Hơriso 22:1-18
“Ơ Kră Yang ‘Bok Kei-Dei! Kră Yang ‘Bok Kei-Dei ơi! Liơ Ih achăng lê̆ inh? Yua kơ kiơ Ih dơ̆ng tơ ataih, Ưh kơ tơgŭm dŏng inh, ưh kơ mơ̆ng nơ̆r inh ôr krao?” (Hơriso 22:1)
Nơ̆r jet tơchĕng pơwao:
– Yang Bơhngol ‘Lơ̆ng tơ’bôh kơ Pơtao Đawit băt lê̆ adrol thoi yơ gah tơdrong Kră Yang Yêsu chu lôch pơmat tơ ‘long pơglang?
– Kră Yang hơmet tơdrong dŏng pơklaih đei tơ’bôh tơdrong tơpăt păng tơdrong iơ̆m dim Sư thoi yơ?
– Lu bơ̆n tơ’bôh jơhngơ̆m băt bơnê kơ Kră Yang thoi yơ đơ̆ng ‘bai pơhrăm năr ‘nâu?
Nơ̆r ‘Bok Kei-Dei lăm Hơriso 22:1-18, lu bơ̆n băt hơđăl Pơtao Đawit sư kư̆m khan lê̆ adrol (Tơdrong jang 2:30). Dang minh rơbâu sơnăm adrol kơ Kră Yang Yêsu jur, Pơtao Đawit đei tơ’bôh ăn wă chih Sơ̆p hla bơar Hơriso pơma hơđăl trŏ gah tơdrong Kră Yang Yêsu chu pơmat, Yang Mêsi tơ ‘long pơglang, mă khan jơ hnơr ‘noh sơ̆ dêh char Rôm tam mă đei tơdrong blĕk păng Pơtao Đawit ưh kơ đei băt kiơ gah tơdrong juăt char Rôm pơlôch pơ̆ng kơđinh tơ ‘long pơglang.
Lăm Sơ̆p hla bơar Hơriso ‘nâu, Pơtao Đawit tơ’bôh jơhngơ̆m mơn kơ đei achăng lê̆ “Ơ Kră Yang ‘Bok Kei-Dei, Kră Yang ‘Bok Kei-Dei ơi! Liơ Ih achăng lê̆ Inh” (trong 1). ‘Nâu bơih tơdrong khan lê̆ adrol jơ Kră Yang Yêsu krao ôr re nơ̆r ‘noh tơ ‘long pơglang (Mathiơ 27:46). Kơplah ‘noh, Kon ‘Bok Kei-Dei ưh kơ đei yoch pŭ iŏk tôm tơdrong yoch kon bơngai, kơlih kơ thoi ei tơdrong ‘lơ̆ng pôm jơhngơ̆m lăm Yang ‘Bă păng Yang Kon đei pơgăn lê̆ đơ̆ng tơdrong tơpăt Kră Yang hil mĭl. Hơriso 22 roi tơ’bôh pơdeh tôm tơdrong Kră Yang Yêsu chu pơmat đơ̆ng lăm lơ tơdrong: Đe pơjăm Kră Yang păng pơm kơnê̆: “Dah bu ‘bôh inh lu sư hiĕk ăr. Lu sư gô pơ pơm ‘bơ̆r cheng păng tơtreh kơ̆l (trong 7). Kră Yang jĭ pơmat gah akâu jăn: “Inh thoi đak đe tuh, đĭ kơting inh pă đei tơklep băl. Plei nuih inh thoi jrĕnh, lek đĭ tơ lăm kơtơh inh. 15 Jơhngơ̆m pran inh kro thoi lơ̆n ‘buh păng hơpiĕt inh klep tơ păk’ngơk. Kră Yang dan inh tơ lăm ‘mui teh thoi lôch.” (trong 14-15). Tơpang ti păng jơ̆ng Kră Yang đe ‘bet klĕch hloi: “Lu sư ‘bĕt klĕch ti păng jơ̆ng Inh bơih” (trong 16). Lu linh iŏk ao Yêsu wă hlang lăng: “Lu sư asong băl hơbĕn ao, hlang lăng ao tai Inh” (trong 18). Tôm tơdrong ‘noh blep trŏ ‘bơ̆t ‘long pơglang.
Đơ̆ng lăm Hơriso 22, lu bơ̆n ‘bôh tơdrong dŏng pơklaih Kră Yang dan hơmet. Tơdrong tơpăt Kră Yang, tơdrong yoch gô phak tơpă, na Kră Yang Yêsu pŭ iŏk tơdrong phak ‘noh tơplih kơ lu bơ̆n. Tơdrong ‘mêm Kră Yang ‘Bok Kei-Dei tih tơpă, na Sư mah ăn Kon Pôm Sư pơm tơmam soi ăn kơ lu bơ̆n. Tơdrong Kră Yang chu pơmat kăl dêh tơpă păng gĭt kăl Dŏng Pơklaih. Yua kơ đơ̆ng Kră Yang jĭ pơmat, na lu bơ̆n hiôk hơđơ̆ng, yua kơ đơ̆ng Sư pŭ iŏk tơdrong yoch bơ̆n, na lu bơ̆n gơh pơ’lơ̆ng dih băl; yua kơ đơ̆ng jĭ rơka Kră Yang, na lu bơ̆n gơh klaih ‘lơ̆ng. ‘Long pơglang tơ’bôh tơdrong ‘lơ̆ng tơpăt păng tơdrong ‘mêm Kră Yang ưh kơ đei layơ tơplih, ‘bar tơdrong ‘nâu tơ’bôh tơdrong ‘lơ̆ng tôm lăm Kră Yang Yêsu.
Apinh Yang Bơhngol ‘Lơ̆ng chông anhăk lu bơ̆n, arih băt bơnê păng ưang kơ Kră Yang, Yang mă lôch tang bơ̆n tơ ‘long pơglang.
Ơ Kră Yang Yêsu, inh bơnê kơ Ih Kră Yang yua kơ đơ̆ng tơdrong Ih chu pơmat păng lôch tơ ‘long pơglang na Ih mơnat kơ inh păng đơ̆ng noh inh băt tơdrong ‘mêm ‘Bok Kei-Dei. Apinh Ih tơgŭm inh rim năr arih hăm jơhngơ̆m băt bơnê păng hli yom kơ anăn Kră Yang mă dŏng pơklaih inh. Krao khan yua anăn Kră Yang Yêsu Krist, Amen.
Lu bơ̆n arih thoi yơ mưh bơ̆n băt Kră Yang ‘mêm kơ bơ̆n păng pơjao akâu Sư pŭ iŏk tơdrong yoch bơ̆n?
Đŏk Sơ̆p hla bơar ‘Bok Kei-Dei lăm pêng sơnăm: Đaniel 12
Kênh Youtube BHKTHN:
