Klei Aê Diê Blŭ: Y-Mathiơ 5:43-48
Êlan kliăng: “Ƀiădah Kâo lač kơ diih phung dôk hmư̆, khăp bĕ kơ phung roh diih, ngă jăk bĕ kơ phung bi êmut kơ diih. Hơêč hmưi klei jăk jĭn bĕ kơ phung tăm pah kơ diih; wah lač brei bĕ kơ phung ngă jhat kơ diih.” (Y-Luk 6:27-28)
Klei êmuh ksiêm mĭn: Si phung khua čih hră leh anăn phung Pharisi mtô klei khăp kơ phung riêng gah? Si klei Khua Yang Yêsu mtô kơ klei hdĭp thâo khăp? Si drei ngă čiăng dưi hdĭp thâo khăp msĕ si klei Khua Yang mtô?
Klei bhiăn Aê Diê mtô: “Brei ih khăp kơ pô riêng gah ih msĕ si kơ ih pô” (Bruă Lêwi 19:18), ƀiădah phung mtô klei bhiăn mtô bi kplêč hĕ, diñu lui hĕ boh blŭ “msĕ si kơ ih pô” ƀiădah lŏ thiăm boh blŭ “bi êmut kơ pô roh ih.”! Klei blŭ diñu mtô bi êdah klei diñu dlăng kơ phung roh hŏng diñu amâo jing pô riêng gah ôh. Khua Yang Yêsu mtô kơ hnơ̆ng čuăn klei hdĭp thâo khăp mơ̆ng Aê Diê amâo djŏ msĕ snăn ôh, ƀiădah “Khăp bĕ kơ phung roh diih, leh anăn wah lač brei kơ phung ngă jhat kơ diih” (êlan 44).
Tal sa, pô Khua Yang brei drei khăp jing kơ jih jang mnuih, wăt kơ phung bi êmut kơ drei, tăm pah, mưč mač, ngă jhat kơ drei! Klei khăp Khua Yang jing klei khăp amâo dlăng kơ mnuih mdê mdê ôh (êlan 45-47). Khua Yang bi msĕ klei khăp Ñu msĕ si klei mđiă hjan, brei msĕ sơăi kơ jih jang mnuih ti dlông rŏng lăn anei. Khua Yang ciăng kơ drei khăp kơ mnuih mkăn msĕ si Ñu khăp kơ digơ̆ msĕ mơh!
Tal dua, klei khăp Khua Yang mtô jing klei khăp dưm ti dlông atur klei kpă ênô leh anăn mâo bruă klam. Klei khăp amâo djŏ jing klei hơiêng ôh, ư mbĭt hŏng klei soh diñu ôh, tăp năng brei drei ăt blŭ klei ƀuah mkra ktang, klei hưn êlâo brei răng hŏng klei khăng kơ phung mâo ai tiê khăng. Ƀiădah klei khăp amâo rông pioh klei mĭn rŭ ênua ôh, ƀiădah hur har ba klei tŭ dưn kơ phung roh hŏng drei, wăt klei ƀuah mkra, mtô lač hŏng klei khăp čiăng kơ diñu dưi bi mlih leh anăn dưi jing jăk hĭn. Khua Yang Yêsu mtô leh “Tơdah ayŏng adei ih ngă soh hŏng ih, nao hưn kơ ñu klei soh ñu hjăn hdơ̆ng diih …” (Y-Mathiơ 18:15-17).
Čiăng dưi ngă hlue klei Khua Yang mtô, brei drei hriăm Klei Aê Diê Blŭ čiăng thâo kral klei khăp Khua Yang jing klei khăp bi êdah hŏng bruă ngă, amâo djŏ knŏng blŭ mang ôh. Khua Yang mtô drei brei “khăp bĕ kơ phung roh diih, ngă jăk bĕ kơ phung bi êmut kơ diih” (Y-Luk 6:27-28). Khăp kơ phung roh amâo bi mjing drei anak Aê Diê ôh, ƀiădah anăn jing klei bi knăl brei ƀuh, drei jing anak Aê Diê kyuadah Pô khăp dôk kiă kriê klei hdĭp drei. Sa mta klei yuôm čiăng dôk hdĭp thâo khăp msĕ si Klei Blŭ Khua Yang mtô, jing brei drei dôk hdĭp mdê hŏng klei mĭn leh anăn hnơ̆ng čuăn hdĭp mơ̆ng lăn ala (êlan 46-47). Phung lăn ala lŏ wĭt ngă tui si klei arăng ngă kơ pô, ƀiădah bi phung anak Aê Diê amâo rŭ ênua ôh. Lăn ala knŏng khăp kơ hlei pô ba klei tŭ dưn kơ diñu, ƀiădah bi phung anak Aê Diê khăp kơ jih jang mnuih wăt kơ phung roh hŏng pô mơh.
Akâo Khua Yang brei drei dôk hdĭp thâo khăp djŏ tui si Klei Blŭ Khua Yang mtô, akâo Yang Mngăt Jăk brei ai ktang čiăng kơ klei hdĭp drei bi ktlă knuih khăp leh anăn kpă ênô mơ̆ng Aê Diê.
Si drei gưt ngă tui si klei mtô brei khăp kơ phung roh msĕ si kơ drei pô?
Wah lač: Ơ Ama khăp hlŏng lar! Bi mni lač jăk kơ Khua Yang kyua klei Ih mtô brei kâo khăp kơ jih jang mnuih, wăt tơdah diñu bi kdơ̆ng, bi êmut kơ kâo dưn. Akâo Khua Yang đru kâo thâo khăp hŏng klei djŏ, msĕ si Klei Blŭ Khua Yang mtô, čiăng kơ hŏng knhuah hdĭp kâo, klei khăp leh anăn klei kpă ênô Khua Yang bi êdah nanao kơ jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 40
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
