I Kôrintô 5:1-13
“Kơthơ inh chih kơ iĕm ki, inh khă kuă ăn iĕm tơbôl păng bơngai mă lui ră, mă sư ưh kơ kiơ̆ tơdrong lui tơpă. Sư oei pơm pơyô kư̆ kă, sư oei ‘nhĕng kơ mŭk tơmam đe, sư kơkuh kơ rup yang, sư oei hiĕk achơ̆ kơ đe ling lang, sư oei et sik suai, sư oei tơtông mŭk tơmam đe; dôm lu bơngai thoi noh inh kuă ăn iĕm tơbôl păng kuă ăn sŏng sa hơdai.” (I Kôrintô 5:11)
Nơ̆r jet tơchĕng pơwao:
– ‘Bok Pôl bơtho “’Nĕ kơ pơm bôl hăm bơngai pơm pơyô kư̆ kă” kiơ̆ kơ thoi yơ?
– Pơm thoi yơ arih phara ‘biơ̆ mălei ưh kơ tơklah băl?
– Lu bơ̆n pơm trŏ hăm lu “Bơngai ưh kơ lui tơpă” lăm Khul Bơngai Lui ‘noh kiơ?
Bơ̆n ‘bôh Khul Bơngai Lui Kôrintô kăl kơ tơ’bôh lơ dêh gah tơdrong pơma dơnuh hăm bơngai pơm yoch, ‘bok Pôl pơma pơtrơp dơ̆ng lăm trong 9-13. Blŭng a, sư hơmet gah tơdrong hlôi glăi nơ̆r pơlung “’nĕ kơ tơbôl hăm lu bơngai pơm pơyô kư̆ kă. (trong 9). Wă pơma khan ‘nĕ kơ tơbôl hăm bơngai ưh kơ lui păng bơngai lui hai mơ̆n. Kiơ̆ kơ ‘bok Pôl, sư bơtho “’nĕ kơ tơbôl” ‘nâu ưh kơ ‘măn kơ lu bơngai tam mă lui. Kơlih kơ thoi noh, chăl arih lu bơ̆n athei jang sa ngôi hơdai hăm bơngai tam mă lui. Dah hlôh kiơ̆ kơ nơ̆r pơma thoi noh lei lu bơ̆n athei weh tơklah đơ̆ng bơngai ala teh âu, mălei tơdrong gô pơm tơ’bôh kơplah “achăng đơ̆ng chăl âu” (trong 10). Bơngai lui ưh kơ trŏ, bơ̆n lui gơh weh đơ̆ng chăl âu na wă kơ bơwei bơ̆n pơm ‘lơ̆ng rơgoh. Bơngai lui athei arih ‘lơ̆ng tơpăt hăm lu bơngai tam mă lui wă kơ thoi “hơdah jơ̆p kơ kon bơngai lăm teh đak”. Thoi lĕ kơ “’Boh bơ̆n tah kơ tơmam sa ‘băt ‘lơ̆ng”. (Mathiơ 5:13-16). Lu bơ̆n athei arih phara ‘biơ̆ athei arih rơgoh mălei ưh kơ tơklah đơ̆ng teh đak âu.
Athei arih phara mălei ưh kơ gơh tơklah, minh pah sư đơ̆ng jơhngơ̆m lăm Khul Bơngai Lui hăm “lu bơngai khan ‘nhŏng oh” wă khan lu bơngai lui lăm hnam akŭm, jô̆ kơdih khan bơngai lui kơ Yêsu Krist mălei oei pơm pơyô kư̆ kă, sư oei ‘nhĕng kơ mŭk tơmam đe, sư kơkuh kơ rup yang, sư oei hiĕk achơ̆ kơ đe ling lang, sư oei et sik suai, sư oei tơtông mŭk tơmam đe”, (trong 11). Mă oei arih tơ ala teh âu na mă bu lăm lu bơ̆n oei đei pơm glăi ngăl, mălei dôm tơdrong yoch đei roi lăm trong 11, tơdrong gĭt kăl hloh đei chih roi tơ’bôh pơlei Kôrintô tơdrong pơm ‘lơ̆ng rai lŭch, lu tơdrong yoch pơm pơdah, gơh tơ’bôh hloi, pơm kơmĭl kơnê̆ rơđah dêh. Pơma phara dơ̆ng, mưh bơ̆n tơproh tơdrong pơm pơyô kư̆ kă, ‘nhĕng hưch ham dang ăi hăm kơkuh kơ rup yang, ‘bok Pôl tơ’bôh lu bơngai ‘bĕnh ‘bang pơm tơdrong yoch na ưh kơ wă tơbral, lu bơngai noh lui ưh kơ tơpă, wă kơ đei anăn đĕch, lu bơngai jô̆ kơdih khan bơngai lui mălei arih oei pơm dôm yoch noh pơm kơ đe hlôh hơwơ̆l păng pơrăm truh tơ hnam akŭm.
Tơdrong tơl trŏ đơ̆ng Khul Bơngai Lui hăm lu bơngai mă jô̆ kơdih khan bơngai lui kơ Yêsu Krist mălei oei nŏng kơ pơm dôm tơdrong yoch thoi noh: “’Nĕ kơ tơbôl”, wă khan ưh kơ gơh tơguăt jê̆ dih băl, ‘nĕ kơ pôm jơhngơ̆m đon hăm lu sư; “ưh kơ sŏng sa hơdai, kư̆m ưh kơ bơwei tơdrong tơ’bưh dih băl, păng truh tơdrong mă achăng tŭk” lu bơngai thoi noh đơ̆ng lu bơ̆n (trong 11-13). Bơngai chih hla bơar Hơriso 1 kư̆m pơma bơngai ưh kơ kiơ̆ trong lu bơngai kơnê̆, kư̆m ưh kơ oei lăm trong lu bơngai yoch, kư̆m ưh kơ ngôi hơdai hăm lu pơjăm đe jơ̆ bơngai pŭn.
Ơ Kră Yang, inh bơngai ‘bônh kơ pơm yoch, trăp dêh păng hăm ‘nhŏng oh, apinh Ih tơgŭm inh wă kơ inh pơ̆n nuih păng tơpăt lăm tơdrong ‘mêm wă kơnhăm đei tơiung Khul Bơngai Lui kơ Kră Yang. Krao khan yua anăn Kră Yang Yêsu Krist, Amen.
Lu bơ̆n ngăl juăt đei jơhngơ̆m thoi yơ hăm lu bơngai mă ưh kơ lui tơpă?
Đŏk Sơ̆p hla bơar ‘Bok Kei-Dei lăm pêng sơnăm: Habakuk 3
Kênh Youtube BHKTHN:
