Klei Aê Diê Blŭ: I Y-Timôthê 6:3-10
Êlan kliăng: “Kyuadah klei khăp kơ prăk jing agha kơ jih jang klei jhat; leh anăn kyua klei tluh anăn đa đa klah đuĕ leh mơ̆ng klei đăo leh anăn bi truh kơ ai tiê diñu lu klei rŭng ênguôt” (I Y-Timôthê 6:10)
Klei êmuh ksiêm mĭn: Si klei mđĭ ai kơ klei mtô leh anăn knuih hdĭp phung khua pô mtô soh? Čiăng ñĕ kơ klei mplư msĕ diñu, si ai tiê brei phung đăo hdĭp? Si hdră drei mñă kơ drei pô hdĭp mơak mñai?
Knhal tuč hră I Y-Timôthê 6:2b-21 mâo klei msĕ prŏng snăk hŏng kdrêč mphŭn pŏk hlăm hră (I Y-Timôthê 1:3-20), jih dua mâo sơăi kdrêč čih kơ phung khua pô mtô soh, mâo sơăi klei mtă kơ Khua pô mtô hlăk ai Y-Timôthê djŏ tuôm kơ klei mtô soh, leh anăn jih dua iêô mthưr ñu “bi blah bĕ klei bi blah jăk kyua klei đăo” hlăm klei bi blah hŏng klei đăo soh (I Y-Timôthê 1:18; 6:12).
Tơdah hlăm kdrêč tal êlâo hră, Khua ƀĭng kna Y-Pôl lač kơ phung mtô soh jing phung khăp “ñu bŏ hŏng klei mgao, leh anăn ñu amâo thâo sa mta klei ôh”, khăp jing nai, snăn êlâo kơ mjưh hră, ñu lŏ dơ̆ng lač kơ klei diñu mtô “amâo hlue si klei tŭ dưn Khua Yang Yêsu”, kơ bruă diñu khăp “bi msao” (êlan 5). Mdê hŏng akŏ hră, tinei, Khua ƀĭng kna Y-Pôl nao êlam hĭn kơ bruă ngă diñu, anăn jing “mĭn kơ klei mpŭ kơ Aê Diê jing êlan arăng dưi ƀơ̆ng prăk”, “khăp kơ mdrŏng” (êlan 5, 9). Diñu jing phung čiăng mâo lu ngăn drăp čiăng hdĭp jăk mơak leh anăn ƀuh pô mâo ênoh yuôm. Prăk amâo jhat ôh, ƀiădah khăp kơ prăk “jing phŭn agha kơ jih jang klei jhat”, kyua prăk mah ngă kơ drei tui tiŏ ñu, leh anăn mjing pô jing hlŭn. Boh tŭ jing Khua ƀĭng kna Y-Pôl ƀuh hlăm boh sĭt, “đa đa klah đuĕ leh mơ̆ng klei đăo” (êlan 10). Phung mtô soh jing klei bi mklă kơ bruă arăng kyua ră kơ prăk lui hĕ klei đăo djŏ klă kơ Aê Diê čiăng tui tiŏ klei mtô soh čhuai. Diñu mjing klei huĭ mpŭ leh anăn Klei Mrâo Mrang Jăk jing kdrăp mnơ̆ng duah prăk mah kơ pô. Hlăm boh sĭt ăt mâo mnuih mphŭn mă bruă kơ Aê Diê hŏng klei mĭn djŏ klă, mngač, ƀiădah leh anăn lui bruă klam, kjham hĭn lui Aê Diê kyua djŏ tuôm kơ prăk mah.
Si ngă čiăng ñĕ kơ klei mplư prăk mah? Khua ƀĭng kna Y-Pôl lač leh klă hŏng phung dôk ngă bruă klam, leh anăn phung đăo drei, klei thâo čiăng hdĭp klei hdĭp jăk mơak, wăt tơdah mâo lu prăk amâodah ƀiă prăk, jing klei mpŭ hŏng klei jăk mơak, jing ƀuh djăp ênŭm (êlan 6-8). Si ngă čiăng thâo pô djăp? Tơdah klei čiăng klă klơ̆ng dưi mâo, “djăp ƀơ̆ng, djăp hơô” jing djăp leh. Bi msĕ hŏng pô mkăn srăng ngă kơ drei dleh ƀuh mơak ai tiê, amâo ƀuh djăp ênŭm ôh; leh anăn anăn yơh jing klei mplư ngă kơ anak mnuih drei tui tiŏ prăk mah, mdrŏng sah “bi truh kơ ai tiê diñu lu klei rŭng ênguôt” (êlan 10). Tơdah hdĭp huĭ mpŭ kơ Aê Diê, drei srăng mơak kơ ya mnơ̆ng Aê Diê brei leh, leh anăn klei Aê Diê brei jing djăp ênŭm nanao hŏng klei čiăng hjăn pô.
Prăk mah dôk jing klei mđĭ ai prŏng hĭn kơ drei mă bruă mơ̆?
Wah lač: Ơ Khua Yang, ênưih snăk kâo tui tiŏ prăk mah hrô kơ tui tiŏ knuih hdĭp huĭ mpŭ leh anăn hơ̆k mơak. Akâo kơ Ih đru kâo klă sĭt ksiêm dlăng ai tiê pô, akâo kơ Ih đru kâo jĕ giăm leh anăn hlue ngă Klei Aê Diê Blŭ čiăng hdĭp hơ̆k mơak leh anăn amâo tui tiŏ prăk mah ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com\
Kênh Youtube BHKTHN:
