Tshwmsim 20:11-15
Nqe cim:
“…Luag txiav txim rau cov neeg uas tuag lawm raws li lawv tes haujlwm uas twb muab sau cia rau hauv tej ntawv ntawd lawm.” (Tshwmsim 20:12b)
Lus nug xav:
– Vajluskub qhia ua ntej li cas txog Vajtswv txojkev txiav txim?
– Cov neeg uas tsis muaj npe sau rau hauv Phau Ntawv Txojsia yuav raug txim li cas?
– Peb tau qhia thiab ceebtoom licas tabmeeg Vajtswv txojkev ncaj ncees?
Vajluskub yog phau ntawv uas qhia ua ntej txog hnub kawg kom xaus Vaj Ntsujplig tes haujlwm uas qhuab ntuas neeg ntiajteb txog kev txhaum, kev ncaj ncees thiab kev txiav txim uas yuav los (Yauhas 16:8). Rooj txiav txim rau tag nrho tibneeg qhia tshwm Vajtswv txojkev ncaj ncees, hos qhov uas Vajtswv qhia ua ntej txog hnub ntawd kuj qhia tshwm Nws txojkev hlub uas nyob mus ibtxhis. Tswv Yexus twb ceebtoom ua ntej hais tias: “Cov neeg ntawd yuav raug txim mus ibtxhis li, tiamsis cov neeg ncaj ncees yuav tau txojsia ntev dhawv mus ibtxhis tsis kawg” (Mathais 25:46). Nyob hauv lub ntiajteb no muaj kev tsis ncaj ncees, kev dag ntxias thiab kev txhaum ntau kawg nkaus. Tus Vajtswv uas ncaj ncees yuav tsis cia tej ntawd dhau mus yam tsis raug txiav txim!
Kev txiav txim pib thaum Vajtswv zaum saum lub zwmtxwv loj thiab dawb paug los txiav txim rau tag nrho tibneeg. “Lub zwmtxwv loj uas dawb paug” qhia txog Vajtswv lub hwjchim uas loj tshajplaws thiab Nws txojkev dawb huv uas zoo tag nrho. Tsis muaj leejtwg khiav dim lub rooj kev txiav txim no. Yam uas siv los txiav txim yog tej uas txhua tus tau ua los lawm (nqe 13). “Tes haujlwm uas lawv tau ua” yog hais txog kev hais lus, kev xav, lub homphiaj thiab lub siab thaum ua tej ntawd thiab. Tswv Yexus hais tias: “Nej yuav raug txim lossis tsis raug, yog nyob ntawm tej lus uas nej hais” (Mathais 12:37). Tus Txiav Txim muaj txhua yam pov thawj sau cia rau hauv “tej phau ntawv” (nqe 12). Nws txiav txim raws li qhov ncaj ncees thiab raws li Vajtswv txojcai “uas twb muab sau cia rau hauv tej ntawv ntawd lawm”, thiab hnub txiav txim tsuas muaj ib zaug xwb (Henplais 9:28). Tsis muaj leejtwg muaj cuabkav siv kev zoo los them tau kev txhaum lossis tiv thaiv tau nws tus kheej ntxiv lawm, vim tej kev ncaj ncees uas tibneeg khav hais tias zoo, ntawm Vajtswv xubntiag tsuas zoo ib yam li tej phuam qias neeg xwb. Tus cevlus Yaxayas hais tias: “Peb txhua tus puavleej tau ua txhaum huv tibsi; txawm yog tej haujlwm zoo uas peb ua los puavleej qias zoo ib yam li txoj phuam uas tsis tau muab ntxhua” (Yaxayas 64:6).
Lub txim hu ua “txojkev tuag zaum ob” yog rau cov neeg uas tsis muaj npe sau rau hauv Phau Ntawv Txojsia (nqe 15). Cov neeg raug txim yuav tsis tuag lawm, kuj tsis yog tsaug zog li Vajluskub siv qee zaus los hais txog kev tuag (Mathais 9:24), tiamsis lawv yuav raug muab pov rau hauv ntuj tawg mus ibtxhis. Vajluskub hais meej tias: “Lub ntuj tawg ntawd yog txojkev tuag zaum ob” (nqe 14). Nyob hauv qhov chaw ntawd tsis muaj kev so lossis pw tsaug zog, tiamsis yog qhov chaw “quaj tom hniav qawv” mus ibtxhis (Mathais 13:42, 50). Tsuas yog cov uas muaj npe sau rau hauv Phau Ntawv Txojsia, yog cov uas ntseeg thiab txais Tswv Yexus Khetos, lawv thiaj tau txais kev cawmdim, tsis muaj kev txiav txim rau lawv lawm (Loos 8:1).
Zaj kawm no ceebtoom peb hais tias Vajtswv yog Tus ncaj ncees kawg nkaus. Tsis txhob muaj leejtwg saib tsis taus lossis thuam Nws txojkev ncaj ncees. Vajtswv yuav txiav txim rau txhua tus raws li qhov ncaj ncees. Thov kom peb ua neej ncaj ncees, ntseeg thiab vamkhom tus Tswv, thiab qhia tshwm Nws txojkev ncaj ncees hauv peb tej lus hais, kev xav thiab tej haujlwm uas peb ua txhua hnub.
Thov Vajtswv,
Leej Txiv tus ncaj ncees! Thov Koj tuav nyuam yaus kom nyob ruaj hauv txojkev ntseeg thiab Tswv Yexus Khetos txojkev ncaj ncees, kom thaum txog hnub txiav txim, nyuam yaus sawv ntawm Koj lub zwmtxwv nrog kev kaj siab lug thiab muaj kev cia siab nyob hauv Koj. Nyuam yaus tuav Tswv Yexus Khetos lub npe thov, Amees.
Peb npaj tus kheej li cas rau hnub uas yuav sawv ntawm lub zwmtxwv loj thiab dawb paug?
Nyeem Vajluskub hauv peb lub xyoos: Phau Ntawv Nkauj 108-109
Kênh Youtube BHKTHN:
