I Kauleethaus 6:1-8
Nqe cim:
“Nej tsis paub hais tias, peb twb yog cov uas yuav txiav txim rau cov timtswv no los? Yog li ntawd, tsimnyog peb hais tau tej nyuag plaub ntug uas niaj hnub muaj no thiab!” (I Kauleethaus 6:3)
Lus nug xav:
– Cov ntseeg Kauleethaus qhov teebmeem hais hauv ntu Vajluskub no yog dabtsi?
– Timthawj Paulus qhia lawv cheemtsum ua dabtsi?
– Vim li cas qhov no tseem muaj nyob hauv cov Pawg Ntseeg tamsim no?
Ib qhov teebmeem ntxiv qhia pom hais tias Pawg Ntseeg Kauleethaus tabtom ua poob qhov qab ntawm ntsev las neeg ntiajteb sai heev yog qhov teebmeem daws kev tsis sib haum xeeb. Cov ntseeg tsis sib haum, sib cav sib ceg tsis coj los sib daws hauv Pawg Ntseeg tiamsis ho sib kom mus rau tsev tu plaub. Cov neeg Yudais txoj cai yog hais plaub hauv lawv cov tsev sablaj, tsis pub lwm haivneeg daws lawv cov neeg Yudais cov teebmeem. Tiamsis cov neeg Kilis thiab cov neeg Athees ces nyiam muab tej teebmeem plaub ntug coj mus rau tej nomtswv hais. Thiab cov ntseeg Kauleethaus tabtom raug cuamtshuam qhov no.
Los ntawm cov lus nug: “nej tseem coj mus rau cov tsis ntseeg nrog nej hais thiab los?” (nqe 1), “nej txawm yuav tsis muaj cuabkav hais tej nyuag plaub me me no thiab los?” (nqe 2),… Timthawj Paulus hais txog nws txojkev xav rau tej teebmeem ntawd: Tej haujlwm hauv tsevneeg ntseeg Vajtswv twb tsimnyog muab hais hauv tsev kom sib haum thiab ua zoo mus. Timthawj Paulus ua timkhawv hais tias cov ntseeg yeej muaj tus txaus peevxwm los cais qhov tseeb. Tim ib, yog cov ntseeg twb muaj cai txiav txim rau cov tsis ntseeg, ces tej haujlwm daws kev tsis haum no yog tes haujlwm me uas lawv yeej ua tau kawg (nqe 2). Tim ob, cov ntseeg yuav txiav txim rau cov timtswv, lub cev ntsujplig, ces “tej haujlwm hauv ntiajteb no” tsuas yog tej haujlwm yoojyim rau lawv ua (nqe 3). Raws li Paulus, Pawg Ntseeg yeej muaj cov neeg txawj ntse yuav daws tau tej teebmeem hauv cov ntseeg xwb (nqe 5). Paulus hais tias cov ntseeg sib kom mus rau nomtswv ces yog “ua txhaum” lossis “swb” (nqe 7). Txawm yog hais yeej los Vajtswv lub npe yuav raug thuam, thiab dab ntxwgnyog yuav yog tus yeej xwb. Nyob hauv nqe 7 thiab 8, Paulus hais tias yeem cia nws tus kheej swb zoo dua li uas luag ntxo ua rau Vajtswv poob ntsejmuag.
Txaus tu siab heev, nimno cov ntseeg yeej tseem muaj tej kev tsis sib haum nyob hauv Pawg Ntseeg, teebmeem ntawm cov ntseeg thiab cov ntseeg, ntawm cov Pawg Ntseeg thiab cov Pawg Ntseeg, qee zaus muab coj mus rau nomtswv hais. Tej zaum cov neeg ua li no xav kom muaj kev yeej swb raws li txoj cai, tiamsis lawv hnov qab ib yam tseemceeb uas yog daws teebmeem li ntawd lawv twb ua poob kev hlub lawm, tsis muaj tus cwjpwm zam txim raws li tus Tswv tej lus qhia. Timthawj Paulus ntuas hais tias tuajyeem cia yus swb es muaj kev sib haum xeeb zoo dua. Vajtswv paub tagnrho thiab Nws yuav ntxiv rau peb.
Thov Vajtswv,
Vajtswv, peb cov nyuam yaus yog neeg txhaum, qaug zog; yog li ntawd thiaj tseem muaj ntau yam kev tsis sib haum xeeb. Thov Vaj Ntsujplig qhia peb cov menyuam paub daws tej teebmeem los ntawm txojkev sib raug zoo hauv tus Tswv kom ua rau Koj tau ntsejmuag thiab peb tau kev txhim kho. Nyuam yaus tuav Tswv Yexus Khetos lub npe thov, Amees.
Peb pheej daws tej teebmeem hauv cov kwvtij ntseeg li cas?
Nyeem Vajluskub hauv peb lub xyoo: Phau Ntawv Nkauj 104
Kênh Youtube BHKTHN:
