Ntawv Nkauj 6:1-10
Nqe cim:
“Tus TSWV, thov koj hlub kuv, rau qhov kuv tabtom raug kev puastsuaj. Thov txhawb kuv lub zog; vim kuv lub zog ntaug tas lawm, tagnrho kuv lub cev raug txomnyem ua rau kuv lwj siab kawg li” (Ntawv Nkauj 6:2-3a)
Lus nug xav:
– Vajntxwv Daviv tabtom muaj tej teebmeem twg thiab tej kev cheemtsum twg?
– Hauv lub tsamthawj uas nyob ze nkaus kev tuag, nws ua dabtsi los daws tej teebmeem ntawd?
– Peb kawm tau dabtsi ntawm Vajntxwv Daviv tej lus thov Vajtswv?
Vajntxwv Daviv tabtom raug ntau yam kev txomnyem heev. Nws tabtom mob pw saum txaj, tagnrho nws lub cev raug mob, qaug zog kawg li, tej pob txha tsis muaj zog, ob lub qhov muag plooj zuj zus,… Ntawm sab ntsujplig los nws pom zoo li tsis muaj zog, tu siab kawg, kua muag ntws tsis tu, nws hais tias “kuv quaj txhua hmo ua rau kuv lub txaj ntub kua muag tas”, vim yog txoj kev mob nkeeg thiab cov yeebncuab txoj kev hem nyob puagncig nws. Pom zoo li txoj kev tuag twb los ze nws heev, tiamsis Vajtswv yeej tseem nyob ntsiagto tsis teb nws tej lus quaj lus thov kev pab. Nws tus ntsujplig ntxhov siab heev kawg nkaus, vim nws tej kev txhaum yav dhau los tabtom tshwm tawm. Puas yog tej kev txomnyem uas nws tabtom raug yog nujnqi ntawm tej txhaum uas nws tau ua dhau los?
Vajntxwv Daviv paub hais tias Vajtswv yog tus ncajncees Nws yeej txiav txim yog rau neeg qhov kev txhaum. Yog Vajtswv txiav txim raws li txhua tus neeg tej kev txhaum, leejtwg yuav muaj peevxwm sawv taus tabmeeg ntawm Vajtswv txoj kev chim? Txawm li ntawd los, Vajntxwv Daviv ntseeg hais tias Vajtswv puv npo txoj kev hlub tshua, nws tsuas thov Vajtswv tshem Vajtswv txhais tes rau txim kom sib me ntsis rau nws uas yog tus neeg tais caus (hèn nhát), muaj kev txhaum thiab qaug zog, nws hais tias: “Tus TSWV, thov koj tsis txhob chim thiab cem kuv! Tsis txhob chim thiab rau txim rau kuv!” (nqe 1). Vajtswv yog tus txiav txim ncajncees rau kev txhaum, yog tus kho zoo mob ntawm sab nqaij tawv, kho dua tshiab sab ntsujplig thiab cawm nws dim ntawm yeebncuab kev caum tua.
Hauv lub tsamthawj uas nyob ze nkaus kev tuag, Vajntxwv Daviv tsis cia siab rau ib tug vajtswv cuav lossis ib tug neeg twg li. Nws cia siab rau Vajtswv txoj kev hlub, nws ua siab ntev, quaj thov thiab tos ntsoov Vajtswv txoj kev pab cawm. Nws thov Vajtswv pub kom muaj sia nyob ntxiv, nws yuav rov nco txog Vajtswv txiaj ntsig thiab ua Nws tsaug (nqe 5). Xaus ntawm Phau Ntawv Nkauj tshooj 6, nws tau txais Vajtswv kev nplij siab, vim Vajtswv twb hnov thiab teb nws tej lus thov lawm. Vajtswv yuav cawm nws dim thiab yuav ua rau nws cov yeeb ncuab txajmuag.
Hauv txoj kev mob nkeeg thiab yeebncuab txoj kev caum tua, Vajntxwv Daviv los cuag Vajtswv ntawm nws tus neeg tseeb tseeb, nws tsis npog txoj kev ntshai raug txiav txim, kev qaug zog ntawm lub cev, siab ntsws thiab sab ntsujplig. Qhov zoo ntawm nws yog tso siab thiab tuav ruaj Vajtswv txoj kev hlub uas loj kawg nkaus. Nws muaj lub siab loj thov Vajtswv tshem Vajtswv txhais tes rau txim, kho nws tej mob zoo thiab cawm nws dim ntawm yeebncuab txhais tes. Nws ntseeg thiab tau saj Vajtswv txoj kev hlub tshua, kev pab cawm. Vajntxwv Daviv tej lus quaj thov Vajtswv yog ib zaj kawm rau peb thaum peb ntsib teebmeem hauv kev ua neej.
Thov Vajtswv,
Vajtswv, nyuam yaus qhuas Koj vim Koj yog tus ncajncees thiab muaj kev hlub. Koj tsis txiav txim rau nyuam yaus raws li nyuam yaus txoj kev txhaum, tiamsis Koj muab Koj txoj kev hlub uas loj kawg nkaus los cawm nyuam yaus dhau los ntawm Tswv Yexus Khetos cov ntshav. Thov Vaj Leej Txiv Koj kho nyuam yaus tej kev mob nkeeg, pab nyuam hla dhau tej kev txhawj hauv kev ua neej thiab kho txoj kev sib txuas nrog Koj thiab tibneeg. Nyuam yaus tuav Tswv Yexus Khetos lub npe thov, Amees.
Txoj kev txomnyem thiab txoj kev ntxhov siab loj kawg nkaus uas peb tau saj lawd yog dabtsi thiab ua li cas?
Nyeem Vajluskub hauv peb lub xyoos: Tshwmsim 18.
Kênh Youtube BHKTHN:
