Mathiơ 5:43-48
“Yêsu oei bơtho lu sư thoi âu: Na Inh pơma kơ iĕm mă mơ̆ng Inh: Iĕm athei ‘mêm mơnat kơ lu bơngai mă pơm kơnê̆ kơ iĕm, pơm ‘lơ̆ng kơ lu bơngai mă areh kơ iĕm. Pơma rơngơp kơ lu bơngai mă hiap iĕm, krao khan apinh ‘Bok Kei-Dei tơgŭm lu bơngai hil kơ iĕm.” (Luka 6:27-28)
Nơ̆r jet tơchĕng pơwao:
– Lu thây bơth tơdrong juăt păng bơngai Pharisi bơtho ‘mêm mơnat kơ bôl buăl thoi yơ?
– Kră Yang Yêsu bơtho athei arih ‘mêm mơnat thoi yơ?
– Pơm thoi yơ wă kơ bơ̆n gơh pơm kiơ̆ tơdrong arih ‘mêm mơnat thoi nơ̆r Kră Yang bơtho?
Khôi juăt Kră Yang ‘Bok Kei-Dei bơtho: “Athei ‘mêm kơ lu sư thoi ih ‘mêm kơ akâu ih kơdih” (Lêwi 19:18). Mălei lu thây bơtho tơdrong juăt lu sư bơtho tơplơ̆ ưh kơ trŏ, hŭt lê̆ nơ̆r lu sư bơtho tơ’bôh lu sư lăng lu bơngai mă pơm kơnê̆ kơ lu sư ưh kơ đei bôl juăt. Kră Yang Yêsu bơtho hơgăt kơ tơdrong arih ‘mêm mơnat đơ̆ng ‘Bok Kei-Dei ưh kơ thoi noh ôh, na “Iĕm athei ‘mêm mơnat kơ lu bơngai mă pơm kơnê̆ kơ iĕm, krao khan apinh ‘Bok Kei-Dei tơgŭm sư” (trong 44).
Mă mônh, bơngai mă Kră Yang wă kơ bơ̆n ‘mêm ‘noh đĭ đăng bơngai mă khan lu bơngai mă areh kơ bơ̆n, hiap bơ̆n, pơjăm bơ̆n, pơm kơnê̆ kơ bơ̆n! Tơdrong ‘mêm Kră Yang noh tơdrong ‘mêm ưh kơ pơtŏ pơting pơdê kơ bu ôh (trong 45-47). Kră Yang pơting tơdrong ‘mêm Sư nhen thoi ‘mi tŏ, đei ăn kơ đĭ đăng bơngai lăm teh đak âu. Kră Yang wă kơ bơ̆n ‘mêm kơ bơngai nai thoi Kră Yang ‘mêm kơ lu sư!
Mă ‘bar, tơdrong ‘mêm Kră Yang bơtho noh tơm tơdrong ‘mêm tơpăt păng băt hiơ̆k pŭ iŏk. ‘Mêm ưh kơ sĭ khan pơm kiơ̆ mơ̆ng kơ bơngai noh wă, lăp đon hăm tơdrong yoch lu sư ôh. Phŏ phŏ kư̆m đei nơ̆r chrih hil trăp tơpă, lu nơ̆r khan tơbăt mơ̆n hăm lu bơngai mă đei jơhngơ̆m arăng kơ̆l. Mălei ‘mêm mơnat noh ưh kơ đei răk rong wă pơm tơwih ôh. Păng adrin wă pơm tơdrong đei yua ăn kơ bơngai mă pơm kơnê̆ kơ bơ̆n, mă khan đei bơtho pơjĭ, bơtho lăm tơdrong ‘mêm wă kơ lu sư gơh tơplih păng ‘lơ̆ng hloh. Kră Yang Yêsu đei bơtho “Dah bôl buăl bơngai lui pơm kơnê̆ kơ iĕm, iĕm athei khan kơ sư kơdrô̆ biĕm…” (Mathiơ 18:15-17).
Wă kơ pơm kiơ̆ nơ̆r Kră Yang bơtho, bơ̆n kăl kơ pơhrăm nơ̆r Kră Yang wă kơ băt tơdrong ‘mêm Kră Yang noh tơdrong ‘mêm pơm tơ’bôh hloi, ưh kơ sĭ pơma đĕch ôh. Kră Yang bơtho bơ̆n athei “pơm ‘lơ̆ng kơ lu bơngai areh kơ iĕm, pơma rơngơp kơ lu bơngai mă hiap iĕm, krao khan apinh ‘Bok Kei-Dei tơgŭm lu bơngai hil kơ iĕm” (Luka 6:27-28). ‘Mêm kơ lu bơngai areh kơ bơ̆n ưh kơ pơm kơ bơ̆n jing kon Kră Yang mălei noh wă tơ’bôh bơ̆n kon ‘Bok Kei-Dei bơih yua kơ Tơ’ngla ‘mêm mơnat oei pơgơ̆r tơdrong arih bơ̆n. Minh tơdrong gĭt kăl wă kơ arih ‘mêm mơnat kiơ̆ kơ nơ̆r Kră Yang bơtho noh bơ̆n arih pha ‘biơ̆ hăm tơdrong hlôh wao păng tơdrong arih hơgăt kon bơngai (trong 46-47). Kon bơngai kiơ̆ teh đak pơm minh ‘mong minh mălei lu kon Kră Yang ưh kơ đei pơm ‘mong ôh. Bơngai lăm teh đak ‘mêm kơ lu bơngai mă đei pơm pơyua ăn kơ bơ̆n mălei lu kon Kră Yang ‘mêm đĭ đăng kơ bơngai mă khan bơngai mă pơm kơnê̆ kơ bơ̆n.
Apinh Kră Yang ăn kơ bơ̆n arih băt ‘mêm trŏ kiơ̆ nơ̆r Kră Yang bơtho, gơnang kơ Yang Bơhngol ‘Lơ̆ng tuh tơdrong pran wă kơ tơdrong arih bơ̆n pơm tơ’bôh tơdrong ‘mêm păng tơdrong tơpăt ‘Bok Kei-Dei.
Ơ ‘Bă mă ‘mêm mơnat ling lang! Inh bơnê kơ Ih yua kơ Ih bơtho kơ inh ‘mêm kơ đĭ đăng bơngai mă khan lu sư pơm kơnê̆, areh kơ inh. Apinh Kră Yang tơgŭm inh ‘mêm kơ đĭ đăng bơngai trŏ thoi nơ̆r Kră Yang bơtho wă kơ đơ̆ng tơdrong arih inh, tơdrong ‘mêm păng tơdrong tơpăt Ih ling lang tơ’bôh kơ lơ bơngai, krao khan yua anăn Kră Yang Yêsu Krist, Amen.
Bơ̆n pơm kiơ̆ nơ̆r bơtho ‘mêm kơ bơngai mă areh kơ bơ̆n thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 40
Kênh Youtube BHKTHN:
