Tơdrong Pơđơ̆k 27:1-2
“Nĕ pơư kơ năr dơning, Yua kơ ih ưh kơ băt năr dơning sư jing liơ.” (Pơđơ̆k 17:1)
Nơ̆r jet tơchĕng pơwao:
– Yua kơ kiơ ưh kơ gơh ôh pơang kơ tơdrong năr dơning?
– Pơtao Sôlômôn bơtho kon sư thoi yơ gah tơdrong iŏk đon ala?
– Pơm thoi yơ wă kơ bơ̆n pơyơ̆r tơdrong ư-ang kơ’Bok Kei-Dei,ưh kơ chơchă wă kơ đe pơ-ư kơ bơ̆n?
Chăl arih bơ̆n âu ưh kơ dơnơ̆ng, yua kơ thoi noh na bơ̆n ưh kơ gơh ôh pơang, ưh kơ gơh ôh pơma pơ-ư kơdih akâu.Pơtao Sôlômôn tơbăt wă kơ bơ̆n kơchăng ‘nĕ kơ dêh hnang lui ngeh kơ tơdrong tơ anăp. Kon bơngai bơ̆n mă khan bơ̆n gơh pơm tơdrong kiơ, băt tơdrong kiơ,bơ̆n gơh pơm dah bơ̆n hlôh băt noh tŏ sĕt đĕch, kơđeh ‘bơ̆t dâu đĕch, bơ̆n ưh kơ băt lê̆ adrol tơdrong kiơ wă truh kơ bơ̆n tơ anăp noh ôh. Lăm trong 1 chih khan “Năr dơning”, nơ̆r năr dơning noh wă pơma kơ dôm lu tơdrong hơmĕng tơ anăp, pơtih thoi: Jang đei yua tih, mơdrŏng sah, pơm tih, tơblah kĕ jei.v.v…, mă-lei ‘nĕ kơ pơư pơang yua kơ dôm tơdrong hơmĕng noh tŏ sĕt đĕch kơbĭ dôm yơ. Tơdah tơ anăp ‘nei dơning dơmônh hloi bơih lei’bônh kơ‘bôh ră mă-lei dôm tơdrong hơmĕng‘noh hei ưh kơ lăm tơdrong kon bơngai bơ̆n pơgơ̆r wei lăng,tơdrong‘noh khan đei tơpă lei ưh‘mơ̆i,pơma kơ kiơ tơ anăp ‘nei tơ ataih dêh hloi lei kang rai ưh kơ đei tơpă dơ̆ng.’Bok bơtho anăn sư Wiliam Mckane chih roi khan minh ‘nu bơngai hơgei thoi âu: “ưh kơ gơh ôh chă pơma sa, dah chă đon wă jang wă pơm nhen thoi sư gơh pơgơ̆r tôm đơ̆ng tơdrong arih sư truh tơ tơdrong sư wă jang pơm tơ anăp noh.” Mă loi, bơngai hơgei, sư lui gơnang kơ Kră Yang‘Bok Kei-Dei gô ăn tơdrong arih gơh jing kiơ̆ thoi tơdrong tơpăt hơnơ̆ng Sư păng Sư pơrăm lê̆ dôm tơdrong kon bơngai chă đon wă jang pơm ưh kơ lăp hăm tơdrong Sư pơgơ̆r tơpăt hơnơ̆ng noh. Pơư kơ năr dơning noh tơ’bôh jơhngơ̆m pơang păng gơnang kơ akâu kơdih,ưh kơ gơnang kơ’Bok Kei-Dei. Bơngai hơgei tơpă, sư arih rim năr noh arih hăm đon lui, băt kơnăl kơ tôm tơdrong jang noh lăm tơdrong Kră Yang pơgơ̆r ngăl.
Tơtil kơ ‘noh hei, Pơtao Sôlômôn pơma hơđăl rơđah gah tơdrong iŏk đon ala noh tơdrong kăl kơ pơma hloh kơ pơma pơư kơ akâu kơdih.
Lăm trong 2 khan: “Lê̆ kơ đe pơư kơ ih, kơdih akâu ih ‘nĕ kơ pơma ‘bơm.Lê̆ kơ đe pơư pơma, tơ’ngla ih ‘nĕ yua ‘bơ̆r ih kơdih ôh.” Mưh bơ̆n pơư chă roi kơ đe tơdrong bơ̆n jang pơm keh ‘lơ̆ng,bơ̆n’bônh kơ huŏng lăm tơdrong pơang păng’bônh kơ huŏng lăm tơdrong pơma pơăm pơhloh. Bơ̆n kăl kơ’blŏk, Kră Yang areh dêh kơ lu bơngai pơang (Hơriso5:5). Bơngai pơư kơ akâu kơdih, kon pơlei pơla tơring tơrang kư̆m lăng ưh kơ iă, ưh kơ nhop, pơdê, lăng ưh kơ gĭt mơ̆n…Mưh bơ̆n pơư kơdih,pơư hloh kơ ai, lei ‘noh bơ̆n kơdih tơjruh lê̆ tơdrong mă đe lui ngeh kơ bơ̆n noh jing đe pă lui ngeh kơ bơ̆n bơih, đe lăng’bôh bơ̆n arih ưh kơ thoi nơ̆r‘bơ̆r bơ̆n pơma.Mă-loi sư, tơdrong pôk atŏk akâu,pôk hăm tơdrong pơư kơdih noh phŏ kơnh tưk lê̆ bơ̆n dơ̆ng’bơ̆t anih hloh kơ tơdrong bơ̆n kĕ, pơm kơ bơ̆n jing mơlâu hlơ̆l kơ đe, păng dôm tơdrong bơ̆n jang pơm lăm chăl arih bơ̆n ‘nâu ưh kơ kĕ, ưh kơ jing.’Lơ̆ng hloh, lê̆ kơ đe pơư pơyom kơ bơ̆n yua kơ lu sư’bôh dôm tơdrong ‘lơ̆ng bơ̆n jang pơm lĕch đơ̆ng jơhngơ̆m đon’lơ̆ng bơ̆n noh, ưh kơ trŏ đơ̆ng nơ̆r’bơ̆r bơ̆n wă kơ đe khŏm pơyom kơ bơ̆n noh ôh.
‘Bok Kei-Dei gĭt kăl kơ jơhngơ̆m iŏk đon ala.Bơ̆n kon pơlei Kră Yang,bơ̆n athei arih iŏk đon ala, păng lui gơnang, pơm kiơ̆ Nơ̆r Kră Yang bơtho. Dôm tơdrong tơdă hơmet lăm chăl arih, athei chă đon,chă trong dan hơmet mă hơgei, mă-lei ling-lang pơjao dôm tơdrong noh kơ’Bok Kei-Dei wă kơ Sư tơgŭm bơ̆n jang keh. Bơ̆n athei awih awăn kơ Kră Yang mă tơnăp, ưh kơ chơchă wă kơ đe lăng hnhoi dah wă kơ đe pơư kơ bơ̆n ôh.’Bok Kei-Dei bơih Tơ’ngla chĕp wei tơdrong arih tơ anăp păng Sư kư̆m Tơ’ngla apah bơnê kơ lu bơngai mă iŏk đon ala.
Kơkuh kơ Ih Kră Yang, apinh Ih lăng lăng jơhngơ̆m inh. Apinh Ih ăn kơ inh gơh hơgei wă kơ inh băt kơnăl kơ tơdrong ưh tơpă,tơdrong hơlĕnh pơdăr lăm chăl arih inh, păng apinh ih bơwei inh huay kơ‘leh hơđong lu bơngai pơma nơ̆r hiôk rơngơp’bĕnh kơ tơdrong chă đon pơhlŭ pơrăm.Apinh Ih tơgŭm inh đơ̆ng nơ̆r pơma truh tơ arih sa, ling-lang tơ’bôh tơdrong iŏk đon ala,tơ’bôh tơdrong inh lui gơnang kơ Ih.Inh krao khan yua Anăn Kră Yang Yêsu Krist, Amen!
Bơ̆n pơma nơ̆r tơpă tơpăt,nơ̆r’bĕnh tơdrong’mêm mơnat,nơ̆r tơgŭm tơiung thoi yơ?
Đŏk Sơ̆p Hla bơar’Bok Kei-Dei lăm pêng sơnăm: Tơdrong tơ’bôh 7
Kênh Youtube BHKTHN:
