Tơdrong Pơđơ̆k 26:11-12
“Ih hăm ‘bôh minh ‘nu bơngai khan kơ sư kơdih bơngai hlôh wao, Bơngai kơtul bơlŭk oei đei hơmĕng hloh kơ sư.” (Tơdrong Pơđơ̆k 26:12)
Nơ̆r jet tơchĕng pơwao:
– Bơngai pơlơ̆k pơm yoch dơ̆ng đei pơtih gia thoi yơ?
– Bơngai hlôh wao gơh hơgei kiơ̆ kơdih lăng noh bơngai arih thoi yơ?
– Lu bơ̆n krao apinh Yang Bơhngol ‘Lơ̆ng tơgŭm kơ ih tơdrong kiơ đơ̆ng ‘bai pơhrăm ‘nâu?
Tơdrong hlôh wao đơ̆ng Kră Yang ‘Bok Kei-Dei. Bơngai kơhlôh arih tơplơ̆ kơ nơ̆r Kră Yang bơtho: “Băt hli yom kơ Kră Yang, noh tơm tơdrong gơh hơgei; Băt hlôh kơ Kră Yang Rơgoh, noh boih tơdrong hlôh wao.” (Tơdrong Pơđơ̆k 9:10) thoi noh na lu sư sơngah kơ nơ̆r bơtho noh păng arih kiơ̆ kơdih wă. ‘Maih đei tơdrong hlôh wao đơ̆ng Kră Yang lei athei iŏk đon ala păng chu kiơ̆. Pơtao Sôlômôn đei tơlĕch ‘băr tŏ rup hơiă dêh lăm ‘bar trong Tơdrong pơđơ̆k noh:
Mă minh, thoi minh pôm kŏ hăk bơih sa dơ̆ng (trong 11) rup noh jơ̆ krưp dêh. Lăm tơdrong juăt bơngai Juđê sơ̆, kŏ đe ưh kơ đei gĭt lăng thoi tơmam krưp tơpă, hăk tơlĕch tơmam kiơ wă pơrăm akâu jăn, mălei kŏ năm laih sa dơ̆ng đơ̆ng đe hăk, wă pơma kơ bơngai kơhlôh pơm pơlơ̆k dơ̆ng tơdrong yoch mă đêl pơm kơ sư pơmat. Mă ‘bar, lăm trong 12 bơngai chih hla bơar ‘nâu lăng rai hơiă hloh kơplah pơma khan bơngai kơdih akâu hlôh wao lei na lŭch hloh kơ bơngai kơtul. ‘Nâu bơih tơdrong yoch pơang yua kơ bơngai thoi noh na ưh kơ đei bu bơtho, pơlung, na gô ba truh kơ tơdrong răm arih glăi ưh kơ băt kơdih akâu glăi noh na lu sư khan ưh kơ kăl kơ tơplih.
Lơ bơngai wih pơlơ̆k pơm yoch dơ̆ng, juăt kơ pơm kơnê̆, tơ’bưh pơrăm băl, mă khan băt noh tơdrong pơm kơ bơ̆n păng bơngai nai sơ’ngon. Jơ̆ bơngai lui, lu bơ̆n athei đĭ jơhngơ̆m sơng iŏk tơdrong bơtho pơjĭ đơ̆ng Yang Bơhngol ‘ Lơ̆ng, gơnang kơ Kră Yang na achăng tŭk ‘nĕ pă pơlơ̆k pơm yoch dơ̆ng. Nhen thoi hăk lê̆ bơih lu tơmam bơnhŭl đơ̆ng lăm akâu, lu tơdrong bơ̆n pơm ưh kơ trŏ kăl kơ hŭt lê̆. Klaih kơ noh dơ̆ng, athei pơhrăm iŏk đon ala yua kơ pơang noh krê hơmơt hloh kơ kơtul. Bơngai kơtul sư băt sư pơm glăi, mălei sư khan kơdih sư bơngai hlôh wao na ưh kơ băt kơdih kăl kơ tơplih tơdrong pơang pơgăn kon bơngai tơbral, sơng iŏk tơdrong đe bơtho tơ’bôh ding mah pơgăn lu sư năm lăm tơdrong dŏng pơklaih. Nơ̆r Kră Yang khan: “Lu đe adruh tơdăm oei hơmuh-hơmŏng, iĕm kư̆m lei-lăi athei chu yom kơ lu đe kră; păng đĭ đăng kơ iĕm hăm lu đe kră athei iŏk jơhngơ̆m đon dim wă kơ chu yom dih băl; yua kơ ‘Bok Kei-Dei ưh kơ wă ôh kơ lu bơngai pơang akâu, Sư tơgŭm lu bơngai dim, lu bơngai băt kơ chu yom kơ đe.” (I Pêtrôs 5:5). Apinh Yang Bơhngol ‘Lơ̆ng chrih bơtho dôm tơdrong kơnê̆ mă lu bơ̆n pơm yoch păng tơgŭm kơ bơ̆n ahăng lê̆ tơdrong yoch noh ling lang. Apinh Kră Yang tơgŭm bơ̆n iŏk đon ala, băt mơ̆ng, băt tơplih wă kơ ‘lơ̆ng tôm lăm rim năr.
Ơ Kră Yang, apinh Ih pơchrang lăng lăm jơhngơ̆m inh păng tơhlâu tơ’bôh kơ inh tơdrong kơwao mă inh nŏng kơ pơlơ̆k pơm. Apinh Ih ‘nĕ jô̆ yo kơ inh. Apinh Yang Bơhngol ‘Lơ̆ng tơgŭm inh ‘nĕ pă pơm tơdrong yoch, păng ăn kơ inh jơhngơ̆m băt iŏk đon ala wă sơng iŏk tơdrong bơtho đơ̆ng Ih. Apinh Ih tơgŭm inh achăng lê̆ tơdrong pơang, păng gơnang kơ tơdrong hlôh wao Ih. Krao khan yua anăn Kră Yang Yêsu Krist, Amen.
Đei tơdrong kơnê̆ ayơ mă bơ̆n nŏng pơlơ̆k pơle, mă khan băt tơdrong glăi ră? Lu bơ̆n hăm mơ̆ng nơ̆r bơtho dah mă oei ling lang khan bơ̆n trŏ?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 16
Kênh Youtube BHKTHN:
