Klei Aê Diê Blŭ: Y-Yôp 34:10-15
Êlan kliăng: “Sĭt nik Aê Diê amâo srăng ngă klei ƀai ôh, leh anăn Pô Mâo Jih Klei Myang amâo srăng bi msoh klei kpă ôh.” (Y-Yôp 34:12)
Klei êmuh ksiêm mĭn: Ya klei Y-Êlihu lač kơ klei kpă ênô Khua Yang? Ya klei mtrŭt ñu blŭ kơ klei kpă ênô Khua Yang? Si drei thâo săng leh anăn thâo kral klei kpă ênô Khua Yang?
Y-Êlihu blŭ kơ klei knap mñai Y-Yôp dôk tŭ. Hlăm êlan 10-15, ñu hur har snăk blŭ mgang kơ klei kpă Aê Diê. Ñu kñăm dua blư̆: “Aê Diê amâo dưi ngă klei ƀai ôh hơăi” (êlan 10, 12). Sĭt nik, klei kpă ênô Khua Yang brei drei thâo, ñu amâo ngă ya mta klei soh čhuai ôh. Mâo lu mta klei truh, thâodah drei tŭ ư amâodah hoăi, Khua Yang ăt kpă ênô. Klei kpă ênô jing knuih klă kluôm Ñu (Klei Mmuñ Hđăp 92:15; Rôm 9:14).
Ti krah klei ênguôt hnĭng Y-Yôp, Y-Êlihu blŭ bi kdơ̆ng hŏng jih jang klei mĭn lač kơ Aê Diê ngă klei amâo mâo mtăp mđơr. Klei anăn lŏ bi klă kơ jih jang bruă Aê Diê ngă jing djŏ găl kluôm dhuôm tui si knuih Ñu jing. Klei blŭ hưn anei jing sa klei mñă kơ anak mnuih, wăt tơdah dôk rŭng răng ti anăp klei knap mñai, ăt kăn dưi lač kơ Aê Diê amâo mâo mtăp mđơr rei.
Ƀiădah lĕ, Y-Êlihu soh čhuai snăk tơdah ñu yua klei kpă ênô klă kluôm Khua Yang kăp phat kđi Y-Yôp, kyuadah lač Y-Yôp tŭ klei bi kmhal kyua klei soh ñu pô yơh (êlan 11). Y-Êlihu blŭ hŏng klei mgao tơdah ñu yap ñu jing pô bi ala kơ Aê Diê leh anăn jhŏng phat kđi Y-Yôp. Klei kpă ênô Khua Yang kna kluôm dhuôm ti dlông klei sĭt nik. Ñu ƀuh jih ai tiê, klei mĭn leh anăn wăt jih jang klei mtrŭt hlăm jih jang bruă anak mnuih ngă. Amâo mâo sa mta klei dưi mdăp ti anăp Ñu ôh. Wăt tơdah snăn dưn, klei anăn amâo mblang ôh jih jang klei knap mñai truh kơ anak mnuih jing klei Khua Yang bi kmhal sơăi. Jih jang klei luč liê, knap mñai Y-Yôp dôk tŭ amâo djŏ kyua klei soh ñu ôh, ƀiădah jing klei lông dlăng klei ñu đăo kơ Aê Diê (Y-Yôp 2:10; 42:1-6). Wăt tơdah Aê Diê jing kpă ênô nanao, ƀiădah Ñu ăt jing Pô bŏ hŏng klei khăp leh anăn kăp pap brei nanao tơdah anak mnuih lŏ kmhal kơ klei soh. Leh Khua Yang brei klei lông dlăng truh, Ñu lŏ bi mrâo leh anăn hơêč hmưi kơ Y-Yôp dua blư̆ lu hĭn jih jang mnơ̆ng ñu luč liê leh (Y-Yôp 42:10). Êjai Y-Êlihu knŏng kñăm kơ klei kpă ênô Khua Yang čiăng phat kđi Y-Yôp, snăn jing soh kjham leh, kyuadah ñu wơr bĭt hĕ klei khăp Aê Diê, leh anăn yua klei mĭn anak mnuih čiăng mblang kơ bruă Aê Diê ngă kơ klei hdĭp mnuih mkăn.
Klei kpă ênô Khua Yang kñăm kơ klei đăo drei snei, wăt tơdah boh klei truh dlăng msĕ si amâo mâo mtăp mđơr ôh, Aê Diê ăt ngă tui si klei thâo mĭn dlông hĭn Ñu pô, jing klei êgao hĭn kơ anak mnuih dưi thâo săng. Pô kpă ênô kăp rơ̆ng kơ jih jang klei Ñu kiă kriê jing djŏ klă nanao, leh anăn ti knhal tuč, klei kpă ênô srăng dưi hĭn. Ti krah lăn ala bŏ hŏng klei amâo mtăp mđơr, drei đăo kjăp kơ Aê Diê kpă ênô leh anăn klei khăp yuôm bhăn Ñu, kyuanăn drei knang kơ Ñu.
Hriăm thâo leh kơ Aê Diê kpă ênô, si ngă drei nao phă anăp hlăm jih jang klei truh mơ̆?
Wah lač: Ơ Khua Yang, bi mni lač kơ Khua Yang kyuadah Ih jing sĭt suôr leh anăn kpă ênô nanao. Akâo Khua Yang đru kâo đăo knang nanao kơ klei kpă ênô Khua Yang, čiăng kjăp ai tiê dôk gĭr tui hlue Khua Yang, wăt tơdah kâo amâo dưi thâo săng jih ôh klei dôk truh jŭm dar kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
