I Petus 5:8-11
Nqe cim:
“Nej yuav tsum ceevfaj zov zoo, tsis txhob nkees, rau qhov dab Ntxwgnyoog tus uas yog nejt tus yeebncuab, nws mus mus los los ib yam li tus tsov ntxhuav uas quaj nrhiav tom tsiaj noj” (I Petus 5:8)
Lus nug xav:
– Vim li cas cov ntseeg Yexus yuav tau ceevfaj dab ntxwgnyoog?
– Peb yuav tau ceevfaj zoo li cas?
– Peb tau txhawb zog li cas kom ceevfaj thiab tawmtsam yeej dab ntxwgnyoog?
Tom qab uas Timthawj Petus qhia kom cov ntseeg yuav tsum cia siab rau Vajtswv, muab tej kev txhawj tso rau Nws (I Petus 5:7), Petus qhia kom lawv yuav tsum tswj tus kheej thiab ceevfaj. Ob lo lus no muaj lub ntsiab qhia tias yuav tsum ceevfaj, vimchiv yog vim dab ntxwgnyog mus mus los los puag ncig cov ntseeg. Petus siv tus duab “tsov ntxhuav”, “ncig mus ncig los”, “tom” los hais txog qhov kev txaus ntshai, phem ntawm dab ntxwgnyoog thiab nws cov thwjtim. Yuav tsum nco ntsoov hais tias peb tabtom nyob hauv kob tsovrog sab ntsujplig uas nyuaj heev: “Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj” (Efexus 6:12). Yog li ntawd, yuav tsum zeem paub yeebncuab yog leejtwg kom peb paub ceevfaj qhov uas yeebncuab tua rhuav.
Yog li, thaum peb ntsib kev txomnyem, tsimtxom, ua saib tsis taus, thiab tsis muaj leejtwg pab, qaug zog, ua tsis tau, peb tsis txhob khiav deb Pawg Ntseeg, tsis txhob pheej saib ntsoov rau tsamthawj txomnyem ntawd, tiamsis hajyam yuav tsum tau ceevfaj zoo, “muab siab rau ntseeg thiab tawmtsam dab Ntxwgnyoog” (nqe 9). Yim raug tawmtsam, tsimtxom, ua saib tsis taus peb yim huab yuav tau vamkhom tus Tswv lub zog kom peb muaj zog hauv tus Tswv. Cia li “tuav Vaj Ntsujplig rab ntaj uas yog Vajtswv Txojlus” (Efexus 6:17) tawmtsam dab ntxwgnyoog, ces nws yuav khiav deb peb. Tiamsis cia kom muaj Vajtswv Txojlus txaus tawmtsam dab nyob rau txhua lub tsamthawj, peb yuav tsum nquag nyeem, kawm, xav Vajtswv Txojlus nruab hnub hmob ntuj.
Timthawj Petus kuj ntuas Vajtswv cov menyuam kom ua siab tawv qhawv ceevfaj tej uas dab ntxwgnyoog tua tuaj, Petus hais tias cov ntseeg Yexus tsis tiv tej no ib leeg, tiamsis nws “paub lawm hais tias cov kwvtij ntseeg uas nyob thoob plaws hauv qab ntuj no, lawv tabtom raug kev tsimtxom ib yam li nej raug thiab” (nqe 9). Dua li, dhau tej kev txomnyem, nyuaj siab, Vajtswv yuav ua kom peb muaj kev ntseeg ruaj zoo ib yam lub nroog muaj ntsayeej thaiv, tawv li hlau lim tawm hauv qhov cub los. Thiab loj tshaj qhov ntawd yog txojsia ntev mus ibtxhis uas Yexus Khetos pub rau cov neeg uas tswj siab thiab ceevfaj tawmtsam dab mus txog thaum kawg (nqe 10). Thov Vajtswv pab kom peb tuav kev ntseeg ruaj, ceevfaj tej kev ntxias ntawm dab ntxwgnyoog, rau siab nyeem thiab kawm Vajtswv Txojlus, kom peb tau Vajtswv lub hwjchim pab sawv ruaj txhua lub tsamthawj thiab kovyeej dab ntxwgnyoog.
Thov Vajtswv,
Vajtswv, thov Koj lub hwjchim pab nyuam yaus zeem paub yeebncuab hauv txhua lub tsamthawj ntsib raug. Thov Koj pab kom nyuam yaus paub tswj siab, ceevfaj thiab khaws nkaus Koj Txojlus hauv siab kom paub ceevfaj thiab tawmtsam yeej dab. Nyuam yaus tuav Tswv Yexus Khetos lub npe thov, Amees.
Peb tabtom ceevfaj thiab tawmtsam dab ntxwgnyoog zoo li cas?
Nyeem Vajluskub hauv peb lub xyoo: Nahus 2
Kênh Youtube BHKTHN:
