Yausuas 3:1-5
Nqe cim:
“Nej cia li tu nej lub siab, rau qhov tagkis tus Tswv yuav ua tej txujci tseemceeb rau nej pom” (Yausuas 3:5)
Lus nug xav:
– Yausuas thiab cov pejxeem sawv ntxov los ua dabtsi?
– Yausuas nqua hu cov pejxeem yam dabtsi?
– Peb cheemtsum ua dabtsi kom pom “tej txujci tseemceeb” uas tus Tswv ua rau peb lub neej thiab kev ua Vajtswv haujlwm?
Ntawm Akaxias, Yausuas sawv ntxov coj cov neeg Yixalayees mus ntsug kev kwvlam li 11 kilumev, raws ntug dej Yaladees thiab tsa tsev ntaub rau qhov ntawd npaj yuav hla dej mus rau sab tid. Tom qab ntawd peb hnub, cov thawj ntawm cov nomtswv mus txhua nrho lub yeej tubrog thiab hais rau cov pejxeem kom yuav tsum raws cov povthawj kwv lub Phijxab qab. Txoj cai samhwm kom lawv yuav tsum mus nrug deb lub Phijxab kwvyees li ob txhiab tshim kom “thiaj paub kev mus” (nqe 4). Yog tagnrho cov pejxeem nyob puagncig lub Phijxab ces yuav ntsia tsis pom mus rau ntawm lub Phijxab thiab raws tsis tau lub Phijxab. Vim qhov ua li no lawv thiaj mus tau txojkev uas lawv “tsis tau mus dua” (nqe 4) thiab ntsia pom tej txujci tseemceeb uas tus Tswv faib dej ua ob sab. Dua li ntawd, lub Phijxab piv txog Vajtswv nyob hauv lawv, yog li cov pejxeem yuav tsum nyob nrug deb saib taus Nws txojkev dawbhuv (II Xamuyees 6:6-7).
Cia kom npaj tau hla dej mus sab tid, Yausuas nqua hu cov pejxeem: “Nej cia li tu nej lub siab, rau qhov tagkis tus Tswv yuav ua tej txujci tseemceeb rau nej pom” (nqe 5). Kev dawbhuv yog qhov cheemtsum cov pejxeem yuav tau muaj kom pom tus Tswv ua txujci tseemceeb. Hnub thaud, Vajtswv nqua hu cov neeg Yixalayees yuav tsum tu tus kheej dawbhuv tos tus Tswv los ntsib lawv saum roob Xinais. Lub sijhawm ntawd lawv yuav tsum tswj tus kheej kom dawbhuv, ntxhua lub tsho ntev, tsis nrog pojniam pw (Khiavdim 19:10-15). Ua ntej tau tus Tswv foom koob hmoov, Yakhauj kuj hais rau nws tsevneeg “ntxuav kom nej huv” (Chivkeeb 35:2), yuav tsum rhuav lwm haivneeg tej mlom thiab hloov tsho ntev. Thaum tus tswv yuav ua haujlwm loj rau Nws haivneeg ces lawv yuav tsum muaj kev tu tus kheej ua ntej (Teev Npe 11:18), yuav tsum cais tawm tej kev tsis dawbhuv, txhua yam uas yuav ua qias rau txojkev sib raug zoo ntawm lawv thiab Vajtswv tus uas dawbhuv. Lawv yuav tsum ntxhua ris tsho kom huv, tswj tus kheej dawbhuv, tseg qee yam kev noj haus tsis huv… Tagnrho tej no yog hais txog lub neej thiab lub siab dawbhuv cheemtsum muaj thaum los cuag tus Tswv.
Nimno, txawm yog Vajtswv tsis muab dej faib ua ob sab rau peb mus los Nws yeej tseem ua tej “txujci tseemceeb” pab kom peb tiv dhau tej kev nyuaj, txomnyem hauv kev ua neej lossis ua Vajtswv haujlwm. Qhov uas Vajtswv hais kom Nws haivneeg ua lub neej dawbhuv thaum ub los txog tamsim no los yeej tsis hloov li. Cia kom peb pom tej txujci tseemceeb uas tus Tswv ua, peb yuav tsum muaj kev npaj thiab tu tus kheej kom dawbhuv. Cia li los cuag tus Tswv thiab kawm Nws Txojlus, thov Vajtswv ntxuav thiab zam txim rau peb, qaij deb tej kev txhaum thiab tej uas tsis haum Nws siab (I Yauhas 1:7, 9).
Thov Vajtswv,
Vajtswv, thov Koj ntxuav kom nyuam yaus dawbhuv, nyuam yaus thiaj pom tej txujci tseemceeb uas koj nyob hauv nyuam yaus lub neej. Thov Koj pab kom nyuam yaus paub qaij tej kev phem kev qias ua tsuas txojkev sib raug zoo ntawm nyuam yaus thiab Koj. Nyuam yaus tuav Tswv Yexus lub npe thov, Amees.
Peb twb pom tej haujlwm loj uas tus Tswv ua rau peb lawm tau?
Nyeem Vajluskub hauv peb lub xyoo: Tshwmsim 5
Kênh Youtube BHKTHN:
