1 Timautes 6:3-10
Nqe cim:
“Qhov uas neeg ntshaw nyiaj txiag yog ib qho uas ua rau neeg ua txhua yam phem. Muaj qee leej tso Vajtswv tseg lawm, thiab lawv rov ua rau lawv raug ntau yam kev txomnyem twb yog vim lawv xav tau nyiaj ntau heev” (1 Timautes 6:10)
Lus nug xav:
– Lub zog rau cov xibhwb cuav tej lus qhia thiab kev ua neej yog dabtsi?
– Cia kom tsis raug dag ntxias li lawv, tus ntseeg Vajtswv yuav tsum ua neej nrog rau txojkev xav twg?
– Peb ntuas yus tus kheej kom ua neej txaus siab los ntawm txoj hau kev twg?
Feem xaus tsab ntawv 1 Timautes 6:2b-21 muaj qhov zoo sib thooj loj heev ntawm feem qhib thawj tsab ntawv (1 Timautes 1:3-20), ob qhov puavleej nkag mus rau kev sib tham txog cov xibhwb cuav, thiab puavleej muaj cov lus ntuas rau xibhwb hluas Timautes txog tej kev qhia cuav, thiab ob qhov puavleej nqua hu nws “siv zog khiav kom kawg koj lub zog” hauv kev ua tsov rog nrog kev ntseeg cuav (1 Timautes 1:18; 6:12).
Yog feem qhibthawj ntawm tsab ntawv, timthawj Paulus piav cov xibhwb cuav yog cov uas nyiam “tej dabneeg thiab lawv cov yawgkoob tej npe uas sau cia rau hauv ntawv uas lawv hais tsis paub tas”, nyiam tau ua xibhwb, ces thaum xaus tsab ntawv, Paulus rov qab hais txog lawv tej kev qhia “tsis raws li Tswv Yexus tej lus uas muaj nqis”, yam uas lawv nyiam yog kev “sib cav sib ceg” (nqe 5). Txawm li feem xubthawj, ntawm no, timthawj Paulus mus tob rau lawv lub homphiaj, ntawd yog lawv “saib kev los ntseeg Vajtswv yog txojkev yuav ua tau ntau yam” “ntshaw npluanuj” (nqe 5,9). Lawv yog cov neeg uas nyiam muaj khoom nyiaj txiag qhov txhia ntau kom ua neej tau zoo thiab saib pom yus muaj nqis. Nyiaj tsis phem, tiamsis lub siab ntshaw “…yog ib qho uas ua rau neeg ua txhua yam phem”, vim nyiaj txiag ua rau peb caum nws, thiab muab peb hloov ua nws qhev. Qhov kawg timthawj Paulus pom muaj tseeb, vim nyiaj “Muaj qee leej tso Vajtswv tseg lawm” (nqe 10). Cov xibhwb cuav no yog timkhawv rau qhov uas vim ntshaw nyiaj tso txojkev ntseeg tseeb ntawm Vajtswv tseg thiab mus caum tej lus qhia cuav. Lawv muab txojkev ntseeg thiab Txojmoo Zoo los ua txoj hau kev nrhiav noj rau lawv tus kheej. Qhov tseeb tiag yeej muaj cov neeg pib ua Vajtswv haujlwm los ntawm lub homphiaj tsimnyog, ncajncees, tiamsis tom qab ntawd tso haujlwm tseg, tsis tas li ntawd xwb tseem txog qib tso uas Vajtswv tseg vim nyiaj txiag thiab.
Yuav ua li cas kom peb zam dhau lub vojhlua cuab kev ntshaw nyiaj? Timthawj Paulus hais meej heev rau cov ua Vajtswv haujlwm thiab cov ntseeg hais tias haukev kom ua neej tau koob hmoov, txawm muaj nyiaj ntau lossis muaj tsawg, yog muab siab rau ntseeg thiab paub txaus siab, ces peb pom muaj txaus lawm (nqe 6-8). Yuav ua li cas kom paub yus muaj txaus? Thaum uas muaj txaus tej yam uas yus cheem tsum, “txaus noj, txaus hnav” txhais hais tias yog txaus lawm. Yog muab yus piv rau lwm tus yuav ua rau peb tsis yoojyim txaus siab, tsis muaj hnub yuav hnov txaus; thiab ntawd yog lub vojhlua uas ua coob leej caum raws nyiaj txiag, npluanuj “rov ua rau lawv raug ntau yam kev txomnyem twb yog vim lawv xav tau nyiaj ntau heev” (nqe 10). Thaum peb ua neej muab siab rau ntseeg, peb yeej yuav txaus siab rau tej uas Vajtswv pub rau yus, thiab yam uas Vajtswv pub yeej txaus rau yus kev cheem tsum lawm.
Thov Vajtswv,
Vajtswv, nyuam yaus yoojyim poob rau kev caum nyiaj txiag thiab npluanuj. Thov pab nyuam yaus ncajncees tshuaj xyuas nyuam yaus lub siab, thov pab nyuam yaus nyob zeb thiab tag xyaum raws li Koj Txojlus qhia kom paub ua neej txaus siab thiaj tsis mag lub vojhlua kev ntshaw nyiaj. Nyuam yaus tuav Tswv Yexus Khetos lub npe thov, Amees.
Nyiaj txiag puas yog lub homphiaj uas koj tabtom nrhiav?
Nyeem Vajluskub hauv peb lub xyoos: Exalas 7
Kênh Youtube BHKTHN:
