Mathais 5:43-48
Nqe cim:
“Tiamsis kuv hais rau nej cov uas mloog kuv qhia hais tias, hlub nej cov yeebncuab thiab ua zoo rau cov uas ntxub nej, foom koob hmoov rau cov neeg uas cem nej, thiab thov Vajtswv pab rau cov neeg uas tsimtxom nej.” (Lukas 6:27-28)
Lus nug xav:
– Cov xibhwb qhia Vajtswv txoj kevcai thiab cov Falixais qhia kom hlub cov neeg nyob ze ibncig li cas?
– Tswv Yexus qhia kom ua lubneej sib hlub li cas?
– Yuav ua li cas peb thiaj ua tau lub neej sib hlub raws li Vajtswv Txojlus qhia?
Vajtswv txoj kevcai qhia hais tias: “yuav tsum hlub koj tej kwvtij zejzog ib yam li koj hlub koj lub cev” (Levis Kevcai 19:18), tiamsis cov xibhwb qhia Vajtswv txoj kevcai ho muab qhia ntxeev hlo lawm, lawv rho lo lus “ib yam li koj hlub koj lub cev” tawm thiab ho ntxiv lo lus “ntxub nej cov yeebncuab” los rau hauv! Lawv lo lus qhia ntawd qhia pom hais tias lawv tsis saib cov yeebncuab yog cov neeg nyob ze ibncig. Tswv Yexus qhia hais tias Vajtswv txojcai ua neej sib hlub tsis yog li ntawd, tiamsis yuav tsum: “Hlub nej cov yeebncuab thiab thov Vajtswv pab rau cov uas tsimtxom nej” (nqe 44).
Qhov xubthawj, cov neeg uas tus Tswv xav kom peb hlub yog txhua txhua tus, tsis hais cov neeg uas ntxub yus, foom phem rau yus, thuam yus, tsimtxom yus! Tus Tswv txojkev hlub yog txojkev hlub uas tsis xaiv ntsejmuag (nqe 45-47). Tus Tswv muab Nws txojkev hlub piv rau tshav ntuj los nag, pub rau txhua tus neeg hauv lub ntiajteb no. Tus Tswv xav kom peb hlub lwm tus ib yam li Nws hlub lawv ntag!
Qhov thib ob, txojkev hlub uas tus Tswv qhia yog kev hlub txawb rau saum txojkev ncaj ncees thiab muaj feemxyuam. Sib hlub tsis yog yib raws luag siab nyiam, tsis yog nrog luag ua txhaum, qee zaug kuj yuav tsum tau hais tej lus qhuab ntuas hnyav hnyav, tej lus ceebtoom meej meej rau cov neeg uas muaj lub siab tawv. Sib hlub yog tsis muaj lub siab xav ua pauj tus ua phem, thiab niaj hnub ua tej yam muaj nqis rau tus yeebncuab ntxub yus, tsis hais tej kev qhuab ntuas, txhim kho, qhuab qhia los yuav tsum ua los ntawm txojkev hlub kom lawv hloov siab thiab ua zoo tuaj. Tswv Yexus twb qhia tseg hais tias: “Yog koj ib tug kwvtij ua txhaum rau koj, koj cia li mus qhia nws qhov txhaum rau nws…” (Mathais 18:15-17).
Yuav kom ua tau raws li tus Tswv tej lus qhia, peb yuav tsum kawm Vajtswv Txojlus kom paub hais tias tus Tswv txojkev hlub yog kev hlub uas muaj tes haujlwm ua tiag, tsis yog hais ntawm ncauj xwb. Tus Tswv qhia peb hais tias: “hlub nej cov yeebncuab thiab ua zoo rau cov uas ntxub nej, foom koob hmoov rau cov neeg uas cem nej, thiab thov Vajtswv pab rau cov neeg uas tsimtxom nej” (Lukas 6:27-28). Hlub yeebncuab tsis ua rau peb tau los ua Vajtswv cov menyuam tiamsis ntawd yog timkhawv tseeb qhia hais tias peb yog Vajtswv cov menyuam tiag vim tus uas hlub peb tabtom tswj hwm peb lubneej. Ib qho tseemceeb ntxiv kom peb ua tau lubneej sib hlub raws li Vajtswv Txojlus qhia yog peb yuav tsum ua lubneej txawv neeg ntiajteb tej kev xav thiab lawv txojcai (nqe 46-47). Neeg ntiajteb ua phem pauj phem tiamsis Vajtswv cov menyuam tsis ua pauj li ntawd. Neeg ntiajteb tsuas hlub cov neeg uas muaj qabhau rau yus xwb tiamsis Vajtswv cov menyuam hlub txhua txhua tus tsis hais tej yeebncuab huv tibsi thiab.
Thov tus Tswv pab kom peb ua lubneej sib hlub raws li Vajtswv Txojlus qhia, vamkhom Vaj Ntsujplig pub dagzog kom peb lubneej qhia tshwm tau Vajtswv tus mojyam uas muaj kev hlub thiab ncaj ncees rau lwm tus.
Thov Vajtswv,
Leej Txiv uas muaj kev hlub mus ibtxhis! Nyuam yaus ua Koj tsaug vim Koj tau qhia nyuam yaus hlub txhua tus neeg txawm yog lawv ntxub lossis tawmtsam nyuam yaus los xij. Thov pab nyuam yaus hlub sawvdaws raws li Koj Txojlus qhia kom dhau ntawm nyuam yaus txojkev ua neej, ces Koj txojkev hlub thiab kev ncaj ncees yuav qhia tshwm rau sawvdaws pom. Nyuam yaus tuav Tswv Yexus Khetos lub npe thov, Amees.
Peb ua raws li lo lus qhia hlub yeebncuab licas lawm?
Nyeem Vajluskub hauv peb lub xyoos: Exekees 40
Kênh Youtube BHKTHN:
