Klei Aê Diê Blŭ: Y-Mathiơ 24:32-35
Êlan kliăng: “Msĕ snăn mơh, tơdah diih ƀuh jih klei anăn, diih srăng thâo kơ Anak Mnuih giăm truh leh, Ñu dôk leh ti anăp ƀăng bhă.” (Y-Mathiơ 24:33)
Klei êmuh ksiêm mĭn: Si rup Khua Yang Yêsu yua bi msĕ hŏng hruê Khua Yang lŏ hriê? Ya klei Khua Yang čiăng kơ phung khua ƀĭng kna brei mđing? Ya klei brei drei ngă hlăk êjai dôk čang guôn hruê Khua Yang lŏ hriê?
Khua Yang Yêsu yua rup ana hra hlăm yan bhang čiăng bi msĕ hŏng klei Ñu lŏ hriê. Hlăk ana hra mâo kƀiêng mda leh anăn knăt hla mrâo, bi knăl kơ yan bhang giăm truh. Ăt snăn mơh, tơdah dlăng kơ klei bi knăl Khua Yang lač leh hlăm Y-Mathiơ kdrêč 24, drei thâo kơ wưng Khua Yang Yêsu lŏ hriê giăm truh leh. Boh blŭ “thâo” hlăm êlan 32-33 jing klei thâo săng kơ klei Khua Yang mtô leh, klă sĭt thâo săng klei Aê Diê čiăng. Drei amâo djŏ knŏng thâo hŏng klei mĭn amâodah thâo hlăm klei hriăm ôh ƀiădah klă sĭt thâo klei yuôm bhăn leh anăn dôk hdĭp hlăm klei kpĭ mjuăt yang mngăt jăk čiăng dôk guôn hruê Khua Yang Yêsu lŏ hriê.
Khua Yang čiăng kơ phung ƀĭng kna brei mđing tơdah mâo klei bi knăl mơ̆ng klei mtô luar, yan diê ngă, klei ruă tưp truh, klei bi blah, klei ngă jhat kơ phung đăo hŏng lu klei lui wir …, snăn drei thâo Khua Yang Yêsu “giăm hriê”, Ñu dôk ti anăp “ƀăng bhă” (êlan 33). Phung ƀuôn sang Aê Diê ruah srăng hưn bi sĭt kơ klei hưn êlâo kơ klei Ñu lŏ hriê, kyua tơdah Khua Yang Yêsu lŏ hriê klă sĭt čiăng drông Phung Sang Aê Diê snăn hruê kăm tal kjuh pluh srăng mphŭn dơ̆ng. Khua Yang Yêsu kđăm kơ klei Ñu lač leh hŏng klei blŭ: “Adiê leh anăn lăn ala srăng êgao tuč, ƀiădah klei kâo blŭ amâo srăng êgao tuč ôh”(êlan 35), anei jing klei Aê Diê rơ̆ng sĭt suôr jih jang klei hưn êlâo kơ klei Khua Yang Yêsu lŏ hriê leh anăn hruê knhal tuč srăng truh bi sĭt hŏng klei kluôm ênŭm.
Tơdah dlăng hlăm klei rŭng răng dlông rŏng lăn dôk găn ƀrư̆ đĭ kơ hnơ̆ng leh anăn kơ ênoh, drei thâo hruê Khua Yang Yêsu hriê giăm snăk. Yan adiê ƀrư̆ bi mlih êgao hnơ̆ng, lu klei yan adiê ngă, adiê không amâo mâo yan leh anăn êa lip mâo hlăm lu anôk, klei ruă tưp hmăi kơ kluôm rŏng lăn, klei bi blah plah wah dŭm djuê ana ƀrư̆ mâo nanao leh anăn ktang hĭn. Hĭn mơh, brei drei klă sĭt thâo kral Khua Yang leh anăn kriê pioh klei bi mguôp hŏng Ñu êlam hĭn, đăm ôh knŏng hlue msĕ si klei mưng amâodah djă pioh klei bhiăn klei đăo ƀiădah brei bi mguôp kjăp hlăm Khua Yang leh anăn Klei Aê Diê Blŭ, boh nik jing hlăm wưng knhal tuč anei. Khua Yang Yêsu hưn brei răng leh kơ Phung Sang Aê Diê Laôdisê hlăm Klei Bi Êdah 3:20: “Nĕ anei kâo dôk dơ̆ng ti ƀăng bhă leh anăn khŏk; tơdah arăng hmư̆ asăp kâo leh anăn pŏk ƀăng bhă, kâo srăng mŭt hlăm sang ñu, ƀơ̆ng huă mbĭt hŏng ñu, leh anăn ñu mbĭt hŏng kâo”, brei drei mđing hmư̆ Khua Yang hŏng klei klă mngač, đăo knang hlăm Klei Aê Diê Blŭ, leh anăn dôk nanao hlăm klei bi mguôp siă suôr hŏng Ñu. Đăm ôh knŏng mă klei mtô grăp hruê kăm jing djăp leh, ƀiădah brei hur har dlăng, hriăm Klei Aê Diê Blŭ grăp hruê čiăng đĭ hriê hlăm klei đăo leh anăn thâo Khua Yang êlam hĭn.
Drei srăng drông Khua Yang lŏ hriê hlăm hruê anei mtam mơ̆?
Wah lač: Ơ Khua Yang khăp hơiêng, kâo čang guôn hruê Ih lŏ hriê, akâo kơ Ih đru kâo djă pioh klei bi mguôp kjăp hŏng Ih čiăng kơ kâo amâo ngă ngơi mang ôh amâodah lăm lui ôh klei bi knăl kơ hruê knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
