Klei Aê Diê Blŭ: Y-Mika 6:6-8
Êlan kliăng: “Ñu bi êdah leh kơ ih, Ơ mnuih, ya jing jăk, leh anăn ya klei Yêhôwa mtă brei ih ngă. Jing klei ngă klei kpă leh anăn khăp klei pap, leh anăn êbat mbĭt hŏng Aê Diê ih hŏng klei luă gŭ.” (Y-Mika 6:8)
Klei êmuh ksiêm mĭn: Hrô kơ klei gưt asăp kơ Khua Yang, ya klei phung ƀuôn sang Israel ngă leh? Ya mta klei Aê Diê mtă brei phung ƀuôn sang Ñu ngă? Ya mta klei ba hriê kơ drei hruê nay mơ̆ng knhuah dôk hdĭp kpă ênô, khăp klei pap, luă gŭ?
Khua pô hưn êlâo Y-Mika wĭt lač kơ sa klei êmuh hđăp đưm: Ya klei Aê Diê mtă brei mnuih ngă? Amâo djŏ ôh hĕ “lu êbâo drei biăp knô”, “lu klăk klai hnoh êa boh ôliwơ” ƀiădah klei Khua Yang wĭt lač bŏ hŏng klei ênang êlưih leh anăn kma êlam hlăm ai tiê, anăn jing ngă klei kpă ênô, khăp klei pap, leh anăn êbat mbĭt hŏng Aê Diê hŏng klei luă gŭ. Khua Yang amâo hngah ôh kơ klei kkuh mpŭ ƀiădah Ñu lŏ dưm phŭn kơ klei hdĭp hlăm knuih jing Ñu. Phung anak ƀuôn sang Aê Diê brei bi êdah klei đăo hŏng knhuah dôk hdĭp sĭt klă.
“Ngă klei kpă”. Klei kpă tinei čiăng lač kơ klei mtăp mđơr hlăm ala ƀuôn. Ngă klei kpă jing blŭ brei kơ phung mnuih êdu awăt, kơ phung arăng wơr bĭt amâo mđing uêñ hlăm ƀuôn sang. Khua Yang čiăng kơ phung ƀuôn sang Ñu amâo knŏng blŭ mang amâodah iêô mthưr pô mkăn ngă klei kpă ênô ôh, ƀiădah brei drei pô yơh ngă klei kpă ênô. Brei drei dlăng kơ klei jing sĭt ară anei, kơ anôk mâo klei dưi ngă bi kplêč hĕ knăng klei kpă ênô, kơ anôk klei blŭ sĭt djŏ arăng lui hĕ amâo čiăng hmư̆, kơ anôk klei luč liê klei amâo mtăp mđơr amâo mâo pô mgaih mkra, čiăng kơ drei săn asei mlei mgaih mkra bi jăk.
“Khăp klei pap” jing ngă klei pap. Hlăm klei blŭ phŭn klei Hêbrơ mblang jing “khăp hŏng klei khăp kjăp sĭt”. Anăn jing klei nao giăm anak mnuih hŏng klei thâo pap, boh nik hŏng phung mnuih amâo mâo năng, hŏng phung êbuh, amâodah hŏng phung arăng wơr bĭt amâo mđing uêñ. Klei pap jing dôk hdĭp jăk hŏng mnuih mkăn amâo djŏ kyua digơ̆ năng ôh; ruah klei pap brei hrô kơ klei rŭ ênua; ruah klei lŏ bi mrâo hrô kơ klei lui wir; ruah klei thiê brei amâo lŏ tĭng yap ôh. Tơdah klei kpă ênô tlă anăp hŏng klei soh wê, snăn brei klei pap mdrao bi hlao klei êka. Klei khăp klei pap jing klei bi ktlă mơ̆ng ai tiê Aê Diê, Pô jing klei khăp, klei pap wăt Ñu jing klei kpă ênô, klei doh jăk mơh.
“Êbat mbĭt hŏng Aê Diê hŏng klei luă gŭ” jing knhuah hdĭp grăp knhuang êbat thâo kral klei Khua Yang dôk mbĭt leh anăn atăt gai. Luă gŭ jing thâo kral drei pô jing êdu awăt, hmiêt mkăp mđing hmư̆, leh anăn hriăm čiăng thâo. Klei luă gŭ krơ̆ng kơ klei kpă ênô amâo jing khăng đei, leh anăn krơ̆ng kơ klei pap amâo jing êlưih êdu. Êbat hŏng klei luă gŭ jing êbat mbĭt hŏng Khua Yang grăp hruê, dôk hdĭp hŏng klei răng gưt hlue klei Khua Yang čiăng drei ngă.
Klei blŭ mơ̆ng Khua pô hưn êlâo Y-Mika jing mrâo mda nanao kyuadah mdưm jing phŭn kơ klei đăo, amâo djŏ mnơ̆ng myơr ôh ƀiădah mơ̆ng hlăm ai tiê, hlăm knuih jing mnuih Khua Yang dôk bi mjing doh jăk. Knhuah hdĭp kpă ênô, thâo pap, luă gŭ bi mguôp jing mnơ̆ng myơr ngă yang bi mơak kơ Aê Diê, leh anăn bi mjing klei siam kơ klei hdĭp mnuih Krist. Akâo kơ Khua Yang brei drei hdĭp kăp ƀư̆ mkra klei soh wê, ngă klei pap, leh anăn luă gŭ čiăng mâo Khua Yang atăt gai.
Si drei dôk ngă klei Aê Diê mtă brei drei ngă hlăm gŏ sang, hlăm bruă mă leh anăn hlăm Phung Sang Aê Diê?
Wah lač: Ơ Aê Diê kâo, akâo Ih bi hriăm kâo ngă klei kpă, dôk hdĭp thâo khăp thâo pap, leh anăn luă gŭ êbat mbĭt hŏng Khua Yang grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 83-84
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
