III Yauhas 1:1-4
Nqe cim:
“Tsis muaj ib yam dabtsi ua rau kuv zoo siab tshaj qhov uas kuv hnov hais tias kuv cov menyuam ua lawv lub neej raws li qhov tseeb.” (III Yauhas 1:4)
Lus nug xav:
– Timthawj Yauhas thov Vajtswv txog yam dabtsi rau nws tus tub sab ntsujplig?
– Yam uas nws zoo siab tshaj plaws yog dabtsi?
– Peb tau qhuab ntuas txog dabtsi hauv hnub Hwm Niam Hwm Txiv xyoo no?
Timthawj Yauhas sau tsab ntawv no rau Nkayus uas yog nws tus phoojywg, kuj yog nws tus tub sab ntsujplig uas nws hlub heev. Nws pib los ntawm lo lus nyob zoo uas sov siab heev hais tias: “Tus phoojywg uas kuv hlub”. Txuas ntxiv yog lo lus thov Vajtswv pub rau Nkayus kom vam meej hauv txhua yam, nws hais tias: “kuv thov Vajtswv pab koj noj qab nyob zoo thiab muaj txhua yam zoo, ib yam li koj tus ntsuj plig nyob zoo” (nqe 2 HMOWSV). Lo lus thov Vajtswv no qhia hais tias Timthawj Yauhas saib kev muaj zog sab ntsujplig tseemceeb dua sab nqaij tawv thiab txhua yam hauv lubneej.
Timthawj Yauhas zoo siab kawg li rau Nkayus, nws hais tias: “koj muab siab rau ua raws li Vajtswv txojlus uas yog qhov tseeb, ib yam li koj ibtxwm ua los lawm” (nqe 3). “Muab siab rau ua raws li Vajtswv txojlus uas yog qhov tseeb” txhais tau hais tias ua lub neej ncaj ncees, mloog Vajtswv Txojlus, thiab ua qhia tshwm tus Cawmseej hauv lub neej txhua hnub. Raws li Timthawj Yauhas, qhov tseeb tsis tsuas yog txojkev ntseeg uas tseeb meej xwb tiamsis tseem yog ib txojkev ua neej uas tau Txojmoo Zoo tsim tsa los. Vim li ntawd, Timthawj Paulus thiaj sau lo lus tawm hauv nruab siab tuaj hais tias: “Tsis muaj ib yam dabtsi ua rau kuv zoo siab tshaj qhov uas kuv hnov hais tias kuv cov menyuam ua lawv lub neej raws li qhov tseeb” (nqe 4).
Timthawj Yauhas tabtom hais rau Nkayus li ib leej txiv sab ntsujplig, thiab nws tej lus kuj qhia tshwm yam uas cov niam txiv hwm Vajtswv lub siab ntshaw tshajplaws. Niam txiv leejtwg los puavleej ntshaw kom lawv cov menyuam muaj zog, vam meej, nyob kaj siab thiab muaj kev zoo siab. Tiamsis qhov tseem ceeb tshaj plaws yog sab ntsujplig muaj kev vam meej. Peb cov menyuam tabtom nyob hauv ib lub ntiajteb uas puv nkaus tej kev xav yuamkev. Niam txiv yuav tsum ua qauv zoo hauv lubneej thiab mob siab qhia menyuam txog qhov tseeb tsis pauv hloov hauv Vajtswv Txojlus. Txojkev ntseeg tau qhia tshwm zoo tshaj plaws tsis yog dhau ntawm kev qhia xwb tiamsis yog dhau ntawm tus qauv ua neej. Thaum menyuam pom niam txiv taug raws qhov tseeb xws li: hais lus tseeb, txaus siab zam txim, thov Vajtswv tsis tseg, ncaj ncees ua haujlwm rau tus Tswv…, ces lawv yuav kawm tau txojkev ntseeg uas ciaj sia yog zoo licas.
Nyob hauv hnub Hwm Niam Hwm Txiv xyoo no, thov tus Tswv pub kom niam txiv mob siab ntau dua rau cov menyuam lubneej sab ntsujplig. Yog menyuam, peb yuav tsum pom niam txiv lub siab ntshaw, txhob taug neeg ntiajteb tej kev nyiam sab nraud. Yuav tsum nco ntsoov hais tias, cov menyuam hnub no yuav los ua niam txiv rau hnub tom ntej. Cia li hwm, hlub thiab ua yam uas zoo tshaj plaws thiaj yuav coj tau kev zoo siab los rau niam txiv. Kuj tsis txhob hnov qab thov Vajtswv rau niam txiv lub neej sab ntsujplig thiab sab nqaij tawv kom tau txais kev vammeej sab ntsujplig thiab muaj zog sab nqaij tawv. Thov tus Tswv pub kom peb tsev neeg yuav yog ib tsev neeg uas muaj koob hmoov thiab lwm tus yuav pom tus Tswv dhau ntawm peb tsev neeg lub neej.
Thov Vajtswv,
Tus Tswv, thov kom nyuam yaus sab ntsujplig vam meej hauv Koj, thiab taug raws Koj qhov tseeb mus tas simneej. Thov pab peb, cov uas yog niam txiv thiab menyuam txawj sib hlub sib pab kom nyuam yaus tsev neeg niaj hnub ua rau Koj lub npe tau koobmeej. Nyuam yaus tuav Tswv Yexus Khetos lub npe thov, Amees.
Peb ua dabtsi rau peb niam peb txiv hauv hnub Hwm Niam Hwm Txiv xyoo no?
Nyeem Vajluskub hauv peb lub xyoos: Ntawv Nkauj 96-97
Kênh Youtube BHKTHN:
