Pajlug 26:17-19
Nqe cim:
“Nej tsis txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog” (Efexus 4:29)
Lus nug xav:
– Tus neeg kub sai nkag mus rau ntawm lwm tus tej teebmeem tau muab piv rau yam dabtsi?
– Tus neeg ua rau lwm tus mob tas mam hais tias kuv hais tso dag tau muab piv li cas?
– Peb cheem tsum hloov dabtsi hauv tej lus hais?
Vajntxwv Xalumoos piv tus neeg maj raus tes rau ntawm lwm tus tej lus sib cav mas zoo li tus neeg ruam uas mus ntsiab dev nplooj ntseg, vim qhov nws ua no yuav raug dev tom. Thaum uas peb raus tes rau tej teebmeem uas tsis yog yus li, peb yuav ua rau tes haujlwm ntawd dhau mus phem heev dua ntxiv, thiab peb yuav rov ua rau peb mob vim yus tsis muaj tswvyim txaus. Yog li ntawd tsis muaj ib yam dabtsi uas peb yuav xav tsis thoob thaum pom tus neeg maj raus tes rau luag tej teebmeem nws yuav raug plaub thiab yuav tau daws tej teebmeem ntawd.
Tsis tas li ntawd, vajntxwv Xalumoos tseem muab tus neeg uas ua rau lwm tus mob los ntawm nws lus hais tas ces rov hais tias “tso dag xwb!” mas zoo li tus neeg vwm uas tua xub hneev thiab tso hluav taws ua dog ua dig. Tej lus hais mob lwm tus tom qab mam hais tias “tso dag xwb” (nqe 19) mas tseeb tiag yeej ua rau lwm tus mob lawm. Nws tej lus hais daws yeej ua tsis tau lub qhov caws pliav mob ploj mus. Lolus “ntxias” qhia pom tus neeg hais muaj lub siab phem xav ua phem tsis yog lolus muaj kev zoo siab, muaj nqis rau cov neeg uas nyob ib ncig ntawm nws. Heev tshaj qhov ntawd, “tus neeg vwm” tsis muaj hlwb, nws pheej ua raws li tej ua nws xav xwb, tiamsis nws tsis npaj siab ua yam phem, tiamsis tus neeg dag “ntxias” nws dag ntse ntsuav, qhia pom nws muaj txaus tswvyim peevxwm npaj ua kev phem.
Niaj hnub nim no, huab cua vammeej, coob leej ntau tus raus tes sau ntawv sib cav tej haujlwm uas tsis ntsig yus, cia li txiav txim lwm tus txawm yog tsis paub meej lawv yog leejtwg los xij. Muaj ib feem muab lwm tus tej teebmeem coj los hais ua si, tsis ua zoo xyuas, tsis nrhiav tim khawv tseeb, thiaj muaj teebmeem rau lwm tus thiab rau yus. Muaj ib feem pheej nyiam raus tes rau lwm tus tej teebmeem, lossis maj maj mus ntuas luag txawm tsis tau raug caw mus. Vajtswv Txojlus ntuas peb hais tias yuav tsum muaj tswvyim ua zoo saib meej meej saib ntawd puas yog peb haujlwm? Qhov uas yus koom rau hauv yuav rhuav lossis yuav pab tau lawv?
Dua li ntawd, ua ntej yuav hais ua si ib yam dabtsi twg cia li xav ua ntej: “Lolus no puas txhawb cov mloog lossis yuav ua rau cov mloog mob? Peb puas ris taus tej lus uas peb hais? Timthawj Paulus qhia: “Nej tsis txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog” (Efexus 4:29). Thov Vajtswv pab kom peb tsis hais tej lus txiav txim lossis tej lus dag ntxias tiamsis hais tej lus uas muaj nqis rau cov mloog.
Thov Vajtswv,
Vajtswv, muaj ntau zaus nyuam yaus cia li maj raus tes rau tej teebmeem uas tsis ntsig txog nyuam yaus, thiaj ua rau tej teebmeem ntawd loj ntxiv. Lossis muaj ntau zaus nyuam yaus kuj ua rau lwm tus mob los ntawm nyuam yaus tej lus hais, thov Koj zam txim rau nyuam yaus. Thov Koj pab nyuam yaus tswj tau nyuam yaus tus kheej tej lus hais tej haujlwm ua kom muaj nqis rau lwm tus. Nyuam yaus tuav Tswv Yexus Khetos lub npe thov, Amees.
Peb puas tau ua rau leejtwg mob los ntawm peb raus tes rau luag tej teebmeem lossis ntawm peb tej lus tso dag?
Nyeem Vajluskub hauv peb lub xyoos: Exekees 30
Kênh Youtube BHKTHN:
