Klei Aê Diê Blŭ: Klei Bi Êdah 21:1-7
Êlan kliăng: “Ñu srăng dôk mbĭt hŏng digơ̆, leh anăn digơ̆ srăng jing phung ƀuôn sang Ñu. Leh anăn Aê Diê pô srăng dôk mbĭt hŏng digơ̆. 4 Ñu srăng sut jih êa ală mơ̆ng ală digơ̆, leh anăn amâo srăng lŏ mâo klei djiê ôh, leh anăn amâo srăng lŏ mâo klei kơŭ kyăm, klei hia, amâodah klei ruă ôh, kyuadah jih jang mnơ̆ng tal êlâo êgao tuč leh.” (Klei Bi Êdah 21:3b-4)
Klei êmuh ksiêm mĭn: Klei khăp Khua Yang bi êdah hŏng ya klei bi knăl? Si jing adiê mrâo lăn ala mrâo Khua ƀĭng kna Y-Yôhan hưn mdah? Ti anôk anăn, si klei Khua Yang kiă kriê drei?
Klei khăp Khua Yang bi êdah hŏng tlâo klei bi knăl, anăn jing klei mđing uêñ, klei săn asei mlei leh anăn dôk hrăm mbĭt sĭt suôr. Khua Yang khăp kơ drei leh anăn mđing uêñ nanao kơ klei khăp, kơ klei drei kƀah. Ñu thâo ya klei drei kƀah êlâo kơ drei akâo (Y-Mathiơ 6:8, 32). Ñu săn asei mlei brei Anak Ñu mâo knŏng Sa Čô jing Khua Yang Yêsu tŭ klei djiê ti kyâo bi kal čiăng bi mtlaih drei. Knhal tuč, Khua Yang mprăp mkra anôk dôk leh anăn ba drei nao dôk mbĭt hŏng Ñu nanao hlŏng lar (Y-Yôhan 14:3). Ƀuôn Jăk yơh jing anôk bi leh kluôm ênŭm hĭn jih jang klei bi knăl kơ klei khăp Khua Yang hŏng drei.
Êdei kơ sa êbâo thŭn Khua Yang Yêsu kiă kriê ti lăn ala hlăm klei êđăp ênang, jing sa gưl mrâo kluôm dhuôm, pia jing adiê mrâo lăn ala mrâo (Y-Êsai 65:17), anăn jing Ƀuôn Jăk! Klei anăn amâo djŏ jing klei bi mĭn ôh ƀiădah jing sa anôk hưn mdah leh hŏng klei klă nik, mâo ƀuôn doh jăk Yêrusalem mrâo, jing anôk Khua Yang mprăp mkra kơ phung anak ƀuôn sang Ñu (Y-Yôhan 14:2-3). Anăn jing anôk Khua Yang hrih mjing mrâo kluôm dhuôm (êlan 5), siam msĕ si “sa čô mniê čiăng bi tuôm hŏng ung ñu srăng dôk” (êlan 2). Khua Yang amâo knŏng brei Ƀuôn Jăk, Ñu brei kơ drei mbĭt hŏng klei êđăp ênang, klei hơ̆k mơak, klei hrăp ai tiê, klei suaih ktang, êa hdĭp leh anăn jih jang mnơ̆ng jing ngăn dưn, Khua Yang ƀuăn Ñu srăng jing Aê Diê drei, leh anăn drei srăng jing phung anak Ñu (êlan 4-7). Jih jang mnơ̆ng ti lăn ala yap amâo mâo ênoh yuôm, ƀiădah mâo ênoh yuôm hlŏng lar hlăm “adiê mrâo lăn ala mrâo”. Klei anăn bi mđĭ ai drei kyuadah Khua Yang jing Aê Diê klei khăp, mđing uêñ nanao kơ klei drei kƀah.
“Nĕ anei, Aê Diê dôk mbĭt hŏng phung mnuih. Ñu srăng dôk mbĭt hŏng digơ̆, leh anăn digơ̆ srăng jing phung ƀuôn sang Ñu. Leh anăn Aê Diê pô srăng dôk mbĭt hŏng digơ̆.” (êlan 3). Khua Yang srăng kiă kriê drei msĕ si sa čô Mtao jăk, Ama klei khăp. Ñu sut jih êa ală, amâo brei drei ruă knap, čŏk hia, wăt amâo mâo klei djiê ôh, kyuadah amâo lŏ adôk klei soh leh anăn mâo Khua Yang dôk mbĭt. Anôk anăn srăng jing anôk klei khăp kiă kriê hlŏng lar kyuadah “Klei khăp amâo tuôm tuč ôh” leh anăn jing klei prŏng hĭn kơ jih jang (I Kôrantô 13:8, 13). Klei Aê Diê Blŭ kčưm dơ̆ng hŏng sa gŏ sang khăp hơiêng, doh jăk ti krah Y-Ađam leh anăn H-Êwơ. Klei Aê Diê Blŭ bi ruê̆ hŏng gŏ sang klei khăp ti krah Khua Yang Yêsu Pô Bi Mtlaih leh anăn “mô̆” jing Phung Sang Aê Diê Ñu (Klei Bi Êdah 21:9). Bi mni lač jăk kơ Aê Diê kyuadah dôk hlăm Ñu, anôk adiê mrâo lăn ala mrâo, klei khăp Khua Yang kiă kriê hlŏng lar hlăm grăp čô drei.
Ya klei brei drei srăng bi mlih tơdah hriăm thâo săng leh kơ klei khăp hlŏng lar Khua Yang ti Ƀuôn Jăk?
Wah lač: Ơ Ama khăp hơiêng! Bi mni lač jăk kơ Khua Yang brei leh adiê mrâo lăn mrâo kơ phung anak ƀuôn sang Ih. Akâo Khua Yang brei kâo thâo bi doh kâo pô doh jăk, dôk hdĭp hŏng klei khăp čiăng kăp drông anôk klei khăp hlŏng lar Khua Yang brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 110-111
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
