I Kauleethaus 5:1-13
Nqe cim:
“Tiamsis qhov uas kuv sau tsab ntawv no tuaj rau nej, yog qhia kom nej tsis txhob mus koom nrog tus neeg uas nws ua txuj hais tias nws yog tus ntseeg, tiamsis nws tseem nyiam ua kev nkauj kev nraug, ntsaw luag tug, pe mlom, thaum lwm tus, quav cawv thiab ua tubsab. Txawm yog noj mov los nej tsis txhob nrog tus neeg uas zoo li ntawd koom tsum” (I Kauleethaus 5:11)
Lus nug xav:
– Timthawj Paulus ntuas kom “tsis txhob ua phoojywg nrog cov neeg ua txhaum kev nkauj kev nraug” muaj lub ntsiab li cas?
– Yuav ua li cas kom ua tau lub neej txawv neeg ntiajteb tiamsis tsis yog txiav tu nrho kom yus nyob ib leeg?
– Qhov yog uas peb ua rau “cov ntseeg cuav” nyob hauv Pawg Ntseeg yog dabtsi?
Zeem paub Pawg Ntseeg Kauleethaus cheemtsum kev taw qhia ntau yam txog tes haujlwm uas yuav ua rau cov neeg poob kev txhaum, Timthawj Paulus hais meej nyob hauv nqe 9-13. Thawj yam, Paulus kho qhov uas lawv totaub yuam kev txog cov lus ntuas “tsis txhob mus koom nrog cov neeg uas nyiam ua kev nkauj kev nraug hlo li” (nqe 9), raws li lub ntsiab uas totaub mas yog txwv tsis pub mus koom nrog cov neeg tsis ntseeg thiab ntseeg nrho. Raws li Timthawj Paulus, lo lus ntuas “tsis txhob mus koom” no tsis siv rau cov neeg tsis ntseeg. Rau qhov, peb ua neej nyob yus yuav ua haujlwm, nrog cov neeg tsis ntseeg Vajtswv sib tham. Yog totaub raws li lub ntsiab txwv tsis pub, ces peb yuav cais yus tawm hauv lub ntiajteb no mus, thiab qhov ntawd tsuas yog ua tau thaum peb ncaim lub ntiajteb no mus xwb (nqe 10). Cov ntseeg Yexus txojkev ntseeg tsis yog ntseeg cais tu nrho tawm plaws hauv lub ntiajteb no mus nkaum twm zeej kom ua tau neeg dawbhuv. Cov ntseeg Yexus yuav tsum ua neej dawbhuv nyob hauv cov neeg uas tsis ntseeg kom “ua tau qhovkaj ci rau ntiajteb pom kev”, ua “tau ntsev las neeg ntiajteb” (Mathais 5:13-16). Peb yuav tsum ua neej dawbhuv txawv neeg ntiajteb, tsis yog cais tawm hauv lub ntiajteb mus.
Cia kom ua neej txawv tiamsis tsis cais tu nrho, ib feem twg yog nyob ntawm Pawg Ntseeg tus cwjpwm ua rau “cov neeg uas lees tias lawv yog peb cov kwvtij”, txhais tau tias yog cov neeg nyob hauv tuamtsev, xwbtim lees hais tias lawv yog tus ntseeg Yexus Khetos, tiamsis “tseem nyiam ua kev nkauj kev nraug, ntsaw luag tug, pe mlom, thuam lwm tus, quav cawv thiab ua tubsab” (nqe 11). Tseem ua neej nyob hauv ntiajteb no ces peb sawvdaws yeej tseem ua txhaum. Tiamsis cov kev txhaum uas hais hauv nqe 11 no, tshwjxeeb yog nyob rau lub tsamthawj Pawg Ntseeg Kauleethaus tabtom muaj neeg ua phem coob zuj zus tuaj, ua tsis tau qauv zoo. Lwm seem, thaum ntaus nqi kev txhaum nkauj nraug, ntshaw luag tug yog kev txhaum loj npaum li kev pemlom, Timthawj Paulus qhia paub cov neeg uas pheej qaug rau tej kev txhaum no tsis tso tseg, ces lawv yog cov uas ntseeg cuav, lam tuav lub npe ntseeg xwb. Cov neeg uas xwbtim lees tias yus yog tus ntseeg Yexus tiamsis ua neej tsau rawv hauv kev txhaum ces yuav ua rau lwm tus poob kev ntseeg thiab ua rhuav Pawg Ntseeg lub koob npe zoo.
Qhov uas Pawg Ntseeg yuav tau ua rau cov neeg uas xwbtim lees tias lawv yog tus ntseeg tiamsis tseem pheej mus ua txhaum no yog: “tsis txhob nrog ua phoojywg”, txhais tau tias tsis caum, tsis koom siab, tsis koom lawv txojkev xav; tsis nrog tus neeg ntawd koom tsum”, tsis tuav txojkev phoojywg zoo; thiab qee zaus yuav tau “rhuav tshem” cov neeg zoo li ntawd mus (nqe 11-13). Tus uas sau Phau Ntawv Nkauj 1 kuj hais tias cov neeg uas tsis mus nrog cov neeg siab phem ua ke, tsis taug cov neeg ntawd txojkev txhaum thiab tsis zaum nrog cov neeg phem ces yog cov uas tau koob hmoov.
Thov Vajtswv,
Vajtswv, nyuam yaus pheej ua yoojyim rau tej kev txhaum hnyav uas nyuam yaus thiab cov kwvtij ntseeg ua. Thov Koj pab kom nyuam yaus ua tau siab tawv qhawv thiab hais ncaj qha kom muaj txojkev txhim kho Pawg Ntseeg loj hlob. Nyuam yaus tuav Tswv Yexus Khetos lub npe thov, Amees.
Peb pheej muaj tus cwjpwm twg rau cov “ntseeg Yexus cuav”?
Nyeem Vajluskub hauv peb lub xyoo: Hanpakus 3
Kênh Youtube BHKTHN:
