Klei Aê Diê Blŭ: Galati 5:16-18
Êlan kliăng: “Ƀiădah kâo lač: Brei Yang Mngăt Jăk kiă kriê klei hdĭp diih leh anăn diih amâo srăng bi mơak kơ klei kđeh čiăng ôh.” (Galati 5:16)
Klei êmuh ksiêm mĭn: Si khua ƀĭng kna Y-Pôl hưn mdah kơ klei dôk bi blah nanao ti krah klei hdĭp myang hŏng klei kđeh čiăng? Si brei phung anak ƀuôn sang Aê Diê êbat tui hlue Yang Mngăt Jăk hlăm klei kpă ênô leh anăn klei khăp? Si drei dôk hdĭp tơdah êbat tui hlue Yang Mngăt Jăk?
Êbat tui hlue Yang Mngăt Jăk jing dôk hdĭp tui si klei Yang Mngăt Jăk atăt gai. Hdruôm hră Klei Aê Diê Blŭ jing Klei Blŭ mơ̆ng Aê Diê mâo Yang Mngăt Jăk ƀhur êwa (II Y-Timôthê 3:16), năng đăo knang čiăng kơ phung anak ƀuôn sang Aê Diê hriăm leh anăn gưt ngă hlue. Yang Mngăt Jăk bi êdah kơ Khua Yang Yêsu čiăng kơ anak mnuih tŭ jum Ñu jing Khua Yang Pô Bi Mtlaih leh anăn dôk hdĭp tui si klei Ñu bi hmô.
Hlăm jih êlan Klei Aê Diê Blŭ anei, khua ƀĭng kna Y-Pôl hưn mdah klei bi blah ti krah klei kđeh čiăng hŏng klei hdĭp myang. “Klei kđeh čiăng” bi ala kơ knuih jing klei hdĭp hđăp drei (Galati 5:19-21), knuih jing atăt drei kơ klei djiê rai luč hlăm klei soh. Bi mklăk hŏng klei anăn, Yang Mngăt Jăk atăt drei nao kơ klei khăp, klei sĭt nik, klei kpă ênô leh anăn klei thâo pap. Tơdah drei êbat tui hlue Yang Mngăt Jăk, Ñu brei klei ktang čiăng kơ drei bi kdơ̆ng hŏng klei mtrŭt atăt drei ngă klei amâo mtăp mđơr, klei krêñ, klei bi kah phung, leh anăn ngă bi êka ai tiê mnuih mkăn.
Phung anak ƀuôn sang Aê Diê brei êbat tui hlue Yang Mngăt Jăk hlăm klei kpă ênô leh anăn klei khăp. Klei khăp leh anăn klei kpă ênô, dua ênoh yuôm khăng bi klah mdê hlăm lăn ala anei, ƀiădah jing klei amâo dưi bi klah ôh hlăm Ƀuôn Ala Mtao Adiê. Yang Mngăt Jăk bi mjing dua mta klei anăn mguôp mbĭt hŏng klei kluôm ênŭm. Ñu brei kơ drei klei dưi thâo khăp êlam ƀiădah ăt dưi dôk kjăp čiăng răng mgang klei djŏ. Klei atăt gai mơ̆ng Yang Mngăt Jăk amâo bi mjing klei gưt klei bhiăn hŏng klei amâo thâo săng, amâodah kyua klei huĭ ôh, ƀiădah kbiă hriê mơ̆ng ai tiê mâo klei bi mlih. Tơdah khua ƀĭng kna Y-Pôl lač hlei pô mâo Yang Mngăt Jăk atăt gai snăn “amâo dôk ti gŭ klei bhiăn ôh”, ñu kñăm čiăng lač kơ phung đăo brei dôk hdĭp kdlưn hĭn hŏng klei knŏng djă pioh klei bhiăn ti êngao, ƀiădah brei dôk hdĭp bi êdah knuih Aê Diê hŏng bruă Yang Mngăt Jăk dôk ngă hlăm phung anak ƀuôn sang Ñu.
Grăp blư̆ mâo klei ăl ngêñ, amâo thâo bi djŏ amâodah ƀuh klei amâo mtăp mđơr, Yang Mngăt Jăk iêo mthưr brei drei mjưh mtam, wah lač leh anăn wĭt lač hŏng klei thâo mĭn hrô kơ klei lŏ wĭt ngă hŏng klei ruăt kuăt. Ñu mtrŭt drei ngă hŏng klei thâo khăp thâo pap, wăt tơdah dôk tĭng klei sĭt nik srăng tŭ klei săn asei mlei dưn. Klei kpă ênô ngă bruă hlăm klei myang Yang Mngăt Jăk ba hriê klei kpă ênuah, doh jăk jing klei jăk, klei jhŏng ƀiădah hŏng klei êdu êun. Klei hdĭp mâo Yang Mngăt Jăk atăt gai bi êdah klă klơ̆ng mâo boh Ñu: klei khăp, klei êđăp ênang, klei thâo gĭr, klei jăk, klei djŏ hnơ̆ng, đa đa mkăn… Tơdah đup gưt kơ Yang Mngăt Jăk, klei hdĭp drei srăng bi êdah boh klei khăp, klei kpă ênô leh anăn klei jăk Aê Diê hlăm sa lăn ala dôk čiăng snăk mâo jih klei anăn. Hmăng hmưi grăp hruê drei srăng êbat tui hlue Yang Mngăt Jăk čiăng bi êdah mâo Ñu dôk mbĭt, dôk atăt gai, mkra mjuăt, brei klei dưi, leh anăn bi mlih drei grăp hruê dưi jing msĕ si Khua Yang hĭn.
Si ngă drei dôk êbat tui hlue Yang Mngăt Jăk hlăm klei khăp leh anăn klei kpă ênô mơ̆?
Wah lač: Ơ Yang Mngăt Jăk, akâo Ih brei kơ kâo klei thâo mĭn leh anăn klei ktang čiăng dưi hĭn hŏng klei kđeh čiăng, dôk hdĭp tui si klei Khua Yang Yêsu bi hmô, êbat tui hlue Yang Mngăt Jăk hlăm klei kpă ênô leh anăn klei khăp, bi guh kơang kơ Anăn Ñu. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôna 1-2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
