vajluskub qub. Tiamsis cov npe uas peb tsis tau paub, pheej tshaj ntawd coj Vajtswv Txojlus hla tiam neeg no mus rau tiam neeg tod, ua tabpov Vajtswv yeej niaj hnub ua haujlwm dhau txhua tiam neeg.
Daim sau keebkwm cajces dav txij “Xees cajces” (nqe 10) los nqaim zus txog “Telas cajces” (nqe 27). Txij ntawd, sau feem ntau txog Anplas, nws tus pojniam npe hu ua Xalais, tsis muaj menyuam. Anplas yog Telas tus tub, yug thiab loj hlob hauv lub nroog Ules, tebchaws Npanpiloos. Hauv Yausuas 24:2 qhia paub qhov chaw no yog qhov chaw uas Telas pemlom. Nehemis 9:7 hais tias tus Tswv yog tus uas xaiv Anplas thiab coj tawm hauv lub nroog Ules. Tom qab ntawd, Anplas nkawm niamtxiv nrog rau txiv uas yog Telas, tus tub xeebntxwv uas yog Lauj tawm hauv lub nroog Ules mus rau lub tebchaws Kana-as thiab tis npe tshiab rau Anplas hu ua Anplahas. Tiamsis thaum mus txog ntawm Halas ces lawv txawm nyob qhov ntawd. Yog li ntawd, peb pom tau hais tias Anplas yug los hauv ib tsevneeg tsis ruaj khov ntawm sab ntsujplig thiab sab nqaij tawv. Vajtswv xaiv nws ua yawgkoob ntawm Vajtswv haivneeg thiab yog yawgkoob ntawm txojkev ntseeg rau txhua haivneeg, tsis yog Anplahas yog neeg zoo, tiamsis yog Vajtswv txoj koob hmoov hlub xwb.
Dhau qas pua tiam neeg los, tiam no dhau mus rau tiam tod, txawm yog nyob rau lub tsamthawj thiab tibneeg yuav hloov, los Vajtswv txojkev npaj yeej tsis hloov li. Nws yog tus tswj thiab yog tus ua haujlwm hauv txhua tus neeg. Nws xub los nrhiav, los xaiv cov neeg uas Nws xav siv, txawm tus neeg ntawd yuav zoo li cas los xij. Peb cia li ntseeg thiab kaj siab thaum muaj tus Tswv uas yog tus ua raws li Nws hais ua peb tus Tswv.
Thov Vajtswv,
Vajtswv, nyuam yaus ua Koj tsaug vim Koj yeej ua raws li Koj hais thiab ua siab ntev mus ibtxhis. Muab nyuam yaus lub neej tso rau Koj txhais tes, ncaj ncees ua tes haujlwm Koj txib, kom ua tau ib tug tseemceeb rau Koj siv nyob hauv Koj txojkev npaj, qhia txog tus Tswv thiab tej lus tus Tswv hais rau ntau tiam xeebntxwv paub. Nyuam yaus tuav Tswv Yexus Khetos lub npe thov, Amees.
Vajtswv niaj hnub ua raws li Nws hais dhau los ntawm txhua tiam neeg, yog li peb puas ncaj ncees rau tes haujlwm raug txib kom ua tau ib tug tseemceeb nyob hauv Vajtswv txojkev npaj lossis tsis ncaj?
Nyeem Vajluskub hauv peb lub xyoo: Nehemis 10
Kênh Youtube BHKTHN:
