Tơdrong Pơđơ̆k 26:17-19
“Iĕm ‘nĕ kơ pơma kơnê̆, athei pơma mă ‘lơ̆ng tơgŭm pơyua lu bơngai mă mơ̆ng iĕm.”
(Êphêsô 4:29)
Nơ̆r jet tơchĕng pơwao:
– Bơngai ‘bônh kơ tơtŏ hăt kơ drong mơ̆t tơhil hăm bơngai nai đei pơtih gia hăm tơdrong kiơ?
– Bơngai mă pơm pơrăm bơngai nai na đơ̆ng noh sư pơma khan inh pơma hơnul đĕch đei pơting thoi yơ?
– Lu bơ̆n kăl kơ tơplih thoi yơ lăm nơ̆r pơma?
Pơtao Sôlômôn pơting bơngai ‘bônh kơ tơtŏ drong mơ̆t pơjah tơhil hăm bơngai nai hăm bơngai mă kơtul pet wĕnh đon kŏ, yua kơ pơm tơdrong ‘noh jing kŏ kăp sư. Dah bơ̆n drong mơ̆t tơ anih đe pơma tơhil băl mă ưh kơ đei ‘bơm kơ bơ̆n, lu bơ̆n pơm thoi noh jing kơnê̆ hloh, păng lu bơ̆n gô đei tơdrong jĭ kơ tơdrong kơ đei yua kơ bơ̆n ưh kơ băt kơ tơdrong lu sư. Thoi noh, ưh kơ đei lăng hlĭch kiơ ôh dah minh ‘nu bơngai drong mơ̆t tơhil hăm tơdrong mă ưh kơ đei ‘bơm sư gô pŭ iŏk tơdrong răm kơdih yua kơ ưh kơ hlôh băt gah tơdrong jang kư̆m ưh kơ đei wă chu pŭ iŏk tơdrong ‘noh.
‘Nguaih kơ ‘nei, Pơtao Sôlômôn sư oei pơting bơngai mă pơm pơrăm bơngai nai hăm nơ̆r pơma na sư khan “inh hơnul đĕch wăi” hăm lu bơngai wơnh prah ‘brơ̆m ngar ŭnh ngŭr, ‘Brơ̆m păng tơdrong lôch. Dôm lu nơ̆r pơma pơm kơ đe sơ’ngon thoi nơ̆r pơma “inh hơnul đĕch wăi” (trong 19). Oei pơm pơrăm tơpă. Nơ̆r pơma dŏng kơdih ưh kơ gơh sŭt lê̆ thoi tơdrong jĭ rơka. Tơdrong pơm “Hơlĕnh sơlam” đei tơ’bôh kơ bơngai pơm kơnê̆ ưh kơ đei ba ăn tơdrong chơt hiôk, pơyua kiơ ăn kơ bôl buăl bơ̆n. Hloh kơ ‘nei dơ̆ng, “bơngai wơnh”, kơ̆l ‘ngok hiong tơdrong tơchĕng, ngăl pơm jang kiơ̆ kơ sư mơn mălei sư ưh kơ tơchĕng chă đon wă pơm kơnê̆, mălei bơngai “hơlĕnh” , chă trong hơlĕnh dêh, đei tơ’bôh sư gơh kơ̆l ‘ngok sư gơh tơchĕng wă chă trong pơm tơdrong kơnê̆.
Dang ei, tơdrong pơma rai jơ̆p jang, đei lơ bơngai wă drong mơ̆t chă tơdrong pơjah dih băl hăm tơdrong mă ưh kơ đei ‘bơm kơ bơ̆n, wă chă tơdrong glăi bơngai nai khan yoch mă sư ưh kơ băt hơđăl kơ bơngai noh thoi yơ hĭ. Đei bơngai chĕp ba tơdrong bơngai nai na pơm chă che bơle tơdrong đe, ưh kơ đei kơchăng phŏ đei tơdrong răm kơ đe, răm kơ sư kơdih. Minh ‘bar ‘nu bơngai ngăl juăt kơ chă mơ̆ng tơdrong bơngai nai pơma băl. Phŏ kư̆m hăt chă nơ̆r pơlung pơhiôk đe mă khan ưh kơ đei bu pơtơm athei. Nơ̆r Kră Yang tơ’blŏk ăn kơ bơ̆n athei hơgei, hơlen mă tơpă ‘nâu hăm trŏ kơ tơdrong jang bơ̆n lei ưh? Tơdrong inh năm tơgŭm noh đei yua dah pơrăm bơngai nai. ‘Nguaih kơ ‘nei, adrol kơ pơma hơnul athei jet bơ̆n kơdih: “Nơ̆r ‘nâu gô tơgŭm sư dah mă pơrăm bơngai mơ̆ng? Inh hăm chu pŭ iŏk đĭ dôm tơdrong gah nơ̆r pơma inh ưh?” ‘Bok pôl bơtho: “Iĕm ‘nĕ kơ pơma kơnê̆, athei pơma mă ‘lơ̆ng tơgŭm pơyua lu bơngai mă mơ̆ng iĕm.” (Êphêsô 4:29). Apinh Kră Yang tơgŭm inh tơplih kơ dôm nơ̆r pơma chrih dah pơma hăm nơ̆r tơpăt tơpă wă ba ăn tơdrong đei yua ăn kơ bơngai mă mơ̆ng bơ̆n.
Ơ Kră Yang, lơ wơ̆t inh đei drong mơ̆t tơ anih ưh kơ trŏ kơ inh jang jing pơm kơ tơdrong noh rai kơnê̆ hloh. Inh kư̆m juăt kơ pơm kơ bơngai ưh kơ hiôk hăm nơ̆r pơma đơ̆ng noh weh klĕnh kơ tơ nai. Apinh Kră Yang ‘nĕ jô̆ yo kơ inh, tơgŭm inh đei nơ̆r pơma păng pơm tơdrong ‘lơ̆ng đei yua kơ bơngai nai. Krao khan yua anăn Kră Yang Yêsu Krist, Amen.
Dôm lu tơdrong kiơ pơm kơ đe ưh kơ hiôk yua kơ đơ̆ng bơ̆n hăt hot dah mă đơ̆ng dôm nơ̆r pơma hơnul lu bơ̆n?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 30
Kênh Youtube BHKTHN:
