Mathais 24:32-35
Nqe cim:
“Ib yam nkaus li ntawd, thaum nej pom tej ntawd, nej yuav paub hais tias nws twb los ze ntawd qhovrooj lawm” (Mathais 24:33)
Lus nug xav:
– Tswv Yexus siv tus duab twg los piv rau hnub Nws rov los?
– Tus Tswv xav kom Nws cov thwjtim yuav tsum ua tib zoo faj tej yam dabtsi?
– Peb cheem tsum ua dabtsi hauv kev nyob tos Tswv Yexus rov qab los?
Tswv Yexus siv tus duab ntawm tsob txiv ncuavpias thiab lub caij ntuj nag los piv rau Nws kev rov qab los. Thaum tsob txiv ncuavpias cov ceg rov ntsuab thiab hlav nplooj mos nyoos yog lub cim qhia hais tias caij ntuj nag los yuav txog. Kuj ib yam li ntawd thaum saib pom tej cim uas Tswv Yexus hais hauv Mathais 24, peb paub hais tias lub sijhawm uas Tswv Yexus yuav rov los tabtom los ze heev lawm. Lolus “paub” hauv nqe 32-33 zeem paub tej uas tus Tswv tau qhia, paub tseeb tiag tiag Vajtswv tus dej siab. Peb tsis yog paub los ntawm kev xav lossis dhau ntawm tej kev kawm paub xwb tiamsis yog los ntawm qhov tseemceeb uas peb tabtom ua neej, tswj tau lub neej sab ntsujplig nyob tos hnub Tswv Yexus rov qab los.
Tswv Yexus xav kom Nws cov thwjtim yuav tsum ua zoo faj txog tej cim ntawm txoj kev qhia cuav, av qeeg, kev mob nkeeg, tsov rog, kev tsim txom kev ntseeg thiab yuav muaj coob leej tso kev ntseeg tseg… ces paub hais tias hnub Tswv Yexus los “twb los ze lawm”, Tswv Yexus tabtom sawv ntawm “qhov rooj” (nqe 33). Vajtswv haivneeg yuav ua timkhawv txog Nws rov qab los, vim thaum Tswv Yexus los tos Pawg ntseeg twjywm mus lawm ces lub lim tiam xya caum chiv pib mus. Tswv Yexus nias cim rau tej lus uas Nws tshaj tawm: “Lub ntuj thiab lub ntiajteb yuav ploj mus, tiamsis kuv tej lus yuav tsis muaj ib los poob li” (nqe 35), nov yog Vajtswv txoj kev tabpov thiab ncajncees hais tias txhua lolus uas hais tseg txog Tswv Yexus yuav rov qab los thiab ntiajteb kawg yuav tiav log.
Thaum saib mus rau tej kev puastsuaj uas raug lub ntiajteb pheej huam zuj zus los ntawm qhov uas raug hnyav thiab ntau, peb zeem paub hnub Tswv Yexus rov los twb ze heev lawm. Huab cua hloov pauv loj heev, muaj toj pob, ntuj qhuav, nag hlob puv nkaus txhua qhov chaw, kev mob nkeeg kis thoob ntiajteb, kev ua tsov rog ntawm txhua haivneeg yim hnub yim muaj ntau thiab loj dua ntxiv. Heev tshaj txhua lub sijhawm, peb yuav tsum paub tus Tswv tseeb tiag tiag thiab ceev txojkev sib txuas nrog Vajtswv tob tshaj dua qub, tsis txhob nrog tus Tswv mus zoo li ib txwm ua lossis coj raws li kevcai ntseeg xwb tiamsis yuav tsum txuas ruaj khov kho rau ntawm Vajtswv thiab Nws Txojlus, tshwjxeeb yog hauv lub sijhawm yuav kawg no. Tswv Yexus ceebtoom Pawg ntseeg Laudikeyas hauv Tshwmsim 3:20 hais tias: “Nej sim mloog saib, kuv sawv sab qhovrooj nraud thiab khob; yog leejtwg hnov kuv khob thiab qhib qhovrooj rau kuv, kuv yuav los hauv tus ntawd lub tsev. Kuv yuav nrog nws noj mov thiab nws yuav nrog kuv noj mov”, peb cheemtsum ua tib zoo tig ntsej mloog tus Tswv lus, ntseeg ruaj khov kho rau ntawm Nws Txojlus thiab nyob hauv txoj kev sib raug zoo uas zoo kawg nkaus nrog Nws. Tsis txhob tsuas yog mloog ib zaj lus qhuab qhia ib thiv ces txaus lawm, tiamsis yuav tsum nquag kub siab nyeem, kawm Vajtswv Txojlus txhua hnub kom loj hlob kev ntseeg thiab paub Vajtswv tob heev ntxiv.
Thov Vajtswv,
Vajtswv tus muaj kev hlub, nyuam yaus cia siab ntsoov tos hnub Koj rov los, thov pab nyuam yaus ceev txoj kev sib raug zoo nrog Koj txhua lub sijhawm kom zeem paub tej cim uas ze hnub Koj rov qab los. Nyuam yaus tuav Tswv Yexus Khetos lub npe thov, Amees.
Peb puas npaj txhij tos txais tus Tswv los hnub no?
Nyeem Vajluskub hauv peb lub xyoos: Exalas 4
Kênh Youtube BHKTHN:
