Tơdrong Tơ’bôh 21:1-7
“’Nâu boih đe khan ‘Bok Kei-Dei oei hơdai hăm kon bơngai. Sư oei tŏk-bŏk hăm kon bơngai, na kon bơngai jing kon Sư păng Sư jing Kră Yang kon bơngai. ‘Bok Kei-Dei sut pơgoh đak măt lu sư, lu sư ưh pă lôch dơ̆ng, lu sư ưh pă đei tơdrong nhơ̆m hmoi ơh sơ’ngon dơ̆ng ôh, ưh pă đei tơdrong jĭ-jăn păn hnong, yua kơ chăl arih so hiong tôch boih.” (Tơdrong Tơ’bôh 21:3b-4)
Nơ̆r jet tơchĕng pơwao:
– Tơdrong ‘mêm Kră Yang đei tơ’bôh lu tơdrong tơdra kiơ?
– Yôhan roi tơ’bôh plĕnh teh ‘nao thoi yơ?
– Tơ anih ‘noh Kră Yang wei rong lu bơ̆n liơ?
Tơdrong ‘mêm Kră Yang tơ’bôh pêng tơdrong tơdra noh tơdrong hiơ̆k, pŭ iŏk păng oei hơdai băl juăt dêh. Kră Yang ‘mêm kơ lu bơ̆n păng ling lang hiơ̆k gah tơdrong ‘mêm, tơdrong kăl wă, Kră Yang băt kơ lu bơ̆n kăl wă kiơ adrol kơ bơ̆n krao apinh (Mathiơ 6:8, 32).
Kră Yang ‘Bok Kei-Dei pŭ iŏk ăn Kon Pôm Sư Kră Yang Yêsu chu lôch tơ ‘long pơglang wă dŏng lu bơ̆n. Tuch luch Kră Yang hơmet anih păng chông ba lu bơ̆n oei hơdai Sư ling lang (Yôhan 14:3).
Pơlei ‘lơ̆ng bơih anih pơkeh tôm tơ’bôh tơdrong ‘mêm Kră Yang ‘măn kơ lu bơ̆n.
Đơ̆ng rŏng kơ minh rơbâu sơnăm Kră Yang Yêsu pơgơ̆r tơ ala teh hiôk hơđơ̆ng, jơ̆ minh chăl ‘nao ‘lơ̆ng tôm, wă khan plĕnh teh ‘nao (Êsai 65:17), noh pơlei ‘lơ̆ng! ‘Noh ưh kơ trŏ pơwao đĕch mălei jơ̆ minh anih đei tơbăt rơđah tơpă, đei dur pơlei Jêrusalem ‘nao, jơ̆ anih Kră Yang Yêsu hơmet lê̆ bơih, hơmet ăn kơ kon pơlei pơla Sư (Yôhan 14:2-3). ‘Noh jơ̆ anih Kră Yang hơmet jing ‘nao ‘lơ̆ng tôm (trong 5). ‘Lơ̆ng thoi adruh ‘nao, tah pơhrôp hơbăn ao ‘lơ̆ng wă tơ oei băl (trong 2). Kră Yang ưh kơ sĭ ăn pơlei ‘lơ̆ng đĕch ôh, mălei Sư ăn kơ lu bơ̆n tơdrong hiôk hơđơ̆ng, chơt hiôk, lăp đon, liĕm akâu, đak nhă, păng dôm tơmam bơ̆n đei, Kră Yang pơkă khan Sư gô pơm Kră Yang ‘Bok Kei-Dei lu bơ̆n, na lu bơ̆n jing kon Sư (trong 4-7). Dôm tơmam tơ ala teh âu ưh kơ đei gĭt sot đunh păng kơjăp, mălei đei gĭt ling lang hloi ‘bơ̆t “Plĕnh teh ‘nao”. Tơdrong noh đei pơlung bơ̆n yua kơ Kră Yang bơih ‘Bok Kei-Dei ‘mêm, ling lang hiơ̆k dôm tơdrong bơ̆n kăl wă.
“’Nâu bơih đe khan ‘Bok Kei-Dei oei hơdai hăm kon bơngai, Sư oei tŏk bŏk hăm kon bơngai, na kon bơngai jing kon Sư, na Sư jing Kră Yang kon bơngai (trong 3). Kră Yang gô wei rong lu bơ̆n thoi minh ‘nu pơtao iơ̆m dim, ‘Bă ‘mêm kơ bơ̆n. Sư gô sŭt đak măt, ưh kơ wă kơ lu bơ̆n ơh sơ’ngon, nhơ̆m hmoi, kư̆m ưh kơ đei tơdrong lôch yua kơ ưh pă đei tơdrong yoch păng đei Kră Yang oei hơdai. ‘Noh bơih anih tơdrong ‘mêm oei oei ling lang yua kơ “Bơngai bu ‘mêm kơ ‘Bok Kei-Dei hăm bôl buăl sư, sư ‘mêm tơpă ling lang ưh kơ layơ tôch, păng athei băt ‘mêm kơ ‘Bok Kei-Dei hăm bôl buăl bơ̆n kăl hloh (I Kôrintô 13:8, 13). Sơ̆p hla bơar ‘Bok Kei-Dei bơtho blŭng đơ̆ng bre ‘bok Ađam păng yă Ewơ. Sơ̆p hla bơar nơ̆r ‘Bok Kei-Dei pơtôch đơ̆ng minh pôm hnam dơnŏ ‘mêm băl đơ̆ng Kră Yang Yêsu dŏng pơklaih păng Khul bơngai lui kơ Kră Yang jơ̆ thoi “Adruh wă oei” (Tơdrong Tơ’bôh 21:9). Bơnê kơ ‘Bok Kei-Dei yua kơ bơ̆n oei lăm Sư, tơ anih plĕnh teh ‘nao, tơdrong ‘mêm Kră Yang oei oei ling lang lăm rim ‘nu kơ lu bơ̆n.
Ơ Kră Yang mă ‘mêm kơeng, bơnê kơ Ih đei ăn plĕnh teh ‘nao kơ kon pơlei pơla Ih. Apinh Ih tơgŭm inh băt hơmet tơdrong arih ‘lơ̆ng rơgoh, arih băt ‘mêm mơnat, wă kơ hơmet sơng iŏk tơdrong ‘mêm ling lang đơ̆ng Ih ăn, krao khan yua anăn Kră Yang Yêsu Krist, Amen.
Lu bơ̆n gô tơplih tơdrong kiơ kơplah bơ̆n pơhrăm băt gah tơdrong ‘mêm ling lang đơ̆ng Kră Yang tơ pơlei ‘lơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 110-111
Kênh Youtube BHKTHN:
