Mathais 24:14
Nqe cim:
“Thaum muaj neeg mus qhia Txojmoo Zoo uas hais txog Ntuj Ceebtsheej mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg” (Mathais 24:14)
Lus nug xav:
– Tswv Yexus hais ntxiv txog lub cim twg thaum ntiajteb yuav kawg?
– Muaj yam dabtsi tshwjxeeb nyob hauv lub cim no?
– Zaj kawm no qhia rau peb txog feem xyuam yus ua zoo li cas?
Lub cim kawg uas Tswv Yexus hais tias yuav tshwm muaj nyob rau tiam kawg, yog kev nthuav qhia Txojmoo Zoo. Txij thaum Tswv Yexus samhwm rau cov thwjtim “Nej cia li mus thoob plaws lub ntiajteb no thiab qhia Txojmoo Zoo kom sawvdaws hnov” (Malakaus 16:15), cov thwjtim thiab cov ntseeg nyob txhua tiam siv zog ua tes haujlwm qhia Txojmoo Zoo no, tiamsis txog lub sijhawm kawg kev qhia Moo Zoo mus thoob qab ntuj tagnrho peb tsis tau pom dua li.
Lo lus “qhia Txojmoo Zoo kom sawvdaws hnov” tsis tau txhais tias muaj neeg los ntseeg tus Tswv coob, tiamsis muaj lub ntsiab tias ntau leej nyob hauv ntiajteb no muaj sijhawm hnov qhia Txojmoo Zoo cawm dim, paub Tswv Yexus yog tus Cawmseej. Yeej yuav muaj ib txhia txais yua Tswv Yexus Txojmoo Zoo. Nov yog ib qhov zoo txawm yog muaj tej kev qhia cuav, khetos cuav, tsovrog, mob nkees thiab kev puastsuaj loj heev, cov ntseeg tseeb yuav raug kev tsimtxom hnyav heev, cov kev ntseeg tsis khov yuav tso kev ntseeg tseg…, los Yexus Khetos Txojmoo Zoo tseem yuav qhia mus, yuav tsis muaj cov neeg uas hais tias peb tsis tau hnov qhia kev cawm dim. Qhov no yog lub sijhawm kawg thiab zoo tshaj rau txhua haivneeg, thiab kuj yog koob hmoov hlub kawg los saum ntuj ceebtsheej los, vim kiag tom qab ntawd tim koob hmoov yuav xaus, sijhawm cawm dim yuav tsis muaj lawm, vim thaum ntawd yog lub sijhawm kawg lawm.
Pawg Ntseeg Vajtswv nimno yuav tsum siv zog ua tes haujlwm cawm neeg thaum tseem muaj sijhawm, vim Timthawj Paulus qhia rau peb paub: “Rau qhov tshuav tsis ntev yuav tsis muaj neeg xav mloog Vajtswv Txojlus lawm. Lawv yuav ua raws li lawv lub siab nyiam xwb, thiab lawv yuav mus nrhiav ntau tus xibhwb los qhia tej zaj uas sawvdaws nyiam mloog” (II Timautes 4:3). Peb kuj zeem paub tias los ntawm tej kev vammeej huab cua tiamno, ces tej chaw toj siab, deb kev nyob hauv ntiajteb no kuj yuav hnov Txojmoo Zoo. Peb tabtom nyob ze ntu sijhawm Txojmoo Zoo qhia mus thoob qab ntuj, dua li peb kuj ua timkhawv qhia cov neeg uas tsis tau paub tus Tswv, peb kuj tsobhwb, saib xyuas cov ntseeg uas qaug zog kom lawv “yuav tsum tuaj ua ke mloog lus qhuab qhia tsis txhob tso tseg, ib yam li muaj qee leej tau tso tseg lawm. Nej puavleej paub hais tias twb yuav txog hnub uas Yexus rov qab los. Yog li ntawd peb ib tug hajyam yuav tsum txhawb ib tug lub zog heev dua qhov qub” (Henplais 10:25), rau qhov peb paub tias thaum tiam koob hmoov xaus ces lub sijhawm cawm dim yuav tsis muaj lawm.
Thov Vajtswv,
Vajtswv tus muaj kev hlub, thov Koj qhia kom nyuam yaus paub hlub Koj thiab hlub neeg, Koj pab kom nyuam yaus thiab Pawg Ntseeg rau siab qhia Txojmoo Zoo rau tej neeg nyob ibncig mus txog thaum tiam koob hmoov xaus. Nyuam yaus tuav Tswv Yexus lub npe thov, Amees.
Peb puas siv zog ntsos ua tes haujlwm qhia Txojmoo Zoo lawm tau?
Nyeem Vajluskub hauv peb lub xyoo: Tshwmsim 8
Kênh Youtube BHKTHN:
