Hơriso 6:1-10
“Ơ Kră Yang, apinh Ih mơnat kơ inh, yua kơ inh rơdu tơrăn; Ơ Kră Yang, pơklaih inh, yua kơ kơting inh tơtơ̆. Ơ Kră Yang! Bơhngol inh hli tơtăm dêh.” (Hơriso 6:2-3a)
Nơ̆r jet tơchĕng pơwao:
– Pơtao Đawit oei tơ’bơ̆p tơdrong anat păng kăl wă ayơ?
– Tơ’bơ̆p tơdrong jĭ wă lôch thoi noh, sư pơm kiơ wă kơ gơh hơmet tơdrong anat noh?
– Lu bơ̆n pơhrăm iŏk tơdrong kiơ đơ̆ng nơ̆r krao khan ‘bok Đawit?
Pơtao Đawit oei pŭ iŏk lơ tơdrong pơmat. Sư oei păn kơ bơlŏ, jĭ ‘bĕnh lăm akâu, inh rơdu tơrăn, kơting inh tơtơ̆, măt inh hrŏ… Gah akâu jăn, sư ‘bôh mơn gleh lap, sơ’ngon dêh, yua kơ inh ôr krao, rim măng inh nhơ̆m, đei pơtih nhen lĕ “ding giơng mah hơiuh”, yua kơ jĭ pơmat tat dêh păng yua kơ lu ayăt wă pơm kơnê̆. ‘Bôh mơn tơdrong lôch wă jê̆ bơih mălei Kră Yang oei ngăn hreh kơplah jơ sư krao khan apinh. Bơhngol sư tơtăm dêh yua kơ tơdrong yoch đêl sư pơm sơ̆?
Pơtao Đawit băt kơnăl Kră Yang ‘lơ̆ng tơpăt gô sek tơlang trŏ kơ bơngai păng trŏ kơ tơdrong yoch. Dah Kră Yang phak trŏ kiơ̆ kơ tơdrong yoch kon bơngai, bu gơh kĕ dơ̆ng ‘bơ̆t anăp Kră Yang hil mĭl? Mă khan lei, sư lui ngeh Kră Yang ‘bĕnh tơdrong ‘mêm mơnat, sư apinh Kră Yang mơnat kơ sư minh ‘nu bơngai lŭch hloh, tơdrong yoch, păng rơdu tơrăn: “Ơ Kră Yang! ‘Nĕ chrih kơ inh lăm năr Ih blĕk, ‘Nĕ kơ bơtho pơjĭ inh lăm năr Ih hil!” (trong 1). Kră Yang bơih Tơ’ngla tơpăt sek tơlang tơdrong yoch. Yang mă pơklaih gah sĕch akar, pơklaih gah bơhngol păng dŏng sư hlôi đơ̆ng tơdrong đe wă pơrăm.
Lăm tơdrong jĭ wă jê̆ lôch thoi noh, pơtao Đawit ưh kơ đei gơnang kơ minh yang ayơ păng kơ minh ‘nu bu nai. Gơnang kơ jơhngơ̆m ‘mêm kơ Kră Yang, sư kĕ chơ̆n, nhơ̆m hmoi, krao ôr păng chang gô tơdrong dŏng pơklaih đơ̆ng Kră Yang. Sư apinh wă kơ arih wă ‘blŏk bơnê kơ Kră Yang păng bơnê ưang kơ Kră Yang (trong 5). Tuch luch lăm Hơriso 6, Kră Yang đei pơlung sư yua kơ Kră Yang kơtơ̆ng păng tơl tơwih nơ̆r sư krao khan apinh Kră Yang gô dŏng sư păng lu ayăt gô mơlâu kơ sư.
Lăm tơdrong jĭ pơmat păng lu ayăt wă pơrăm. Pơtao Đawit năm tơ Kră Yang hăm tơdrong arih sư tơpă, ưh kơ ôn tơdrong hli wă sek tơlang tơdrong rơdu tơrăn gah sĕch akar, jơhngơ̆m păng bơhngol. Tơ’bôh tơdrong ‘lơ̆ng sư noh sư gơnang năm jê̆ tơ tơdrong ‘mêm tih Kră Yang. Sư pơ̆n nuih krao apinh Kră Yang mơnat kơ sư lăm tơdrong sek tơlang, pơklaih tơdrong jĭ sư păng dŏng sư hlôi đơ̆ng lu ayăt wă pơrăm. Sư lui ngeh păng ‘bôh mơn đêl Kră Yang ‘mêm kơ sư păng apinh Kră Yang dŏng pơklaih. Dôm nơ̆r Đawit krao apinh noh dôm ‘bai pơhrăm iŏk ăn kơ lu bơ̆n kơplah lu bơ̆n tơ’bơ̆p tơdrong anat lăm chăl arih rim năr
Ơ Kră Yang, inh ưang kơ Ih yua kơ Ih Yang ‘lơ̆ng tơpăt păng ‘mêm mơnat, Ih ưh kơ đei lăng tơdrong yoch lăm inh mălei Ih iŏk tơdrong ‘mêm tih Ih dŏng pơklaih inh hăm pham Ih Kră Yang Yêsu. Apinh ‘Bă pơklaih dôm tơdrong jĭ lăm inh, tơgŭm inh yak hlôi đơ̆ng tơdrong chhur nuih lăm chăl arih păng hơmet ming dôm tơdrong tơ’bưh inh pơchah răm lăm Ih păng tơduă kon bơngai. Krao khan yua anăn Kră Yang Yêsu Krist, Amen.
Mơn đêl tơdrong mơnat, tơdrong tơtăm mă lu bơ̆n đei tơ’bơ̆p noh kiơ păng lu bơ̆n gô pơm thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 18
Kênh Youtube BHKTHN:
