Ntawv Nkauj 22:1-18
Nqe cim:
“Kuv tus Vajtswv, kuv tus Vajtswv, vim li cas koj tso kuv tseg lawm? Kuv tsa suab quaj thov koj pab, tiamsis koj tsis teb kuv tej lus thov?” (Ntawv Nkauj 22:1)
Lus nug xav:
– Vaj Ntsujplig tshoov Vajntxwv Daviv lub siab qhia tseg licas txog Tswv Yexus txojkev tuag txhiv saum ntoo khaublig?
– Vajtswv kev npaj tuag txhiv qhia pom Vajtswv txojkev ncaj ncees thiab siab zoo licas?
– Peb qhia tshwm nplooj siab ua tus Tswv tsaug licas dhau ntawm zaj kawm hnub no?
Dhau ntawm Ntawv Nkauj 22:1-18, peb pom meej hais tias Vajntxwv Daviv kuj yog ib tug cev Vajtswv lus thiab (Tes Haujlwm 2:30). Kwv yees li ib txhiab xyoo ua ntej Tswv Yexus los yug ua neeg, Vajntxwv Daviv twb tau Vaj Ntsujplig tshoov lub siab kom sau ib tshooj Ntawv Nkauj uas qhia tau raug nraim li Tswv Yexus txojkev txomnyem, tus Mexiyas raug ntsia saum ntoo khaublig, txawm yog tiam ntawd lub tebchaws Loos tsis tau muaj zog thiab Vajntxwv Daviv yeej tsis paub txog cov neeg Loos txojkev tua neeg los ntawm kev ntsia rau saum tus ntoo khaublig.
Hauv tshooj Ntawv Nkauj no, Vajntxwv Daviv qhia tawm kev xav thaum raug tso tseg tagnrho, nws hais tias: “Kuv tus Vajtswv, kuv tus Vajtswv, vim li cas koj tso kuv tseg lawm?” (nqe 1). Ntawm no yog lo lus qhia tseg txog lub sijhawm Tswv Yexus qw nrov nrov lo lus ntawd saum ntoo khaublig (Mathais 27:46). Lub sijhawm ntawd, Vajtswv Leej Tub tus uas tsis muaj txim raug ris tagnrho tibneeg ntiajteb tej kev txhaum, vim li ntawd qhov kev sib raug zoo uas txhij txhua ntawm Leej Txiv thiab Leej Tub thiaj li raug Vajtswv txojkev chim uas ncaj ncees thaiv cia. Ntawv Nkauj 22 piav meej heev txog Tswv Yexus txojkev txomnyem dhau ntawm ntau yam: Tus Tswv raug thuam thiab raug txajmuag: “Txhua tus uas pom kuv puavleej luag kuv plig, lawv hlev nplaig thiab co hau nto rau kuv” (nqe 7). Tus Tswv raug mob sab nqaij tawv: “Kuv lub zog ntaug tas ib yam li cov dej uas nchuav ntxaum rau hauv av lawm. Kuv tej pob qij txha pluam tas huv tibsi lawm, kuv lub siab yaj ua kua tas ib yam li ciab ntab… Koj tso kuv tuag xyab luas rau hauv cov hmoov av” (nqe 14-15). Tus Tswv txhais tes thiab txhais taw raug ntsia chob tshab plaws: “lawv nkaug kuv xib teg thiab kuv xib taws” (nqe 16 HMOWSV). Cov tubrog rho txheeb twv yuav tus Tswv lub tsho: “Lawv muab kuv tej ris tsho coj mus twv thiab coj mus sib faib” (nqe 18). Txhua yam puavleej tau ua tiav tasnrho saum ntoo khaublig.
Dhau ntawm Ntawv Nkauj 22, peb pom tau Vajtswv kev npaj cawmdim. Nws txojkev ncaj ncees taij kom txojkev txhaum yuav tsum raug txiav txim, thiab Tswv Yexus ris lub txim ntawd hloov peb lub chaw. Vajtswv txojkev hlub loj kawg nkaus li Nws thiaj tso Nws Tib Leeg Tub los ua ib tug tsiaj theej txhoj vim peb. Tus Cawmseej txojkev txomnyem yog qhov uas ib ke cheemtsum ib ke muaj nqis cawmdim. Los ntawm Nws txojkev mob, peb thiaj tau kev kaj siab; los ntawm Nws txojkev theej txhoj, peb thiaj tau zam txim; los ntawm Nws tej qhov txhab, peb thiaj tau kho zoo. Ntoo khaublig qhia pom hais tias Vajtswv txojkev ncaj ncees thiab txojkev hlub tsis muaj kev sib tawmtsam, ob lub mojyam no puavleej qhia tshwm txhij txhua hauv Tswv Yexus.
Thov Vaj Ntsujplig coj qhia peb, kom peb ua tau lubneej paub ua tus Tswv tsaug thiab hwm Nws, tus uas tuag vim peb saum tus ntoo khaublig.
Thov Vajtswv,
Tswv Yexus, ua Koj tsaug vim dhau ntawm Koj txojkev txomnyem thiab kev tuag saum ntoo khaublig thiaj ua rau nyuam yaus tau zam txim, thiab dhau qhov ntawd nyuam yaus thiaj zeem paub Vajtswv txojkev hlub. Thov pab nyuam yaus txhua txhua hnub ua tau lubneej paub ua tsaug thiab hwm Koj tus uas yog nyuam yaus tus Cawmseej. Nyuam yaus tuav Tswv Yexus Khetos lub npe thov, Amees.
Peb ua lubneej licas thaum paub hais tias tus Tswv twb hlub thiab fij Nws lub cev tuag txhiv peb lawm?
Nyeem Vajluskub hauv peb lub xyoos: Daniyees 12
Kênh Youtube BHKTHN:
