Mathais 26:47-50
Nqe cim:
“Tiamsis Yexus hais tias, Yudas, koj yuav nwj Neeg Leej Tub qhia rau lawv ntes nws los?” (Lukas 22:48)
Lus nug xav:
– Lub homphiaj uas Yudas nwj tus Tswv yog li cas?
– Yudas hais tias “nyob zoo, xibhwb!”, tiamsis Tswv Yexus hais tias “phoojywg” muaj lub ntsiab li cas?
– Nimno, hauv Pawg Ntseeg Vajtswv puas muaj cov neeg uas nrog tus Tswv mus zoo ib yam li Yudas?
Tom qab uas nrog cov povthawj tuav tswvyim tas ces tus uas ntxeev siab rau Tswv Yexus nqa peb caug lub nyiaj (Mathais 26:14-16), Yudas pom tias hmo ntawd yog lub zoo sijhawm, yog li nws thiaj coj cov tubrog zov lub tuamtsev mus ntes Tswv Yexus. Cia kom txhob ntes yuam kev, Yudas xaiv ua ib lub cim, uas yog nwj tus neeg twg ces ntes tus neeg ntawd. Raws li ib txwm, nwj yog qhia tawm txojkev hlub, thiab nwj sab plhu qhia tawm lub siab hlub tshua heev. Tiamsis nyob hauv lub vaj Khexemanes, Yudas nwj Tswv Yexus, qhov ntawd tsis yog nwj los ntawm lub siab hlub thiab saib muaj nqis tiamsis yog kev nwj ntawm kev ntxeev siab, vim kiag tom qab nwj tas, cov tubrog zov tuamtsev los ntes kiag Tswv Yexus.
Tswv Yexus muab Yudas hu ua “phoojywg!” txhais tau tias Nws tseem hlub, saib Yudas zoo ib yam li tus phoojywg, tiamsis Yudas muab tus Tswv hu ua “nyob zoo, xibhwb!” txhais tau tias Yudas tsuas saib tus Tswv zoo ib yam li tus neeg uas qhia nws xwb tsis saib zoo li tus Mexiyas, nws tus Cawmseej. Txawm yog lub npe hu ua “Yudas” muaj lub ntsiab hais tias “qhuas tus Tswv” (Chivkeeb 29:35) los ntu sijhawm uas nrog tus Tswv mus, Yudas yeej tsis tau lees tias Tswv Yexus yog nws tus Cawmseej li. Yudas nrog tus Tswv mus tsuas yog xav tias tus Tswv yuav ntaus yeej cov neeg Loos thiab ua vajntxwv kav ces Yudas yuav tau txhua yam, meejmom loj. Yudas xav tsis txog tias nws lub homphiaj yuav tas li ntawd thiab kuj tsis muaj nqis dabtsi rau nws, yog li nws thiaj txiav txim siab muab tus Tswv muag.
Nimno, muaj qee tus neeg yeej tuaj pehawm Vajtswv txhua lub athiv, koom tes ua ib txoj haujlwm hauv Pawg Ntseeg… tiamsis lawv tsis tau yog Vajtswv menyuam. Txhais tau tias tsis tau muaj ib zaug uas lawv yuav lees hais tias Tswv Yexus yog lawv tus Cawmseej, tsis tau mloog tus Tswv lus thiab pehawm Nws. Yog li ntawd, lawv yeej hais tias “hlub tus Tswv” tiamsis tes haujlwm ua ho tsis lees yuav Nws, dua li ntawd lawv tseem npaj tswvyim ua kom tau txiaj ntsig rau tus kheej, uas yog muab tus Tswv muag. Timthawj Paulus kuj qhia txog qhov no rau cov ntseeg nyob rau koog povtxwv Kaletes: “Lawv hais tias lawv yog cov uas paub Vajtswv, tiamsis lawv tsis ua lawv lub neej zoo li cov uas paub Vajtswv ua, lawv yog neeg siab phem thiab tsis mloog leejtwg lus. Koj tsis txhob muab ib txog haujlwm tseemceeb tso rau cov neeg ntawd ua hlo li, rau qhov lawv yeej ua tsis tau” (Titus 1:16). Tus Tswv niaj hnub qhia tshwm Nws txoj koob hmoov pub dawb rau peb, Nws niaj hnub nug peb txog lub homphiaj peb nrog Nws mus thiab ua Nws tes haujlwm ib yam li uas Nws nug Yudas hnub thaud: “Phoojywg, koj yuav ua dabtsi cia li ua nrawm nroos” (nqe 50). Cia li nco ntsoov tias tus Tswv paub txhua yam, Nws paub meej peb tabtom ua li cas rau Nws. Tsis txhob cia tus Tswv nug peb tias, “koj yuav nwj Neeg Leej Tub qhia rau lawv ntes nws los?” (Lukas 22:48).
Thov Vajtswv,
Tswv Yexus, thov Koj zam txim rau nyuam yaus vim ntau zaus nyuam yaus tej lus hais, tej kev ua tsis tsimnyog lawm. Thov qhia rau nyuam yaus tsis yog tsuas hais lub ncauj hlub koj, tiamsis kev ua neej qhia tshwm Koj txojkev hlub, ua rau Koj tau ntsejmuag. Nyuam yaus tuav Tswv Yexus Khetos lub npe thov, Amees.
Yam dabtsi qhia tau tias peb tabtom nrog tus Tswv mus thiab hlub tus Tswv tiag tiag?
Nyeem Vajluskub hauv peb lub xyoo: Yauj 42
Kênh Youtube BHKTHN:
