I Timôthê 6:3-10
“Bơngai bu hăt kơ chă jên, sư gô pơm tôm tơdrong kơnê̆. Đei bơngai lu mơ’nah hăt kơ chă jên ling lang na sư jing achăng tơdrong lui sư păng sư đei lơ tơdrong ơh sơ’ngon.” (I Timôthê 6:10)
Nơ̆r jet tơchĕng pơwao:
– Pơtrŭt ăn kơ nơ̆r bơtho păng tơdrong arih lu bơngai bơtho ưh kơ trŏ noh kiơ?
– Wă kơ huay kơ puh tơdrong pơhlŭ thoi lu sư, bơngai lui kơ Kră Yang athei arih hăm jơhgơ̆m đon thoi yơ?
– Bơ̆n tơ’blŏk kơ akâu kơdih arih hiôk ‘lơ̆ng thoi yơ?
Tuch luch kơthơ I Timôthê 6:2-21 đei tơdrong lei lăi băl dêh hăm tơdrong pơih blŭng a kơthơ (I Timôthê 1:3-20), ‘bar tơdrong ‘noh đei pơma ‘bơm gah lu bơngai bơtho ưh kơ trŏ, đei nơ̆r bơtho ăn kơ Timôthê bơngai bơtho oei moh, tơ’blŏk kơ sư gah tơdrong bơtho ưh kơ trŏ. Păng ‘bar ‘măng tă kơ athei sư “adrin tơblah kĕ jei” lăm tơdrong tơblah hăm tơdrong lui ưh kơ trŏ (I Timôthê 1:18; 6:12).
Dah lăm blŭng a kơthơ ‘bok Pôl roi lu bơngai bơtho ưh kơ trŏ jơ̆ lu bơngai ‘maih “chă pơjah pơjăng păng roi hơ’mon kư̆ kă”, ‘maih pơm ‘bok bơtho, na adrol kơ wă chih pơtôch kơthơ, sư oei pơma gah tơdrong bơtho lu sư “ưh kơ kiơ̆ kơ nơ̆r đei yua Kră Yang Yêsu bơtho”, gah tơdrong lu sư ‘maih “pơjah pơjăng ling lang” (trong 5). Phara kơ blŭng a kơthơ, jơ ‘nâu, ‘bok Pôl pơma ‘bơm tơdrong pơtrŭt jơhgơ̆m lu sư noh jơ̆ “pơm thoi bơngai lui, đơ̆ng noh na chă bơtho pơgŏ đe na gơh mơdrŏng “wă chă mơdrŏng” (trong 5, 9). Lu sư jơ̆ bơngai wă kơ đei lơ mŭk tơmam wă kơ arih hiôk dang ei păng wă chă pơang akâu kơdih đĕch. Jên ưh kơ đei kơnê̆ ôh, mălei bơngai bu hăt kơ chă jên “sư gô pơm tôm tơdrong kơnê̆”, yua kơ jên pơm kơ bơ̆n nŏng kơ chă sư, păng bơ̆n jing đĭch sư. Tuch luch ‘bok Pôl khan. “Đei bơngai lu mơ’nah hăt kơ chă jên ling lang na sư jing achăng tơdrong lui sư”. (trong 10). Lu bơngai bơtho ưh kơ trŏ ‘nâu jơ̆ tơ’bôh tơdrong kon bơngai bơ̆n yua kơ ham kơ jên na achăng lê̆ tơdrong lui kơ Kră Yang trŏ tơpă wă kơdâu kiơ̆ dôm tơdrong bơtho ưh kơ trŏ. Lu sư yua iŏk tơdrong lui păng chă bơtho pơgŏ đe na gơh mơdrŏng. Lăm tơdrong arih dang ei kư̆m đei bơngai bơ̆jang kơ Kră Yang blŭng a hăm jơhngơ̆m ‘lơ̆ng tơpăt, ‘lơ̆ng rơgoh, mălei đơ̆ng rŏng kơ noh jing achăng lê̆ tơdrong jang kơ Kră Yang, phŏ kư̆m achăng lê̆ Kră Yang hloi yua kơ ‘bơm jên tơmam.
Pơm thoi yơ wă kơ weh đơ̆ng tơdrong pơhlŭ ham kơ jên tơmam? ‘bok Pôl pơma hơđăl dêh hăm lu bơngai mă oei bơ̆jang kơ Kră Yang, păng đĭ đăng Khul Bơngai Lui bơ̆n. Sư khan wă kơ tơdrong arih đei pŭn hiôk, mă đơ̆ng đei jên lơ dah tŏ sĕt, dah bơ̆n lui tơpă đĭ jơhngơ̆m, noh kư̆m dang bơ̆n mơdrŏng mơ̆n yua kơ jơhngơ̆m bơ̆n hiôk ‘lơ̆ng păng sư bơih, noh tôm bơih (trong 6-8). Pơm thoi yơ wă kơ băt kơ bơ̆n tôm bơih? Kơplah bơ̆n đei tôm tơdrong kăl wă “đei tơmam sa păng abĕn ao hrŭk” dôm noh ‘lơ̆ng bơih. Pơting hăm bơngai nai gô pơm kơ jơhngơ̆m bơ̆n ưh kơ hiôk ôh. Ưh kơ đei layơ khan tôm bơih; păng noh bơih tơdrong pơhlŭ pơm kơ lu bơngai kơdâu kiơ̆ kơ jên tơmam, tơdrong mơdrŏng “na lu sư đei lơ tơdrong ơh sơ’ngon”. (trong 10). Mưh bơ̆n lui tơpă kơ Kră Yang hăm đĭ jơhngơ̆m, bơ̆n gô hiôk lăp đon gah dôm tơdrong kiơ mă Kră Yang ăn kơ bơ̆n, păng tơdrong Kră Yang ăn ling lang kơ tôm mah hăm tơdrong bơ̆n kăl wă.
Ơ Kră Yang,‘bônh dêh inh hăt kơ chă jên trŏ sư athei lui tơpă hăm đĭ jơhngơ̆m păng jơhngơ̆m hiôk ‘lơ̆ng. Apinh Ih tơgŭm inh băt tơchĕng lăng lăm akâu kơdih, apinh Ih ăn kơ inh oei jê̆ Ih păng pơm kiơ̆ nơ̆r Kră Yang wă kơ arih hiôk ‘lơ̆ng păng huay kơ puh tơdrong pơhlŭ ham kơ jên tơmam. Krao khan yua anăn Kră Yang Yêsu Krist, Amen.
Jên tơmam oei đei pơtrŭt bơ̆n tih dêh lăm tơdrong bơ̆n bơ̆jang dah ưh?
Đŏk Sơ̆p hla bơar ‘Bok Kei-Dei lăm pêng sơnăm: Esơra 7
Kênh Youtube BHKTHN:
https://www.youtube.com/c/bhkthn
