Klei Aê Diê Blŭ: II Klei Yăl Dliê 36:1-4
Êlan kliăng: “Ară anei jông Aê Diê dưm leh ti agha kyâo; jih jang kyâo amâo mâo boh jăk ôh Aê Diê srăng druôm hĕ leh anăn hwiê hlăm pui.” (Y-Luk 3:9)
Klei êmuh ksiêm mĭn: Hlei phung ƀuôn sang ruah bi mđĭ jing mtao lŏ čuê Mtao Jôsia? Ya mta phŭn ngă arăng mdlưh mtao anei? Ya klei hriăm mñă kơ drei?
Leh Mtao Jôsia, mtao jăk knhal tuč mơ̆ng ala mtao Yuđa djiê hlăm klei bi blah ti gŭ kngan Mtao Nêkô, čar Êjip snăn phung ƀuôn sang mđĭ mtao Y-Jôača jing anak tal pă, ăt lŏ pia jing Y-Salum (I Klei Yăl Dliê 3:15). Anei jing mtao knhal tuč mơ̆ng Yuđa mâo phung ƀuôn sang mđĭ jing mtao. Hrô kơ wah lač akâo tui si klei Aê Diê čiăng leh anăn ruah sa čô mnuih huĭ mpŭ kơ Aê Diê đĭ jing mtao snăn phung ƀuôn sang lŏ ngă tui si klei pô čiăng ruah anak êkei mtao Y-Jôača.
Mtao Y-Jôača mâo dua pluh tlâo thŭn hlăk êjai đĭ ngă mtao. Hdruôm hră Klei Yăl Dliê čih yap đŭt snăk kơ mtao anei knŏng hlăm pă êlan, ƀiădah kyua hdruôm hră Bruă Mtao brei thâo “ñu ngă klei jhat ti anăp ală Yêhôwa” (II Bruă Mtao 23:32), drei thâo thiăm anei jing sa čô mtao ƀai. Mtao Y-Jôača knŏng kiă kriê tlâo mlan snăn mtao Nêkô čar Êjip mdlưh mtao leh anăn brei Y-Êliakim adei ñu jing mtao kiă kriê, ayŏng mtao đĭ jing mtao lŏ kiă kriê ti Yêrusalem. Hdruôm hră Bruă Mtao brei thâo arăng iêô mtao Y-Jôača nao ti Ribla (II Bruă Mtao 23:33), arăng mă kơ̆ng, leh anăn arăng mă jing hlŭn ti Êjip leh anăn djiê tinăn. Mtao Y-Jôača mâo mnuih Êjip mdlưh ngă mtao kyua amâo sa ai hŏng mnuih Êjip. Boh sĭt, djăp mta klei truh kđi čar Aê Diê brei truh dôk hlăm klei Ñu kiă kriê sơăi. Êngao kơ bruă mdlưh jhưng mtao, Mtao Êjip lŏ brei krĭng Yuđa tuh jia sa êtuh talăng prăk leh anăn sa talăng mah, Yuđa tuh jia ênoh prăk anei kơ Êjip, brei ƀuh Yuđa jing leh sa hlŭn Êjip.
Hdruôm hră Klei Yăl Dliê mñă nanao sa mta klei: Klei soh plăk wĭt plăk nao leh anăn amâo mâo kmhal srăng atăt truh kơ klei jhat. Klei Mtao Jôsia djiê, sa čô mtao jăk knhal tuč ti Yuđa, đăo knăl kơ klei knhal tuč mơ̆ng ala mtao Yuđa êngiê. Yuđa mphŭn tŭ klei ktư̆ juă phung mtao ti êngao, tal êlâo jing Mtao Nêkô mơ̆ng Êjip. Phung mtao Yuđa leh anăn phung ƀuôn sang hlăm sa wưng sui snăk amâo hlue ngă Klei Aê Diê Blŭ, amâo djă pioh hruê Saƀat, leh anăn ngă soh kkuh kơ rup yang, kyua anăn ară anei truh leh mmông diñu tŭ jông plĕ phat kđi tal êlâo yap mơ̆ng leh mtao huĭ mpŭ kơ Aê Diê jing Y-Jôsia djiê. Jông anei hưn kơ bruă srăng lŏ dưm truh ti agha, jing đăo knăl kơ klei Yuđa dlưh rai kluôm leh anăn phung ƀuôn sang srăng tŭ klei jing hlŭn kyua Ƀaƀilôn hlăm thŭn 586 êlâo kơ klei kkiêng kơ Khua Yang. Klei hriăm mñă kơ drei brei kmhal mtam tơdah thâo pô ngă soh. Aê Diê bŏ hŏng klei pap srăng pap brei tơdah drei kmhal, ƀiădah Ñu srăng bi kmhal tơdah drei dôk mâo ai tiê khăng.
Mâo ya klei hlăm klei hdĭp ngă kơ drei tuôm leh amâodah srăng tŭ jông Aê Diê phat mkra?
Wah lač: Ơ Khua Yang, bi mni kơ Aê Diê kơ klei hriăm hruê anei. Tơdah mâo ya klei amâo bi mơak kơ Ih hlăm klei hdĭp kâo, akâo kơ Khua Yang bi êdah, ƀuah mkra, pap brei leh anăn đru kâo thâo kmhal, lăm lui, čiăng kâo amâo tŭ ôh jông Aê Diê bi kmhal. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôel 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
