Klei Aê Diê Blŭ: Klei Bi Hriêng 26:17-19
Êlan kliăng: “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mmông găl, čiăng dưi bi mbha klei pap kơ phung dôk hmư̆. ” (Êphêsô 4:29)
Klei êmuh ksiêm mĭn: Phung ruăt čhŭ luă hlăm bruă pô mkăn mâo bi msĕ hŏng ya klei? Si klei bi msĕ kơ pô bi êka pô mkăn leh, leh anăn lač kâo knŏng hlăp? Si klei brei drei bi mlih hlăm klei blŭ?
Mtao Salômôn bi msĕ phung ruăt mŭt hlăm klei bi msao mơ̆ng pô mkăn hŏng mnuih ktŭng mă asâo ti knga, kyua bruă ngă anei srăng atăt truh kơ bruă asâo kĕ. Tơdah drei mŭt hlăm klei bi msao amâo djŏ tuôm kơ pô, drei khăng ngă kơ djăp mta bruă jing kjham hĭn, leh anăn drei srăng ruă êka kyua klei pô kƀah thâo mĭn. Snăn, amâo mâo klei bi kngăr ôh tơdah sa čô mnuih mŭt hlăm bruă pô mkăn srăng klam boh klei jhat kyua klei kƀah thâo săng kơ bruă mâo ăt msĕ mơh bruă klam čiăng msir bruă anăn.
Êngao anăn, Mtao Salômôn lŏ bi msĕ mnuih bi êka pô mkăn hŏng klei blŭ leh anăn lač “Knŏng kâo hlăp!” hŏng mnuih khŏ bhĭr kluč pui, ƀrăm. Klei blŭ bi êka tui tluôn kyua boh blŭ “Knŏng kâo hlăp!” (êlan 19) ăt ba klei êka klă sĭt. Klei blŭ mgang amâo dưi lăm lui ôh klei êka hlăm ai tiê. Boh blŭ “mplư” brei ƀuh mnuih blŭ mâo klei mĭn jhat čiăng ngă jhat amâo djŏ ba klei mơak, klei tŭ dưn kơ pô riêng gah pô ôh. Hĭn mơh, “sa čô khŏ”, luč klei mĭn, khăng ngă hlue si klei ƀuh hlăm ai tiê ƀiădah amâo mâo klei mĭn čiăng ngă jhat ôh, ƀiădah mnuih “mplư”, hiu mplư snăn mnêč jhat, brei ƀuh ñu mâo klei thâo čiăng bi mĭn ngă soh.
Hruê anei, bruă hâo hưn mđĭ kyar, lu đei mnuih srăng lĕ hlăm klei kčoh boh hră čiăng bi msao kơ bruă amâo djŏ tuôm kơ pô, srăng phat kđi pô mkăn wăt tơdah amâo thâo klă ôh hlei digơ̆ jing. Đa đa mnuih ba klei knap mñai pô mkăn mjing klei hlăp hŏng klei blŭ amâo mâo klei đua klam, kƀah klei bi mklă čiăng ba klei jhat kơ mnuih, kơ pô. Đa đa mnuih khăng čhŭ luă hlăm klei bi msao pô mkăn, amâodah ăt pral mâo klei mtô mtă wăt tơdah amâo mâo pô iêô ôh. Klei Aê Diê Blŭ mñă drei brei thâo mĭn ksiêm dlăng bi nik anei jing bruă pô mơ̆? Klei pô mŭt hlăm anăn srăng đru klei jăk amâodah ba klei jhat? Êngao anăn, êlâo kơ blŭ hlăp brei êmuh: “Klei blŭ anei srăng mđĭ ai diñu amâodah bi êka pô hmư̆? Kâo srăng đua klam kluôm dhuôm mơ̆ kơ klei blŭ pô?” Khua ƀĭng kna Y-Pôl mtô: “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mmông găl, čiăng dưi bi mbha klei pap kơ phung dôk hmư̆” (Êphêsô 4:29). Akâo kơ Khua Yang đru drei hrô kơ blŭ klei ƀuah ăl amâodah mưč mač hŏng klei blŭ sĭt suôr ba klei tŭ dưn kơ pô hmư̆.
Ya klei mguôp êka leh kyua klei čhŭ luă amâodah klei blŭ hlăp drei?
Wah lač: Ơ Khua Yang, lu blư̆ kâo mŭt hlăm anôk amâo jing anôk kơ kâo ôh ngă kơ klei mâo jing kjham hĭn. Kâo ăt khăng bi êka pô mkăn hŏng klei blŭ leh anăn dêč kơ bruă klam. Akâo kơ Khua Yang pap brei kơ kâo, đru kâo mâo klei blŭ leh anăn bruă ngă ba klei tŭ dưn kơ pô mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
