Blŭng a 4:25-26
“Set kư̆m pơjing kơ minh ‘nu kon drŏ-nglo, anăn Ênos. Đơ̆ng năr âu, kon bơngai pơtơm krao khan chă anăn Kră Yang.” (Blŭng a 4:26)
Nơ̆r jet tơchĕng pơwao:
– Tơdrong ‘bok Ađam păng yă Ewơ rơneh kơ Set đei yua thoi yơ?
– Đei tơdrong gĭt kiơ gah adrĕch adrung ‘bok Set tơplơ̆ kơ adrĕch adrung Kain?
– Dang ei, jơhngơ̆m “adrĕch adrung Kain” tơ’bôh thoi yơ?
Kơplah ‘bok Ađam, Ewơ pơm yoch păng pŭ iŏk tơdrong phak, Kră Yang ăn kơ sư tơdrong hơmĕng yua kơ Kră Yang đei pơkă khan adrĕch adrung bơngai drŏkăn rơneh gô juă bơhlơ̆r kơ̆l ‘bih, satan gô thuơ (Blŭng a 3:15). Rŏ lăng kơplah rơneh kơ bre Kain păng Abel, bre yă ‘bok chơt hiôk dêh păng chang hơmĕng nơ̆r pơkă noh gô ‘blep tơpă. Mălei tơdrong truh noh krưp dêh kon drŏnglo kơdră pơlôch lê̆ oh kơdih. ‘Bok Abel lôch na Kain sư bơngai pơlôch oh kơdih lei na liơ satan thuơ? Lăm tơdrong nhen thoi pă hơmĕng thoi noh bre ‘bok Ađam păng yă Ewơ đei băt mơn tơdrong ‘mêm Kră Yang ăn đĕch kơplah tơpŭ kơ minh ‘nu kon drŏnglo dơ̆ng. Bre sư băt hơđăl tơpă ‘nâu bơih tơdrong ‘mêm Kră Yang ‘Bok Kei-Dei ăn đĕch, thoi noh na bre sư krao anăn kon drŏnglo sư noh anăn Set, wă khan “Tơdrong ăn đĕch” nhen thoi nơ̆r Ewơ khan: “Ađam oei hơdai akăn sư dơ̆ng; sư đei tơpŭ dơ̆ng kơ minh ‘nu kon drŏ-nglo sư anăn Set; akăn sư khan, “Kră Yang ‘Bok Kei-Dei đei ăn dơ̆ng kơ inh tơpŭ kơ minh ‘nu kon drŏ-ngloc nai wă tơplih kơ Abel mă Kain pơlôch boih.” (trong 25). Tơdrong tơpŭ kơ Set noh ưh kơ trŏ kơ đei minh ‘nu kon drŏnglo plơ̆ng dơ̆ng, mălei tơdrong bơ̆n ‘bôh jơhngơ̆m ‘mêm kơ Kră Yang lăm chăl arih păng chă ‘bôh tơdrong hơmĕng lăm chăl arih rŏ pă hơmĕng bơih. Sơ̆p hla bơar ‘Bok Kei-Dei tơbăt: “Set kư̆m pơjing kơ minh ‘nu kon drŏ-nglo, anăn Ênos. Đơ̆ng năr âu, kon bơngai pơtơm krao khan chă anăn Kră Yang.” (trong 26). Nơ̆r “krao apinh” kư̆m dai wă pơma khan roi tơbăt. Adrĕch adrung Set jơ̆ adrĕch adrung chă Kră Yang. Roi tơbăt anăn Kră Yang. Na lăm noh adrĕch Kain hiơ̆k kơ jang sa đĕch, chă jang sa đei mŭk tơmam na tơdrong arih pơm lơ tơdrong kư̆ kă, lei na adrĕch Set krao chă Kră Yang, yua kơ thoi noh tơdrong hơmĕng gah minh ‘nu bơngai lĕch đơ̆ng adrĕch bơngai drŏkăn păng kĕ jei đơ̆ng tơdrong pran yang satan ưh pă kơtĕch tôch, Kră Yang ‘Bok Kei-Dei bơih Tơ’ngla tơpăt.
Dang ei, lu bơ̆n ‘bôh jơhngơ̆m lu bơngai kiơ̆ “adrĕch adrung Kain” đei arih hiôk jơnap to ala teh âu tơdrong arih kon bơngai rai wơ̆ tŏk, rai kang kơjung hloh, mălei gah tơdrong arih pơm ‘lơ̆ng rai đunh rai lŭch. Lơ bơngai arih kiơ̆ kơ tơdrong hưch ham ‘maih kiơ̆ kơdih wă păng wă pôk pơư pơang kơdih akâu. Lăm tơdrong arih măng mu noh, Kră Yang ‘Bok Kei-Dei oei tơbăt đĕch. Yua kơ tơdrong ‘mêm Kră Yang ăn đĕch, Kră Yang rơih iŏk păng dah khul bơngai lui, jơ̆ lu bơngai lui gơh klaih yua kơ đơ̆ng pham Kră Yang Yêsu Krist, wă krao apinh Kră Yang ưang, păng ră roi anăn Sư tơ ala teh âu.
Ơ Kră Yang inh bơnê kơ Ih yua kơ tơdrong ‘mêm mơnat Ih ăn đĕch kơ inh jing kon Ih, gah adrĕch adrung pơkă, adrĕch adrung krao chă păng ưang kơ Ih. Apinh Ih tơgŭm inh arih trŏ kơ đơ̆ng Ih ăn. Anăn Ih đe ưang, pơih să dêh char Ih, krao khan yua anăn Kră Yang Yêsu Krist, Amen.
Lu bơ̆n ‘bôh bơ̆n arih oei kiơ̆ kơ adrĕch adrung Kain dah mă adrĕch adrung Set minh adrĕch krao chă Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 14-15
Kênh Youtube BHKTHN:
