Mikhas 6:6-8
Nqe cim:
“Tus Tswv twb qhia yam zoo rau peb lawm. Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwjchim nrog peb tus Vajtswv sib raug zoo.” (Mikhas 6:8)
Lus nug xav:
– Tsimnyog mloog tus Tswv lus, tiamsis cov Yixalayees tau ua dabtsi?
– Vajtswv xav kom Nws haivneeg ua yam dabtsi?
– Lub neej ncaj ncees, hlub tshua thiab txo hwjchim pab rau peb tau lub neej zoo licas?
Tus Cevlus Mikhas tau teb ib lo lus nug txij thaum ub los hais tias: Vajtswv xav kom tibneeg ua dabtsi? Puas yog yuav tsum muaj “ib txhiab tus yaj” lossis “tej roj txiv ntoo uas txhawv li tus dej tsis tu”? Tiamsis tus Tswv lo lus teb yoojyim heev thiab taw nkaus mus rau hauv lub siab, ntawd yog ua lub siab ncaj, sib hlub, thiab txo hwjchim nrog Vajtswv sib raug zoo. Tus Tswv tsis tau tso tseg txojkev pehawm, tiamsis Nws muab qhov tseemceeb ntawm lubneej tso rau hauv Nws tus mojyam. Tus Tswv cov menyuam yuav tsum qhia tshwm txojkev ntseeg dhau ntawm lubneej sab nraud.
“Ua lub siab ncaj”. Kev ncaj ncees nyob ntawm no yog hais txog txojkev ncaj ncees hauv lub neej nrog lwm tus. Ua lub siab ncaj yog sawv cev hais lus pab rau cov neeg uas poob qis, tsis muaj zog, raug hnov qab. Tus Tswv xav kom Nws haivneeg tsis yog tsuas hais lus ncaj ncees ntawm ncauj, lossis nqua hu lwm tus ua raws xwb, tiamsis tus kheej kiag yuav tsum ua kom tau. Yuav tsum saib rau qhov tabtom tshwmsim teebmeem, qhov chaw uas hwjchim meejmom ua rau tus tsi teev ncaj ncees raug txav, qhov chaw uas cov lus tseeb raug tso tseg, qhov chaw uas tej kev mob thiab kev tsis ncajncees tsis raug txiav txim, thiab nqis tes mus txhim kho kiag.
“Cog kev sib hlub kom ruaj khov” ntawd yog ua tshwm lub siab hlub tshua. Raws li hauv paus lus Henplais txhais hais tias “hlub los ntawm txojkev hlub tsis tso tseg”. Ntawd yog lub siab cim civ mus cuag lwm tus los ntawm txojkev khuvleej, tshwjxeeb yog mus cuag cov neeg uas tsis tsimnyog, cov neeg qaug zog, lossis cov neeg uas raug lwm tus tsis quavntsej. Hlub tshua yog xaiv ua zoo rau lwm tus tsis yog vim lawv tsimnyog tau; xaiv kev zam txim thaum yus muaj peevxwm ua pauj; xaiv txojkev txhim kho thaum yus muaj cuabkav tig nruabbqaum rau lawv; xaiv kev pub rau luag tsis xam rov qab. Yog tias txojkev ncaj ncees sawv tawmtsam qhov uas tsis yog, ces txojkev hlub tshua yuav kho tau tej qhov txhab raug mob kom zoo. Txojkev sib hlub yog daim tsom iav qhia tshwm Vajtswv nplooj siab, Nws yog tus muaj kev hlub tshua txawm yog Nws kuj yog tus ncaj ncees thiab dawbhuv kawg nkaus.
“Ua lub neej txo hwjchim nrog peb tus Vajtswv sib raug zoo” yog txojkev ua neej uas yim hnub yim zeem paub tus Tswv txojkev tshwmsim thiab nyob nrog nraim. Txo hwjchim yog saib pom yus tus kheej kev qaug zog, txaus siab mloog lus, thiab kawm xyaum ntxiv. Kev txo hwjchim yuav tuav tau kom txojkev ncaj ncees tsis dhau los ua qhov hnyav dhau, thiab tuav kom txojkev hlub tsis dhau los ua qhov yoojyim dhau. Ua neej txo hwjchim yog nrog tus Tswv mus txhua hnub, xyuamxim ua neej raws li tej uas tus Tswv xav kom peb ua.
Tus Cevlus Mikhas tej lus niaj hnub tshiab tshais rau peb, vim saib qhov tseemceeb ntawm txojkev ntseeg tsis yog nyob ntawm tej uas peb fij, tiamsis nyob ntawm peb nplooj siab, peb tus cwjpwm uas tabtom tau tus Tswv ntxuav kom dawbhuv. Lubneej ncaj ncees, hlub tshua, thiab txo hwjchim sib txuas ua ib yam khoomfij uas haum Vajtswv siab, thiab ua rau cov ntseeg lubneej zoo nkauj tuaj. Thov tus Tswv pub peb muaj lubneej npaj txhij txhim kho tej yam uas tsis yog, ua siab hlub tshua, thiab txo hwjchim kom tau tus Tswv coj kev.
Thov Vajtswv,
Nyuam yaus tus Vajtswv, thov qhia rau nyuam yaus paub ua lub siab ncaj, ua lubneej hlub lwm tus, thiab txo hwjchim nrog Koj sib raug zoo txhua hnub. Nyuam yaus tuav Yexus Khetos lub npe thov, Amees
Ib tsoom cov mloog uas hmov thiab tshua,
Peb yuav ua raws li tej uas Vajtswv xav kom peb ua li cas hauv peb tsev neeg, peb tes haujlwm, thiab hauv peb Pawg Ntseeg?
Nyeem Vajluskub hauv peb lub xyoos: Ntawv Nkauj 83-84
Kênh Youtube BHKTHN:
