Yauj 34:10-15
Nqe cim:
“Vajtswv tus uas muaj hwjchim loj kawg nkaus yeej tsis ua txhaum li; nws ibtxwm ua ncaj rau sawvdaws” (Yauj 34:12)
Lus nug rau sawvdaws xav:
– Elihus hais li cas txog Vajtswv txoj kev ncajncees?
– Nws lub homphiaj thaum uas sib cav txog Vajtswv txoj kev ncajncees yog dabtsi?
– Peb totaub thiab tau saj Vajtswv txoj kev ncajncees li cas?
Elihus sib cav txog Yauj txoj kev txomnyem uas nws tabtom ntsib. Hauv nqe 10-15 Elihus rau siab hais tiv thaiv Vajtswv txoj kev ncajncees. Nws hais meej txog zaum tim ob: “Vajtswv tus uas muaj hwjchim loj kawg nkaus puas ua txhaum?” (nqe 10, 12). Tseeb tiag, Vajtswv txoj kev ncajncees qhia rau peb paub hais tias Nws yeej tsis ua txhaum ib yam dabtsi twg. Muaj tej yam tshwmsim tuaj, txawm peb txais yuav thiab tsis txais yuav los xij, Vajtswv yeej ncajncees. Txoj kev ncajncees yog ib tug yam ntxwv zoo kawg nkaus hauv Vajtswv (Ntawv Nkauj 92:15; Loos 9:14).
Hauv Yauj txoj kev txomnyem, Elihus sib cav los tawmtsam txhua lub tswvyim uas hais tias Vajtswv txawj ua tsis ncaj. Qhov no txhawb nqa hais tias Vajtswv yeej ua yog kawg nkaus raws li Nws tus yam ntxwv. Elihus tej lus hais no zoo li ib lo lus ntuas tibneeg hais tias, kiag thaum muaj kev txhawj ntshai ntawm kev txomnyem, los yeej tsis muaj cai hais tias Vajtswv tsis ncajncees.
Txawm li ntawd los, Elihus yuam kev loj, thaum uas siv Vajtswv txoj kev ncajncees uas los txiav txim rau Yauj, thiab hais tias Yauj raug txim vim nws tej kev txhaum (nqe 11). Elihus hais lus khavtheeb cim civ hais tias nws sawv cev Vajtswv thiab kav txiav txim rau Yauj. Tseeb tiag Vajtswv txoj kev ncajncees puavleej yog ntawm qhov tseeb los. Vajtswv saib pom tagnrho txhua tus lub siab, kev xav thiab tej homphiaj ntawm neeg tes haujlwm. Tsis muaj yam dabtsi zais tau Nws. Txawm li ntawd los, qhov no tsis tau txhais hais tias txhua txoj kev txomnyem puavleej yog Vajtswv kev rau txim. Yauj txoj kev poob txhua yam thiab txomnyem tsis yog nws ua txhaum tiamsis yog ib txoj kev sim siab los sim nws kev ntseeg rau ntawm Vajtswv (Yauj 2:10; 42:1-6). Txawm yog Vajtswv ibtxwm ncajncees, tiamsis Nws kuj puv npo kev hlub thiab Nws npaj txhij zam txim thaum uas tibneeg tso kev txhaum tseg. Tom qab kev sim siab, Vajtswv kho dua thiab foom koob hmoov ntau tshaj ib npaug ntxiv rau tej uas Yauj poob lawd (Yauj 42:10). Thaum Elihus tsuas ntsia ntsoov Vajtswv kev ncajncees los liam txim rau Yauj ces ua rau Elihus yuam kev loj, nws tsis nco qab txog Vajtswv kev hlub, thiab siv tibneeg kev xav los piav qhia Vajtswv tes haujlwm ntawm lwm tus lub neej.
Vajtswv txoj kev ncajncees qhia meej rau peb kev ntseeg hais tias, kiag thaum lub sijhawm pom zoo li tsis ncajncees los xij, Vajtswv yeej tseem ua haujlwm raws li Nws txoj kev txawjntse, yog yam uas siab tshaj tibneeg kev totaub. Vajtswv tus ncajncees tabpov hais tias Nws txoj kev tswj ibtxwm yog thiab thaum kawg, kev ncajncees yuav kovyeej. Nyob hauv lub ntiajteb uas puv npo txoj kev tsis ncajncees, los peb yeej ntseeg ruaj Vajtswv ncajncees thiab muaj kev hlub kawg nkaus yog li ntawd peb cia siab tau rau Nws.
Thov Vajtswv,
Vajtswv, nyuam yaus ua Koj tsaug vim Koj ibtxwm ncajncees. Thov pab nyuam yaus ntseeg thiab cia siab rau Koj txoj kev ncajncees, txawm yog txhua lub sijhawm yuav muaj dabtsi tshwmsim tsis totaub los xij kom nyuam yaus ntseeg ruaj rau ntawm Koj. Nyuam yaus tuav Tswv Yexus Khetos lub npe thov, Amees.
Kawm paub Vajtswv ncajncees, peb puas npaj txhij rhais ruam mus hauv txhua lub tsamthawj?
Nyeem Vajluskub hauv peb lub xyoos: Amauj 6
Kênh Youtube BHKTHN:
