Klei Aê Diê Blŭ: I Y-Pêtrôs 5:8-11
Êlan kliăng: “Brei diih dôk djŏ hnơ̆ng leh anăn dôk răng. Pô roh diih yang jhat dar jŭm diih msĕ si êmông gu gruh, duah hlei pô ñu dưi hiêk ƀơ̆ng.” (I Y-Pêtrôs 5:8).
Klei êmuh ksiêm mĭn: Ya ngă brei phung đăo răng kơ yang jhat? Si ngă drei răng? Si klei mtă kơ drei čiăng kơ drei dôk răng leh anăn bi kdơ̆ng hŏng mnêč yang jhat mplư?
Leh Khua bĭng kna Y-Pêtrôs mtă brei phung đăo knang kơ Khua Yang, jao jih klei uêñ hnĭng kơ Ñu (êlan 7), ñu mtă kơ digơ̆ brei dôk djŏ hnơ̆ng leh anăn dôk răng. Dua boh blŭ anei čiăng lač kơ klei brei răng snăk, kyuadah pô roh jing yang jhat dar hiu jŭm dar phung đăo kơ Khua Yang. Ñu yua rup “êmông guh gruh”, “dar”, “hiêk ƀơ̆ng” čiăng lač kơ klei mnêč, klei jhŏng leh anăn klei jhat Satan leh anăn phung dĭng buăl ñu. Brei drei hdơr nanao kơ drei dôk bi blah klei bi blah myang prŏng snăk: “Kyuadah drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê” (Êphêsô 6:12). Kyuanăn brei kral sĭt hlei jing pô roh čiăng dưi răng kơ klei kdơ̆ng ngă mơ̆ng pô roh.
Kyuanăn, tơdah drei tuôm hŏng klei knap mñai, klei arăng bi kdơ̆ng, klei arăng ngă jhat, leh anăn ƀuh kơ drei pô dôk hjăn păn, jing awăt êdu, amâo mâo klei dưi ôh, hrô kơ klei ñĕ đuĕ kơ Phung Sang Aê Diê leh anăn phung bi đru đăo mkăn, amâodah uêñ mĭn đei kơ klei truh tơl kƀah klei răng, snăn brei drei “bi kdơ̆ng bĕ hŏng ñu djă kjăp klei đăo” (êlan 9). Knư̆ arăng bi kdơ̆ng, ngă jhat kơ drei knư̆ brei drei knang kơ klei ktang Khua Yang brei drei jing jhŏng hĭn hlăm Ñu. Djă bĕ “đao gưm Yang Mngăt Jăk jing klei blŭ Aê Diê” (Êphêsô 6:17) pioh bi kdơ̆ng hŏng yang jhat, snăn ñu srăng đuĕ kbưi mơ̆ng drei. Ƀiădah čiăng mâo Klei Aê Diê Blŭ bi kdơ̆ng hŏng yang jhat mtam hlăm grăp klei truh mdê mdê, snăn brei drei hur har dlăng, hriăm, leh anăn ksiêm mĭn Klei Aê Diê Blŭ hruê leh anăn mlam.
Msĕ mơh Khua ƀĭng kna Y-Pêtrôs mtă brei phung đăo jhŏng dôk răng kơ klei yang jhat kdơ̆ng ngă tơdah ñu lač phung đăo kơ Krist amâo dôk hjăn ôh tơdah tŭ klei lông dlăng knap mñai, ƀiădah “diih thâo leh Aê Diê brei klei knap mñai msĕ snăn truh kơ phung ayŏng adei diih tar ƀar lăn ala” (êlan 9). Leh anăn hŏng klei dleh dlan, knap mñai anăn Aê Diê srăng bi kjăp klei đăo drei jing msĕ si kđông kjăp, khăng msĕ si msei bi doh hlăm kpur pui. Leh anăn êgao hĭn kơ jih jang jing klei guh kơang hlŏng lar hlăm Krist pioh brei kơ hlei pô dôk djŏ hnơ̆ng leh anăn dôk răng kăp bi kdơ̆ng hŏng yang jhat tơl knhal tuč (êlan 10). Akâo Khua Yang đru drei dôk kjăp hlăm klei đăo, kăp răng kơ mnêč yang jhat čiăng ngă, hur har dlăng leh anăn hriăm Klei Aê Diê Blŭ čiăng hŏng klei myang Klei Aê Diê Blŭ đru drei dưi dôk kjăp nanao hlăm djăp mta klei truh leh anăn dưi hŏng klei yang jhat bi kdơ̆ng
Si drei dôk răng leh anăn bi kdơ̆ng hŏng yang jhat?
Wah lač: Ơ Khua Yang, akâo klei myang Ih đru kâo thâo kral sĭt hlei jing pô roh kâo hlăm klei truh kâo dôk bi tlă anăp. Đru kâo amâo ngă klei amâo răng ôh, ƀiădah thâo dôk djŏ hnơ̆ng, dôk răng leh anăn pioh nanao Klei Ih Blŭ hlăm ai tiê čiăng răng leh anăn bi kdơ̆ng wĭt hŏng yang jhat. Kâo wah lač hlăm Anăn Khua Yang Yêsu Krist. Amen
Dlăng Klei Aê Diê Blŭ hlăm tlâo thŭn: Y-Nahum 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
