Ntawv Nkauj 103:6-18
Nqe cim:
“Leej txiv hlub nws cov menyuam npaum li cas, tus TSWV hlub cov uas hwm nws npaum li ntawd.” (Ntawv Nkauj 103:13)
Lus nug rau sawvdaws xav:
– Vajntxwv Daviv qhuas Vajtswv txoj kev hlub li cas?
– Nws piav Vajtswv lub siab hlub tshua li cas?
– Peb cheem tsum ua dabtsi kom tau txais Vajtswv lub siab hlub tshua?
“Hlub tshua” yog ib lolus piav txog Vajtswv kev ua siab ntev thiab kev hlub, hais meej txog seem uas Vajtswv tsis rau txim rau tibneeg uas tsimnyog rau txim, tiamsis Nws tseem pub koob hmoov kev cawmdim rau neeg. Qhov ntawd yog lub cim qhia txog Vajtswv kev hlub thiab kev ua haujlwm tabmeeg ntawm tibneeg kev txomnyem thiab kev txhaum. Vajtswv txoj kev hlub tshua tshwm hauv lub siab hlub tob tob tuaj thiab coj mus txog tes haujlwm meej meej. Txawm yog tibneeg ntau zaug tawmtsam thiab ua txhaum rau Vajtswv, Vajtswv yeej tsis vim qhov ntawd es rau txim kiag raws yam uas tsimnyog peb tau txais. Tiamsis Vajtswv qhia tshwm Nws lub siab hlub tshua rau peb los ntawm qhov uas Nws txib Nws tus tub los hauv ntiajteb no tuag theej peb lub txhoj. Txawm peb tibneeg ua txhaum tawm tsam Vajtswv los Nws yeej tsis rau txim rau peb tamsim ntawd, Loos 8:5-8.
Hauv ntu Vajluskub no, vajntxwv Daviv qhuas Vajtswv txoj kev hlub thiab lub siab hlub uas tsis paub kawg pub rau tibneeg. Vajtswv yog “Tus TSWV yog tus siab dawb siab zoo thiab muaj kev hlub, nws tsis chim sai thiab nws hlub mus ibtxhis” (nqe 8). Vajntxwv hais txog dua tej uas Vajtswv tau ua pab cov Yixalayees. Vajtswv qhia rau Mauxes thiab Nws haivneeg paub txog Nws tes haujlwm (nqe 6-7). Txawm yog lawv tawmtsam Vajtswv, tiamsis thaum lawv tso kev txhaum tseg, Nws zam txim rau lawv thiab kho lawv dua tshiab.
Vajntxwv Daviv qhia paub: “Nws tsis rau txim rau peb raws li tej kev txhaum uas tsimnyog peb raug, lossis tsis ua pauj peb lub txim thiab tej kev txhaum uas peb ua” (nqe 10). Nov yog txoj kev txhawb zog loj heev rau Vajtswv cov menyuam. Yog Vajtswv tsis hlub tshua ces tsis muaj leejtwg yuav sawv taus tabmeeg Vajtswv txoj kev ncajncees. Vajtswv lub siab hlub tshua yog ib txoj koob hmoov uas loj kawg nkaus, tsis yog tau rau ntu sijhawm yus tau txais kev cawmdim xwb tiamsis mus tas ib tug ntseeg sim neej. Hauv nqe 13, Vajtswv siv tus duab ntawm Leej txiv rau cov menyuam los qhia tawm Vajtswv lub siab hlub tshua. Txoj kev sib piv no yuav raug coob tug lub siab, vim hais tias yog peb rov mus saib, ntau tsawg los peb yeej pom peb niam peb txiv qhia tawm lawv lub siab hlub rau peb. Thaum tig mus saib sab ntsujplig, cov uas hwm Vajtswv yeej xam pom Vajtswv kev hlub tshua yus txhua lub sijhawm thiab.
Thaum kawg, tus sau qhia meej hais tias Vajtswv paub peb tsis ruaj tsis khov, tsis muaj zog vim peb yog hmoov av puab los (nqe 14). Vim li ntawd peb yuav tsum vamkhom tus uas tsim peb, Nws yog tus ua tau ib puas tsav yam, puv npo kev hlub thiab lub siab hlub tshua. Vajtswv ibtxwm ncajncees rau Nws tej lus cog tseg. Vajtswv yuav hlub tshua txhua tus uas hwm Nws thiab ua siab ntev rau cov ntawd mus ibtxhis (nqe 13, 17). Peb txhua tus cia li los cuag Vajtswv, thov Nws zam txim rau peb kev tsis muaj zog, kev ua tsis tau zoo lossis qee lub sijhawm peb hnov qab Vajtswv txiajntsig kom peb tau txais Nws txoj kev hlub tshua.
Thov Vajtswv,
Vajtswv, nyuam yaus ua Koj tsaug rau Koj txoj kev hlub tshua uas loj kawg nkaus pub rau nyuam yaus. Thov pab nyuam yaus ua neej hwm Koj kom tau txais Koj txoj kev hlub tshua txhua lub sijhawm. Nyuam yaus tuav Tswv Yexus Khetos lub npe thov, Amees.
Peb puas saj tau Vajtswv kev hlub tshua rau yus tus kheej?
Nyeem Vajluskub hauv peb lub xyoos: Amauj 7
Kênh Youtube BHKTHN:
