Chivkeeb 9:1-7
Nqe cim:
“Vajtswv foom koob hmoov rau Nau-es thiab nws cov tub hais tias, nej yuav muaj tub muaj ki coob, kom nej thiaj muaj xeebntxwv huamvam mus nyob puv ntiajteb” (Chivkeeb 9:1)
Lus nug xav:
– Tom qab uas dej nyab ntiajteb, tus Tswv samhwm li cas rau tibneeg?
– Nrog rau tej lus samhwm no, tus Tswv hais kom tibneeg yuav tsum ua dabtsi?
– Peb xav li cas txog qhov pib tshiab uas tus Tswv pub?
Tom qab uas rhuav tshem lub ntiajteb los ntawm tso dej nyab, Vajtswv pub ib qhov tshiab rau tibneeg dhau los ntawm Nau-es tsevneeg: “Vajtswv foom koob hmoov rau Nau-es thiab nws cov tub hais tias, nej yuav muaj tub muaj ki coob, kom nej thiaj muaj xeebntxwv huamvam mus nyob puv ntiajteb” (nqe 1). Vajtswv samhwm “kom muaj tub muaj ki coob nyob puv ntiajteb” hauv nqe 7, thiab qhov no kuj yog Vajtswv nplooj siab thaum Nws tsim tibneeg (Chivkeeb 1:28). Vajtswv xav kom tibneeg tu tub tu kiv ntau thiab mus nyob puv lub ntiajteb uas Nws tsim tseg. Txawm yog kev txhaum yuav cuam tshuam thiab thaiv kev, los tus Tswv lub homphiaj rau tibneeg yeej tsis hloov li.
Nrog rau lo lus samhwm no, Vajtswv pub rau tibneeg noj tau txhua yam tsiaj tej nqaij, tiamsis tus Tswv tsis pub neeg noj ntshav (nqe 3-4). Qhov vimchiv uas Vajtswv txwv tsis pub noj yog vim ntshav piv tshwj xeeb txog txojsia, yog li tibneeg yuav tsum saib txojsia uas Vajtswv pub muaj nqis. Ua raws li tej lus samhwm no ces yog qhia tshwm lub siab hwm tus uas tsim txojsia. Qhov txuas ntxiv uas Vajtswv cob cim rau tibneeg yog yuav tsum saib lwm tus txojsia muaj nqis; rau qhov lawv tau tsim muaj tus yamntxwv zoo li Vajtswv (nqe 6). Ua hiam lwm tus ces yog ua saib tsis tau Vajtswv tus yamntxwv. Txawm yog Nau-es tsevneeg tau Vajtswv xaiv los ua ib qho pib tshiab rau neeg ntiajteb, los lawv kuj tseem yog cov neeg uas zoo tsis txaus nyob hauv lub ntiajteb uas raug kev txhaum tsuas lawm. Vajtswv xav kom lawv yuav tsum kovyeej kev txhaum, kev sib ntaus sib tua, kom muaj tus cwjpwm saib taus lwm tus, saib lwm tus muaj nqis, vim ntawd yog qhov uas lawv hwm Vajtswv.
Qhov kev rau txim uas tso dej nyab ntiajteb twb xaus, tibneeg ntiajteb pib mus rau qhov tshiab, txuas ntxiv Vajtswv txojkev npaj tseg rau tej uas Nws tsim thaum chivthawj. Muaj qee ntu hauv kev ua neej, peb yuav tsum tiv kom dhau sim siab, lossis raug tus Tswv rau txim. Tiamsis qhov zoo siab yog Vajtswv tsis muab peb tso tseg, Vajtswv hais tias: “Kuv yuav tsis tso koj tseg lossis kuv yuav tsis muab koj povtseg ib zaug li” (Henplais 13:5). Hmo ntuj dhau, qhov kaj yuav ci tuaj, thiab Vajtswv tseem xav siv peb ua kom tiav tej uas Nws tau npaj tseg. Vajtswv tsis yog tsuas pub qhov tshiab rau peb xwb, Nws tseem foom koob hmoov thiab coglus coj peb ua neej thiab ua Nws tes haujlwm. Cia li ua Vajtswv tsaug thiab txaus siab hlo taug qhov tshiab uas Vajtswv pub.
Thov Vajtswv,
Vajtswv, txawm yog Koj rau txim rau cov neeg txhaum los Koj txojkev hlub thiab txojkev npaj rau tibneeg tsis hloov li. Ua tsaug uas Koj pub nyuam yaus muaj cai tau los ua Koj tes haujlwm. Thov Koj qhia nyuam yaus paub saib txojsia muaj nqis thiab vamkhom Koj lub zog ua neej txhua hnub raws li Koj nyiam. Nyuam yaus tuav Tswv Yexus Khetos lub npe thov, Amees.
Peb yuav ua li cas thaum tau Vajtswv pub peb rov muaj feem nrog Nws txojkev npaj?
Nyeem Vajluskub hauv peb lub xyoo: Mikhas 5
Kênh Youtube BHKTHN:
