Klei Aê Diê Blŭ: III Y-Yôhan 1:1-4
Êlan kliăng: “Kâo amâo dưi mâo klei mơak hĭn ôh kơ klei kâo hmư̆ kơ phung anak kâo êbat hlăm klei sĭt nik” (III Y-Yôhan 1:4)
Klei êmuh ksiêm mĭn: Ya mta klei khua ƀĭng kna Y-Yôhan wah lač brei kơ anak hlăm klei hdĭp myang ñu? Ya mta klei bi mơak kơ ñu hĭn? Ya klei mñă kơ drei hlăm hruê Mpŭ kơ Amĭ Ama thŭn anei?
Khua ƀĭng kna Y-Yôhan čih hră anei mơĭt kơ Y-Gaius jing mah jiăng, jing anak hlăm klei hdĭp myang, ñu khăp snăk. Ñu kčưm dơ̆ng hŏng klei kkuh čhưn hŏng klei khăp: “Ơ pô kâo khăp”. Tui čuê jing klei wah lač brei kơ Y-Gaius mâo klei čăt đĭ hlăm jih jang bruă, “leh anăn čiăng kơ ih mâo klei suaih asei mlei wăt mngăt ih msĕ mơh. Kâo thâo jing jăk leh hŏng mngăt ih” (êlan 2). Klei wah lač ênưih ênang anei brei ƀuh klei khua ƀĭng kna Y-Yôhan yap yuôm êlâo hĭn jing klei suaih hlăm mngăt ai tiê, hĭn kơ klei suaih hlăm kđeh asei mlei amâodah klei tŭ jing ti lăn ala.
Khua ƀĭng kna Y-Yôhan hơ̆k mơak kyuadah ñu thâo kơ klei Y-Gaius “dôk sĭt suôr hlăm klei sĭt nik, msĕ si ih êbat leh hlăm klei sĭt nik” (êlan 3). “Êbat leh hlăm klei sĭt nik” mblang jing dôk hdĭp ênuah ênô, gưt asăp Klei Aê Diê Blŭ, leh anăn bi êdah Yang Krist hlăm knhuah dôk hdĭp grăp hruê. Hŏng khua ƀĭng kna Y-Yôhan, klei sĭt nik amâo khnŏng jing klei đăo djŏ ôh, ƀiădah wăt hlăm knhuah dôk hdĭp bi mjing mơ̆ng Klei Mrâo Mrang Jăk. Kyuanăn, khua ƀĭng kna čih hưn bi êdah ai tiê ñu: “Kâo amâo dưi mâo klei mơak hĭn ôh kơ klei kâo hmư̆ kơ phung anak kâo êbat hlăm klei sĭt nik” (êlan 4).
Khua ƀĭng kna Y-Yôhan dôk blŭ hŏng Y-Gaius msĕ si sa čô ama klei hdĭp myang, leh anăn klei blŭ ñu bi êdah klei hmăng hmưi mơ̆ng phung amĭ ama huĭ mpŭ kơ Aê Diê msĕ mơh. Jih jang amĭ ama hmăng hmưi sơăi kơ phung anak pô mâo klei suaih asei mlei, tŭ jing, hơĭt ênang leh anăn jăk mơak. Ƀiădah mta klei yuôm hĭn jing klei čăt đĭ hlăm mngăt. Phung anak drei dôk hdĭp hlăm lăn ala bŏ hŏng lu mta klei mĭn soh wê. Amĭ ama brei mâo klei hdĭp bi hmô leh anăn uêñ mĭn mtô lač kơ phung anak klei sĭt nik hlŏng lar mơ̆ng Klei Aê Diê Blŭ. Klei đăo dưi bi lar jăk hĭn amâo djŏ knŏng hŏng klei atăt gai ôh, ƀiădah wăt hŏng knhuah dôk hdĭp bi hmô. Tơdah phung anak ƀuh amĭ ama êbat hlăm êlan klei sĭt nik: blŭ hrăm sĭt kpă, thâo pap brei, hur har wah lač, sĭt suôr mă bruă…, diñu srăng hriăm klei hriăm si klei đăo hdĭp jing.
Hlăm hruê Mpŭ kơ Amĭ Ama thŭn anei, akâo Khua Yang brei phung amĭ ama uêñ mĭn lu hĭn kơ klei hdĭp mngăt phung anak. Jing phung anak, brei drei thâo ƀuh ai tiê hmăng hmưi amĭ ama, đăm ôh tui hlue klei lăn ala dôk tui tiŏ. Brei hdơr snei, phung anak hruê anei srăng jing amĭ ama hruê êdei. Brei mpŭ, thâo khăp leh anăn ngă lu mta klei jăk hĭn čiăng bi mơak kơ amĭ ama. Đăm wơr bĭt ôh wah lač brei kơ klei hdĭp mngăt leh anăn klei suaih asei mlei kơ amĭ ama, čiăng kơ Khua Yang brei kơ amĭ ama klei čăt đĭ hlăm mngăt leh anăn wăt hlăm kđeh asei mlei msĕ mơh. Akâo Khua Yang brei gŏ sang drei jing sa boh gŏ sang jăk mơak leh anăn mnuih mkăn srăng ƀuh Khua Yang hŏng knhuah dôk hdĭp gŏ sang drei.
Ya klei drei ngă kơ amĭ ama hlăm hruê Mpŭ kơ Amĭ Ama thŭn anei?
Wah lač: Ơ Khua Yang, brei klei hdĭp myang kâo čăt đĭ hlăm Khua Yang, leh anăn êbat hlăm klei sĭt nik Khua Yang kluôm jih klei hdĭp kâo. Akâo Khua Yang đru hmei, amĭ ama leh anăn phung anak, thâo bi uêñ mĭn kơ hdơ̆ng hmei, čiăng kơ gŏ sang kâo bi guh kơang kơ Anăn Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 96-97
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
