Mathais 26:36-46
Nqe cim:
“Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis cev nqaij daim tawv qaug zog kawg li” (Mathais 26:41)
Lus nug xav:
– Tswv Yexus tau hais dabtsi rau peb tug thwjtim hauv lub vaj Khexemanes?
– Vim li cas Nws kom lawv yuav tsum ua li ntawd?
– Peb siv zaj kawm no li cas thaum ua neej nyob rau tiam kawg?
Thaum Tswv Yexus nrog cov thwjtim mus hauv lub vaj Khexemanes thov Vajtswv, Nws tau hais rau peb tug thwjtim tias: “nej cia li nrog kuv nyob ntawm no tsis txhob tsaug zog” (nqe 38). Lo lus “ceevfaj” lossis “txhob tsaug zog” muaj lub ntsiab tias pheej xeev ntsoov kom muaj kev txiav txim siab tau zoo lossis ua tau yog thaum ntsib tej kev nyuaj, sim siab tuaj raug. Tom qab uas Tswv yexus mus thov Vajtswv thiab rov qab los, Nws pom peb tug thwjtim tsaug zog ncaws nruj nris. Lawv tsis ceevfaj ua raws li tus Tswv tej lus hais. Tus Tswv kom lawv yuav tsum ceevfaj. Zoo ib yam li tus tubrog uas zov lub nroog, ua raws txojcai tswj thiaj ceevfaj ceebtoom tau thaum muaj kev nyuaj, qhia rau lub nroog paub tiv thaiv thaum muaj yeebncuab tuaj tua, cov thwjtim kuj cheemtsum nrhiav lub zog los ntawm kev thov Vajtswv thiaj kovyeej tej kev sim siab uas dab ntxwgnyoog thiab ntiajteb cev tuaj. Tus Tswv kuj qhia rau cov thwjtim paub lawv tus kheej meej heev, lawv lub siab tshaw kom ceevfaj rawv thiab thov Vajtswv, tiamsis lawv lub cev qaug zog zis.
Thaum Tswv Yexus rov los zaum tim ob “cov thwjtim tsaug zog tas lawm; lawv rua tsis taus qhovmuag li” (nqe 43), lawv ua tsis tau thiab qhib tsis taus qhovmuag. Tswv Yexus hais tias: “Nej tseem yuav tsaug zog thiab so kom txaus tso los? Nimno twb txog lub sijhawm uas Neeg Leej Tub yuav raug ntes coj mus rau cov neeg txhaum txhais tes lawm” (nqe 45), tsis yog tus Tswv tsis xav pub cov neeg uas nrog tus Tswv mus pw, tiamsis Nws xav kom lawv zeem paub qhov txaus ntshai uas lawv yuav ua tsis tau thaum ntsib tej kev nyuaj, sim siab uas yuav los; lawv thiaj paub nrhiav lub zog kovyeej los ntawm kev thov Vajtswv.
Nyob rau tiam kawg, Vajtswv Txojlus yeej niaj hnub qhia kom peb yuav tsum ceevfaj. Timthawj Petus ceebtoom cov ntseeg kom ceevfaj thov Vajtswv nyob rau tiam ntiajteb yuav kawg: “Nimno twb yuav txog lub sijhawm uas ib puas tsav yam hauv ntiajteb no puastsuaj. Yog li ntawd nej yuav tsum tswj nej lub siab, ceevfaj thiab nquag thov Vajtswv” (I Petus 4:7). Timthawj Paulus kuj hais rau Pawg Ntseeg Thexalaunikes txog kev ceevfaj tswj tus kheej: “Yog li ntawd peb tsis txhob tsaug zog li lwm tus. Peb yuav tsum tsis txhob tsaug zog thiab ceevfaj zov tos” (I Thexalaunikes 5:6). Kiag Tswv Yexus kuj qhia rau cov ntseeg kom yuav tsum ceevfaj tswj kev ua neej kom dawbhuv tos hnub Tswv Yexus los peb nrog Nws mus: “Kuv yuav los ib yam li tus tubsab tuaj! tus uas ceevfaj zov tos thiab txuag nws cev ris tsho kom zoo, nws yuav tau nyob kaj siab lug. Nws tsis liabqab, nws yuav muaj ntsejmuag mus rau ub rau no thiab tsis txajmuag rau leejtwg li!” (Tshwmsim 16:15). Thov Vajtswv pab kom peb niaj hnub ceevfaj, tsim dheev thiab nquag thov Vajtswv kom peb tsis raug dab ntxwgnyoog ntxias, tiamsis sawv khov kho nrog tus Tswv mus txhua hnub.
Thov Vajtswv,
Vaj Ntsujplig, Koj yog tus uas nyob hauv nyuam yaus, thov Koj pab kom kovyeej tej kev nyuaj, tej kev txhaum, tej kev nyiam lub ntiajteb; Koj qhia kom nyuam yaus paub ceevfaj thov Vajtswv thiab tos ntsoov hnub uas Koj rov qab los. Nyuam yaus tuav Tswv Yexus Khetos lub npe thov, Amees.
Tej kev qaug zog twg, tej kev nkees twg ua rau peb tsaug zog nrog tsis taus tus Tswv nyob?
Nyeem Vajluskub hauv peb lub xyoo: Yauj 41
Kênh Youtube BHKTHN:
