Pajlug 26:6-10
Nqe cim:
“Yog koj cia tus ruam xa xov zoo ib yam li yog koj txiav koj txhais kotaw povtseg thiab yog koj tsub kev ntxhov siab ntxiv rau koj.” (Pajlug 26:6)
Lus nug xav:
– Tus neeg ruam yog neeg zoo li cas?
– Nqe Vajluskub no qhia tej yam twg uas tsis txhob ua nrog tus neeg ruam?
– Peb yuav muab zaj kawm no los siv hauv Vajtswv tes haujlwm li cas?
Cov nqe Pajlug no ceebtoom peb kom tsis txhob tso siab thiab tsis txhob muab haujlwm cob rau tus neeg ruam. Lo lus “tus neeg ruam” nyob ntawm no tsis yog hais txog tus neeg uas kawm ntawv tsawg los yog tsis paub ntawv, tiamsis yog tus neeg uas tsis hwm Vajtswv, nyiam thuam lub tswvyim thiab tsis kawm txuj kawm ci (Pajlug 1:7; Ntawv Nkauj 14:1). Tej zaum lawv muaj ntawv povthawj qib siab, tiamsis ho tsis muaj Vajtswv lub tswvyim los daws teebmeem haujlwm. Tus Tswv nqua hu peb kom peb yuav tsum paub xav thaum xaiv neeg.
Qhov thib ib, tsis txhob cob haujlwm rau tus neeg ruam. Tus sau tau sau tias: “Yog koj cia tus ruam xa xov zoo ib yam li yog koj txiav koj txhais kotaw povtseg thiab yog koj tsub kev ntxhov siab ntxiv rau koj” (nqe 6). Thaum yus muab haujlwm cob rau tus neeg ruam ces tsis txawv qhov uas yus rov ua rau yus ntsib teebmeem. Yog tso siab rau tus neeg ruam mus xa xov tseemceeb, ces tej lus xa xov ntawd yuav tsis mus txog lub homphiaj, ua rau tej uas npaj tseg lawm ua tsis tiav, thiab yuav ua rau lwm tus lossis yeebncuab thuam vim yus xaiv neeg tsis raug. Ua li ntawd yog yus rov tsim kev txaj muag rau yus tus kheej. Yog li ntawd, Vajtswv cov menyuam yuav tsum xaiv tus neeg uas muaj lub siab ncaj ncees thiab txawj xav los ua tej haujlwm uas tus Tswv cob rau. Tsis txhob muab haujlwm tseemceeb cob rau cov neeg uas lubneej sab ntsuj plig tseem tsis tau loj hlob los yog cov neeg tsis muaj lub siab txawj xav haujlwm.
Qhov thib ob, peb yuav tsum paub hais tias tus neeg ruam ua tsis raws li cov lus txawjntse. “Tus neeg ruam hais pajlug, ces tsuas zoo li tus neeg ceg tawv mus kev” (nqe 7); lossis “Tus neeg ruam hais pajlug, ces zoo ib yam li tus neeg qaug cawv dig saus tawm ntawm nws txhais tes” (nqe 9). Ib txhais taw uas lov, tuag ceg ces ua tsis tau haujlwm lawm; lossis ib tug saus uas nyob hauv tus neeg qaug cawv txhais tes tsuas yuav ua rau nws raug mob ntxiv xwb rau qhov nws tsis meej pem los dig tus saus ntawd tawm. Ib yam nkaus li ntawd, cov lus Pajlug hauv tus neeg txawj xav lub ncauj yuav ua rau ntau tus zoo siab, tiamsis hauv tus neeg ruam lub ncauj, tsuas ua rau lwm tus mob siab thiab tsis muaj nqis dabtsi li. Tus neeg ruam hais tau zoo heev, tiamsis nws lubneej ho tsis ua raws li lo lus ntawd. Lawv qhia Vajtswv Txojlus zoo heev li tej lus Pajlug tiamsis ho ua neej tsis raws qhov tseeb thiab ua rau zej zog kub ntxhov. Vajtswv cov menyuam yuav tsum ceevfaj thaum xaiv neeg los qhia Vajtswv Txojlus. Tsuas yog tus neeg uas muaj lub siab hwm Vajtswv thiaj yuav qhia tau raws li Vajtswv Txojlus tseeb.
Qhov thib peb, qhuas lossis siv tus neeg ruam yuav ua rau muaj kev puas tsuaj. “Yog qhuas tus ruam, ces zoo ib yam li muab ib lub pobzeb khi rau ntawm txoj zes hlua… Tus uas ntiav tus neeg ruam lossis tus qaug cawv ua nws tub zog, ces zoo ib yam li tus neeg tua hneevnti uas tsis saib qab saib hau mus raug lwm tus” (nqe 8, 10). Yog qhuas lossis muab haujlwm rau tus neeg ruam ua, ces tsis txawv qhov uas muab tus kheej tso rau qhov chaw uas muaj kev phom sij, ua cuamtshuam sawvdaws tes haujlwm. Tsis txhob xaiv neeg tsuas yog vim lawv kub siab xwb, tiamsis yuav tsum xaiv neeg los ntawm qhov uas lawv muaj lubneej hwm Vajtswv.
Thov Vajtswv,
Tus Tswv, thov pub rau nyuam yaus txojkev txawj xav thiab paub feebmeej hauv txhua txojkev sib raug zoo kom tsis txhob muaj tej kev xaiv uas ruam tsis raug. Thov Koj hloov nyuam yaus kom dhau los ua tus neeg uas lwm tus tso siab tau, muaj lubneej nyob hauv Koj txojkev tseeb. Nyuam yaus tuav Yexus Khetos lub npe thov, Amees.
Peb lubneej puas ua rau lwm tus tso siab tau thiab muab Vajtswv tes haujlwm cob rau peb?
Nyeem Vajluskub hauv peb xyoos: : I Kauleethaus 11
Kênh Youtube BHKTHN:
