Klei Aê Diê Blŭ: Klei Mmuñ Hđăp 103:6-18
Êlan kliăng: “Msĕ si sa čô ama pap kơ phung anak ñu, snăn mơh Yêhôwa pap kơ phung huĭ mpŭ kơ Ñu” (Klei Mmuñ Hđăp 103:13)
Klei êmuh ksiêm mĭn: Si mtao Y-Đawit mpŭ mni kơ klei pap Khua Yang? Si ñu hưn êdah klei pap Khua Yang? Ya klei brei drei ngă čiăng dưi mă tŭ klei pap Khua Yang?
“Klei pap” jing sa boh blŭ bi êdah klei jăk leh anăn klei khăp Aê Diê, kñăm kơ klei Khua Yang amâo bi kmhal ôh phung mnuih năng tŭ klei bi kmhal, ƀiădah Ñu lŏ brei klei pap bi mtlaih. Klei anăn bi êdah klei khăp leh anăn bruă Khua Yang ngă ti anăp klei knap mñai leh anăn klei soh anak mnuih. Klei pap Khua Yang bi êdah ai tiê pap hŏng bruă ngă sĭt êmĭt. Wăt tơdah anak mnuih lu blư̆ bi kdơ̆ng leh anăn ngă soh hŏng Khua Yang, Ñu ăt kăn kyua klei anăn phat kđi mtam hlue si klei drei năng tŭ rei. Bi mklăk wĭt, Aê Diê bi êdah klei Ñu pap kơ drei hŏng klei tiŏ nao Anak Ñu Mâo Knŏng Sa Čô trŭn hriê ti lăn ala tŭ klei djiê hrô brei kơ klei soh drei (Rôm 8:5-8).
Hlăm trăn Klei Aê Diê Blŭ anei, mtao Y-Đawit mpŭ mni kơ klei pap leh anăn klei khăp amâo mâo knhal Khua Yang pioh brei kơ phung mnuih. Ñu hưn mdah Khua Yang jing Pô “Jăk leh anăn thâo pap, amâo djăl ăl ôh, mdrŏng hŏng klei khăp.” (êlan 8). Mtao Y-Đawit lŏ mñă jih klei Aê Diê ngă leh kơ phung ƀuôn sang Israel. Aê Diê bi êdah kơ Y-Môis leh anăn kơ phung ƀuôn sang Ñu jih jang bruă Ñu (êlan 6-7). Wăt tơdah diñu bi kdơ̆ng hŏng Khua Yang, ƀiădah tơdah diñu lŏ kmhal, Khua Yang ăt pap brei leh anăn lŏ bi mrâo diñu.
Mtao Y-Đawit brei thâo: “Ñu amâo ngă kơ drei tui si klei soh drei ôh, kăn bi kmhal rei tui si klei wê drei.” (êlan 10). Anei jing sa klei bi mđĭ ai prŏng snăk kơ phung anak Aê Diê. Tơdah Khua Yang amâo pap ôh, snăn amâo mâo ôh sa čô dưi dôk dơ̆ng ti anăp klei kpă ênô Ñu ôh. Klei pap Khua Yang jing sa klei jăk mơak prŏng prĭn, amâo djŏ knŏng êjai mmông mă tŭ klei bi mtlaih ôh ƀiădah wăt ktuê jih klei hdĭp phung đăo kơ Krist. Hlăm êlan 13, Aê Diê yua rup sa čô ama hŏng phung anak ñu čiăng bi êdah klei pap Ñu. Hŏng lu mnuih, klei bi hmô anei sô̆ djŏ truh hlăm lam ai tiê mtam, kyua tơdah drei lŏ dlăng wĭt, ƀiă lu ăt mâo leh klei amĭ ama bi êdah klei pap klei khăp digơ̆ hŏng drei. Tơdah lŏ dlăng wĭt kơ klei hdĭp myang, jih jang phung huĭ mpŭ kơ Aê Diê dưi thâo kral leh mơh klei pap Khua Yang jih tal anei kơ tal mkăn.
Knhal tuč, pô čih kñăm Khua Yang thâo săng klei awăt êdu drei kyuadah Ñu hrih mjing leh drei hŏng ƀruih lăn (êlan 14). Kyuanăn, brei drei knang kơ Pô Hrih mjing leh drei, jing Pô Mâo Jih Klei Myang, Pô bŏ hŏng klei khăp leh anăn klei pap. Aê Diê jing sĭt suôr nanao hŏng klei Ñu ƀuăn. Khua Yang ăt srăng pap nanao kơ phung huĭ mpŭ kơ Ñu, klei jăk Ñu adôk nanao hlŏng lar hŏng digơ̆ (êlan 13, 17). Brei grăp čô drei êran nao kơ Khua Yang, akâo kơ Khua Yang pap brei kơ jih jang klei awăt êdu, klei amâo năng drei, amâodah lu blư̆ drei wơr bĭt hĕ klei pap Khua Yang hŏng drei, čiăng dưi mă tŭ klei pap prŏng mơ̆ng Khua Yang brei.
Si ngă drei thâo kral mơ̆ klei pap Khua Yang brei leh kơ drei pô?
Wah lač: Ơ Khua Yang, bi mni lač jăk kơ Khua Yang kyua klei pap Khua Yang prŏng êdimima kơ klei hdĭp kâo. Akâo Khua Yang đru kâo dôk hdĭp huĭ mpŭ kơ Khua Yang, čiăng kơ kâo dưi mă tŭ klei pap Khua Yang pioh brei kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
